Miss (Maize)  										Setswana
Se fose ditšhono tsa gago	
Instructions: 
Folio strap: Thulaganyetso ya ntshokuno
Byline: Phonnie du Toit, Setheo sa Dijalothoro sa ARC.
Grabber: Nna podi matseba, tšhono e e gaisang ya gago e ka tlhagelela ka bonako jo o sa bo solofelang.
Grabber: Leka gore o se semelele thata mo o ka fosang ditšhono tse di gaisang tsa gago tse di masisi mo ntshokunong ya dithoro e e atlegileng.
E re ka bantshakuno ba dithoro ba ikaegile ka gore setlha sa dijalo sengwe le sengwe e nne se se siameng, dithoro tse dintsi di rulaganyediwa mo godimo ga setlha sa ntshokuno se le sengwe ngwaga ka ngwaga. Mo pakeng e khutshwane jalo, tšhono e e siameng e tlhagelela gangwe fela mo mabakeng a le mantsi. Bantshakuno gantsi ba fosa ditšhono tse dikgolo go fokotsa ditshenyegelo kgotsa go thibela ditatlhegelo tsa dijalo tse di kwa godimo ka gonne ba sa dira ka nako.
Go na le ditšhono di le dintsi tse di siameng tse di ka tlhagelelang mo pakeng ya paakanyo pele ga nako ya go jwala gammogo le go tswelela mo setlhakgolong. Se se latelang ke dikao tsa seo:
Tšhono ya go reka e e gaisang
Ela tlhoko dithekiso tse di kgethegileng tsa boleng jo bo siameng. Itirele dikelotlhoko mo setlheng sa kgolo go lekanyetsa boleng jwa tiragatso ya dikuno tse di dirisiwang mo polaseng ya gago. Se se tlaa go kgontsha go tsaya ditshwetso tse di siameng le go tlhopha kuno e e gaisang. Itlhomele dikgono tsa botlhodi. Tereilara e kgologolo e e beetsweng tlhotlhwa e e isegang, e e rekisiwang mo fantising ya selegae, e ka nna tšhono ya botshelo.
Letlhajwalo le le gaisang
Se ke tšhono e gantsi e fosiwang ke bantshakuno. Mo makgating a le mantsi didiriso tsa metšhine tse di itlhokomolositsweng di tlhola tiego e e sa tlhokafaleng. Nako e e siameng ya go tlhokomela didiriso tsa gago ke fela mo bokhutlong jwa setlhajwalo sa gago. Fa didiriso di bolokwa morago ga go phepafadiwa sentle thata, le go sirelediwa kgatlhanong le jego, go tlaa tlhokega nako e nnye thata le ditshenyegelo tse di potlana go siamisa didiriso. Fa o siame mo letsatsing le le lolametseng maemo a go jwala, go tlaa go dira gore o ikutlwe o le mo taolong ya ditiro tsa gago.
Go sireletsa mmu wa gago
Pula ya matlakadibe e le nngwe fela e ka tlhola tshenyo e e boitshegang mo masimong a dijalo. Gangwe fela fa mmugodimo o latlhegile, go batla go sa kgonege go o bona gape. Le mororo tshomarelo ya mmu e dira karolo ya lenaneotlhabololo la pakatelele la polase, bantshakuno ba tshwanetse ka dinako tsotlhe ba bo bo le malalaalaotswe go lemoga dikgaolo tse kgonagalo ya kgogolego e ka diragalang teng. Matlakadibe o o solofelwang mo polaseng ya gago ga a ka ke a bonelwa pele. Fa o lemoga lefelonyana le le bokoa mo konturung, le baakanye ka bonako jo bo kgonagalang. Seo e ka nna tšhono e e gaisang ya gago go thibela tshenyego mo mmung o o botlhokwa.
Dira taolo mofero ya gago ka nako e e maleba
Mo taolomoferong e e nonofileng mo mmiding, sekao, go na le dibolayatlhatshana dingwe tse di siameng (dikuno tsa taolomofero ya sekhemikale). Tota fela le sona sebolayatlhatshana se se siameng se ka dira ka katlego fela fa maemo a se siametse. Ka jalo dirisa tšhono mo letsatsing le maemo a loapi a siameng mme e seng mo letsatsing le phefo e fokang kgotsa mo kemong e e mogote le e e omileng. Bogolo (size) jwa mofero le jona ke jwa botlhokwa thata go fitlhelela taolomofero e e atlegileng. Mo makgating a le mantsi, go botoka fa mefero e sa le mebotlana. Diketelo tsa masimo gangwe le gape, go ela tlhoko dikgatotswelelo tsa dijwalo mmogo le mefero, ke tsa botlhokwa thata. Se beele sepe ka moso! Laola mefero e sa le menana.
Sireletsa dijwalo tsa gago mo disenying
Ditshenekegi, jaaka sebokophetlhi sa mmidi, di ka tlhola tshenyo e e boitshegang mo mmiding le mabeleng. Tshenyo e ka dirwa mo pakeng e khutshwane thata. Dipalo tse di kwa godimo tsa dibokwana tsa ditshenekegi mo faneleng ya semela di ka laolwa ka botlalo ka dibolayasenyi dingwe. Fela le gale, fa dikgatotaolo di busediwa morago, mabaka a go retelelwa a siame thata. Lebaka ke gore, fa sejwalo se golela mo kgatong e e latelang kgotsa bogolo jwa sebokwana bo oketsega, sesala ke gore khemikale ga e nne le nonofo e e lekaneng. Tekolo ya dijwalo e e tletseng le ya gangwe le gape e tlaa thusa go tlhoma nako e e gaisang ya taolo ya disenyi e e atlegileng.
Letlhathobo le le gaisang la dijwalo tsa gago
Dijwalo dingwe di tlhoka go rojwa sentle ka nako e e maleba. Mo lebakeng la matonkomane, ditatlhegelo tsa thobo kgotsa boleng jwa dithoro tse di sa tlhokafaleng di diragala fa thobo e ka dirwa pele kgotsa morago ga nako thata. Go swetsa ka letlha la thobo le le gaisang la dijwalo, montshakuno o tshwanetse go tseela tlhogong maemo a le mmalwa jaaka mmala wa peo, maemo a tlelaemete le tlhagelelo ya malwetse. Mo lebakeng la dinawa tsa soya, thanthanyego ya maungo e ka diragala mo tshimong jaaka dijwalo di butswa. Fa di ka robiwa morago thata montshakuno o ka itemogela ditatlhegelo tsa thobo tse di kwa godimo ka ntlha ya thanthanyego. O se ka wa bo wa fosa tšhono ya go bona thoro nngwe le nngwe ka nako ya thobo.
