Go sirololwa ga setshwantsho se se takilweng sa ga Eloff yo maemo a gagwe a tsewang ke mongwe o sele.






Potchefstroom  Ditiro tsa ngwaga ono o moa mo ofising ya mookamedi wa khamphase di ne di akaretsa tiragalo nngwe e e neng ya ratwa ke botlhe ya go sirololwa semmuso ga setshwantsho se se takilweng sa mookamedi wa setheo wa pele.

Setshwantsho se sentle seno se se takilweng sa ga Dr Theuns Eloff, e leng mookamedi wa bosupa wa setheo wa University for Christian Higher Education (PU for CHE) ya pele yo gone jaanong e leng Motlatsa-Mothanselara wa Yunibesiti ya Bokone Bophirima ( e ntha), sone mmogo le tse dingwe tsa baokamedi ba bangwe ba setheo ba ba rataro ba pele, di mo leboteng la lefelo la boamogelo jwa ofisi ya mookamedi mo boalong jwa bobedi jwa Joon van Rooy Building. Maloko a setlhopha sa Botsamaisi sa Setheo (Institutional Management [IM]) sa NWU ba ne ba le teng fa Porofesa Annette Combrink, e leng mookamedi wa gone jaanong wa setheo a ne a sirolola setshwantsho se se takilweng seno. O ne a thusiwa ke Porofesa Maritte Lowes, Motlatsa-Mothanselara: wa Tsa Thuto.

Porofesa Combrink o ne a tlotla ka bokhutshwane ka mookamedi mongwe le mongwe wa pele wa setheo. Porofesa Ferdinand Postma, yo e neng e le mookamedi wa setheo go simolola ka 1919 go fitlha ka 1959, o ne a tlhalosiwa jaaka mongwe yo o nnileng le seabe se segolo mo go tlhomiweng ga Yunibesiti. O ne a iteka ka natla go kolekela setheo madi, mme fa molemirui a ne a sa kgone go koleka madi, o ne a ntsha kgomo. Leno ke lone lebaka la go bo go na le letlole le le bidiwang cow fund.

Morago ga gagwe, Porofesa Joon van Rooy o ne a nna mookamedi wa setheo dingwaga di le tharo. O ne a tlhatlhangwa ke Porofesa J Chris Coetzee, yo o neng a nna modulasetulo wa mookamedi wa setheo dingwaga di le lesome.
Morago ga gagwe go ne ga tla Porofesa Hennie Bingle. Leina le a neng a retwa ka lone e ne e le Klipoog  o ne a le bosilo thata e bile e le motlhatlheledi yo o nang le bokgoni. Bingle o ne a nna moeteledipele wa setheo go simolola ka 1964 go fitlha ka 1977.

Porofesa Tjaart van der Walt, e leng moithutabodumedi, o ne a fudugela mo ofising ya moeteledipele wa setheo mme a etelela yunibesiti pele go fitlha ka 1988. O ne a tlhatlhangwa ke Porofesa Carools Reynecke, yo o neng a etelela pele go simolola ka 1989 go fitlha ka 2001.

Porofesa Combrink o ne a re leina le Reinecke a neng a retwa ka lone, e leng CSS le raya Carools said so. Le ene o ne a le bosilo, mme o ne a kgona go dira gore ditiro tsa go dira patlisiso tsa Yunbesiti di gatele pele. Dr Eloff e ne e le moeteledipele wa setheo go simolola ka 2002 go fitlha ka 2003  lobakanyana fela pele ga go tlhongwa Yunibesiti e ntha.

Dr Eloff o ne a lebogela porofesa Combrink go bo a mo diretse tironyana eno le go bo go na le sengwe se a tla gopolwang ka sone. Go ya ka ene, go botlhokwa gore dilo tsa nako e e fetileng di se ka tsa lebalwa mme e seng seo fela, se se botlhokwa gape ke gore go na le tirisanommogo. Setshwantsho sa gagwe se se takilweng se ne sa dirwa ke Diane McLean. Bontsi jwa ditshwantsho tsa nako e e fetileng tse di takilweng tsone di ne tsa dirwa ke Fleur Ferri, yo jaanong a rotseng tiro.



