Prices 											Tswana



Tsela nngwe ya go leba ditlhotlhwa tsa dijo tse di tlhatlogang



Instructions: 

Folio Strap: Ditlhotlhwa tsa dijo

Byline: Sakkie van Zyl, raikonomi: Dipatlisiso tsa Thekiso (Corné Louw o itsege ka ditshwaelo tsa gagwe tsa ditlhotlhwa tsa disele le yurea tsa kgwedi le kgwedi)



Kerafo 1: 	Borotho jo bosweu (700g)

		Korong ya Safex

		Tshupane (Index)

		Kgwedi



Kerafo 2: 	Yurea 

		Korong ya Safex

		Disele 

		Tshupane 

		Kgwedi 



Kerafo 3: 	Borotho jo bosweu (700g)

		Bupe jwa mmidi

		Yurea 

		Disele 

		Molebo (trend) - borotho jo bosweu)

		Molebo - Yurea 

		Tshupane 

		Kgwedi



Ditlhotlhwa tsa dijo tse di tlhatlogang, bogolo segolo tsa dijokgolo, di tlhageletse thata mo pontsheng mo dikgwedinyaneng tse di mmalwa tse di fetileng, e bile badirisi ba iphitlhela ba kgamiwa ke tlhotlhwa ya borotho e e kwa godimo. Mabaka a a tlhagisiwang e le ona a bakang dikoketsego tseno ke tlhatlogo e e tshosang mo tlhotlhweng ya boditšhaba ya dithoto tsa temothuo gammogo le tlhaelo ya selegae ya dithoto tse.



Go tswa tshwantshanngong magareng ga ditlhotlhwa tsa konteraka tsa Safex le ditlhotlhwa tsa borotho tsa dikgwedi tse di tsamaelanang, go ka lemogwa gore tlhotlhwa ya korong e tlhatlogile ka lebelo thata go na le tlhotlhwa ya borotho (Kerafo 1). Go na le kgonagalo ya tlhatlogo e kgolo thata ya ditlhotlhwa tsa dijo mo dikgweding tse di tlang. Badirisi, ba gajaana ba setseng ba itshega menwana go leka go tshwaraganya, ba sa ntse ba tlaa tshwanela go itshoka le go feta mo dikgweding tse di tlang.

 

Kerafo 1: Tshupane ya tlhotlhwa ya borotho go tloga Ferikgong, 2000.

Metswedi: Grain SA, Safex le Statistics SA (Sagis Webpage).



Ka ntlha ya ditlhotlhwa tse di kwa godimo gajaana tsa dithoto tsa temothuo, bontsi jwa batho jo bo sa sedimosediwang sentle bo ithaya bo re ntshodikuno ya dithoro e na le poelo e e kwa godimo. Balemirui bao, ba ba kgonneng go tswelela ka temothuo mo dingwageng tse di mmalwa tse di fetileng, foo ditlhotlhwa tse di kwa tlase le maemo a leuba e neng e le sejo sa letsatsi, gajaana ba bone sebakanyana sa go hema. Fela le gale, ka ntlha ya koketsego e e tshosang ya ditshenyegelo tsa ditsenngwateng, kgonagalo ya ditlhotlhwa tsa dijo tse di kwa tlase e sala go nna toro.



Kerafo 2 e bontsha gore magareng ga 2004 le 2007, tlhotlhwa ya korong ga e a ka ya lepalepana le ditlhotlhwa tse di oketsegileng tsa disele le menontsha – seemo se se reketlang tota. Ditlhotlhwa tse di kwa tlase tse di bonweng mo dikunong, gammogo le ditshenyegelo tse di kwa godimo tsa ditsenngwateng, di ntse le seabe se segolo mo go reng bantshadikuno ba bantsi ba bo ba tlhobogile ntshodikuno ya dithoro. Seemo se, se mpe thata mo karolong ya balemirui ba ba tlhabologang – ntshodikuno ya dithoro e tshwanetse gore e nne le dipoelo fa balemi ba bantšhwa ba tshwanela go tlhongwa ka katlego.



Dikoketsego tsa fa gautshwane mo ditlhotlhweng tsa dithoto di neile balemirui tsholofelonyana, fela ditshenyegelo tse di tlhatlogang tsa ditsenngwateng di buseditse maemo kwa a neng a le teng – balemi ba fitlhela go le bokete go ntsa dithoro mme ba dira poelo.







Kerafo 2: Tshupane ya tlhotlhwa ya yurea, disele le korong go tswa Ferikgong 2000.

Metswedi: Grain SA, Safex, Statistics SA (go tswa Sagis webpage).



Kerafo 3 e tshwantshanya tshupane ya tlhotlhwa ya ditsenngwateng jaaka yurea le disele le ditlhotlhwa tsa borotho le bupi jwa mmidi. Go itshupa sentle gore balemirui ba ne ba lebagane le ditshenyegelo tsa ditsenngwateng tse di oketsegileng mo go boitshegang thata go feta ditlhotlhwa tsa dijo tse di oketsegileng tse badirisi ba lebaganeng natso. Motseletsele wa boleng wa dithoro o tlaa tshwanelwa ke go dira ka tsela e nngwe gore o kgone go ntsha dikuno tse dintsi go fetisa ka ditsenngwateng tse di tshwanang – go sa nneng jalo badirisi ba tlaa tshwanela go duelela dijo go bonala go feta.





Kerafo 3: Tshupane ya tlhotlhwa ya borotho jo bosweu, bupi jwa mmidi, yurea le disele go tswa Ferikgong 2000.

Metswedi: Grain SA, Safex, Statistics SA (Sagis webpage).



Bokhutlo

Ditlhatlogo tse di tshosang tsa dijokgolo ke gore totatota ke dipholo tsa go tlhoka pholisi e e tshwanetseng ya temothuo go tswa mo Mmusong, go kopane le go palelwa ga Mmuso go diragatsa dipholisi le ditogamaano tse di setseng di le teng. Bantshadikuno ga ba ka ke ba kgona ba le bosi go ntshetsa setšhaba dijo tse di tlhotlhwatlase – Mmuso o a go tshwanela go dira seabe sa ona.



















