YBB Puk e ipela ka bobedi jo bo fitlhileng kwa makgaolakgannyeng mo kgaisanong ya botlhami






Potchefstroom  Baithuti ba babedi ba tiro ya Go Tlhama Ditshwantsho ka Khomphiutara ba Khamphase ya Potchefstroom ba fitlhile kwa makgaolakgannyeng mo Kgaisanong ya ngwaga ono ya Diawate Tsa Kgaisano ya go Tlhama Ditshwantsho ka Khomphiutara ya Setheo sa Botlhami sa SABS.

 Dikgopolo tsa botlhami tsa baithuti ba ngwaga wa bofelo e leng Freda Raubenheimer le Sophia Strydom di dirile gore le bone ba fitlhe kwa makgaolakgannyeng a kgaisano eno e mongwe le mongwe a e tswelang pelo.

Ke ngwaga wa bosupa ka go tlhomagana baithuti ba Khamphase ya Potchefstroom ba ntse ba fitlha kwa makgaolakgannyeng a kgaisano eno. Kgopolo ya ga Freda, e e dirileng gore a fitlhe kwa tikologong ya bofelo ya kgaisano eno, ke ya letshwaokgwebo la selegae le le ka dirisediwang go solegela molemo dikgwebo-potlana tsa selegae le mekgatlho e e sa direng diporofete. Sophia o ile a tlhoma thulaganyo e e kgonang go itsetsepela ya go katisiwa ga baithuti ba ntse ba le mo tirong e e ka kgonang go solegela molemo le go tlhabolola intaseteri ya botlhami.

Setheo sa Botlhami sa SABS se simolotse Sekema sa Diawate Tsa Phitlhelelo ka 1987. Se farologana le diawate mmogo le dikgaisano tse dingwe tsa mo Aforika Borwa ka gonne ke sa mofuta wa sone fela mo nageng ya rona e bile se na le ditiro tsa mefuta e e farologaneng go gatelela thata botlhami jwa kgwebo le boeteledipele mmogo le botlhami jwa maemo a a kwa godimo. Maina a baithuti ba mefuta yotlhe ya botlhami, e ka tswa e le jwa kerafiki, jwa mo teng ga kago, jwa intaseteri, jwa feene, jwa diseramiki, jwa matsela a a logilweng, jwa dibenyane kgotsa jwa go tsaya ditshwantsho tsa kgwebo, a ka nna a tlhophiwa ke ditheo tsa bone gore ba tsenele kgaisano eno.

Ba ba fitlhileng kwa makgaolakgannyeng a kgaisano eno ba nna le seabe mo dikokoanong tsa go tlhabana botlhale le diseminara. Mo ngwageng ono, go ne ga etelwa ditheo tse di di gogang kwa pele tsa botlhami le tsa thekenoloji mme ba ba fitlhileng kwa makgaolakgannyeng ba ne ba nna le seabe mo go neeleng dipuo le go tshwara metlotlo ka dikgang tsa konokono mo tirong ya botlhami.

Gape, lenaneo leno le ba naya thono e e molemo ya go kopana le ba e kileng ya nna bafenyi, batho ba ba tlhomologileng mo intasetering, le ba go ka diregang gore e nne bathapi ba bone mmogo le ba bobegadikgang. Kgaisano eno e tshwarwa ngwaga le ngwaga ka Letsatsi la Baa.




______________________________________________________________________________________
Freda Raubenheimer le Sophia Strydom ka nako ya Kgaisano a Ngwaga Ono ya Diphitlhelelo Tsa Botlhami.

