﻿MOTLATSA-MOKHANSELE O MONTSHWA GO NETEFATSA KATLEGO YA KOPANO YA DITHEO TSE PEDI TSA THUTO E KGOLO






Issued by Litha Nyhonyha and Shamiela Letsoalo, 7 May 2004

Yunibesithi ya Bokone-Bophirima e kgata tema gompieno, jaaka e le ya ntlha mo diyunibesithing tse di kopantsweng go bega motlatsa-mokhansele wa yona wa ntlha e le wa leruri. Go thapiwa gagwe go itsesitswe kwa kopanong ya khansele ya yunibesithi kwa Potchefstroom. Ngaka Theuns Eloff, yo o nang le rekoto e e kwa setlhoeng ka ga seabe sa gagwe mo kagosesweng ya Aforika Borwa, o ne a thapiwa jaaka motlatsa-mokhansele wa ntlha wa Yunibesithi ya Bokone-Bophirima.

Tsela ya go thapa motlatsa-mokhansele e simolotse ka 12 Mopitlwe 2004 fa khansele e ne e sweetsa go tswela mo phatlalatseng le go tsaya tsela e e bonwanang ke botlhe. Komiti ya phuruphutso e e neng e akaretsa maloko a le marataro a khansele, a emetse bakgatlegedi ba ba farologaneng, e ne ya tlhophiwa, mme bone ba tlhopha Leaders Unlimited - Korn/Ferry ya Boditshabatshaba jaaka feme e e ka ba phuruphutshetsang go thusa komiti.

Morago ga go fitlhelela ditumalano ka ga porofaele ya maemo a, komiti e ne ya tsena mo letsemeng la go phatlalatsa maemo a ka kwa ntle go tloga ka 4 go ya go 8 Moranang mme taletso ya batlhophiwa go tswa go bakgatlhegedi botlhe le batsalani le yunibesithi e ne ya ntshiwa.

Ka nako ya makgaolakgang a la 19 Moranang, dikopo di le 24 di ne di amogetswe mme bontlhopheng ba le bararo ba ne ba tlhopiwa, mongwe wa bona e le yo o neng a dirile kopo le ene. Leaders Unlimited yona e ne ya supa bontlhopheng ba le lesome ka tsela ya go tlhola-pele kgatlhanong le ditlhokego tsa minimamo jaaka di totobaditswe mo porafaeleng ya tiro e.

Go ya ka tshiamelo ya melao ya Foramo ya Setheo (Institutional Forum) e gakolotse khansele ka go tlhopha bakopatiro. Khansele e sweeditse ka la 12 Mopitlwe go kopa gape le Senoto go gakolola Khansele mo go tlhopheng bathapiwa. Foramo ya Setheo le Senoto di ne tsa fetisetsa kgakololo ya bona ka 26 Moranang go komiti ya phuruphutso.

Komiti ya phuruphutso e konoseditse ka 28 Moranang lenane la bakopatiro ba le robedi go lalediwa go tsenela diteko tsa Tlhatlhobo ya Boitshwaro jwa Baetaledipele (Leadership Behavioural Assessment tests). Diteko tse di tlhomamisitse gore a ba fitlhelela maemo a bokgoni mo boeteledipeleng a a solofetsweng, gore go tle go khutshafadiwe lenane la bakopatiro go ba le batlhano fela go tsenela dipotsolotso. Phanele ya dipotsolotso e ne e akaretsa maloko otlhe a komiti ya phuruphutso, ba thusiwa ke Moporofesara M W Makgoba le Moporofesara D Ncayiyana jaaka balekane ba batlhatlhobi ga mmogo le Leaders Unlimited. Kaelo e e tseneletseng e ne ya dirwa.

"Mo godimo ga kgakololo ya komiti ya phuruphutso le morago ga dipuisano tse di tseneletseng, Khansele e ne ya sweetsa go thapa Ngaka Theuns Eloff jaaka motlatsa-mokhansele wa ntlha wa Yunibesithi ya Bokone-Bophirima", go rialo Rre. Litha Nyhonyha, modulasetilo wa Khansele.

"Mo go thapeng Ngaka Eloff, maatla a kopano ya ditheo tsoopedi a gateletswe thatathata. O tlisa gape go tswelelapele go go tlhokegang thata mo tseleng e. Go botIhokwa thata gore batho botlhe ba tsene mo temeng e go dira gore Yunibesithi e dire ka nonofo. Maikaelelo magolo ke go dira Yunibesithi ya Bokone-Bophirima e e tshwanang e le nosi, yunibesithi e e atlegileng mo Aforika Borwa, e e ikepetse mo Aforika mme e kgona go gaisana mo lefatsheng ka bophara."

