Setlhopha sa Baroki ba kwa Promosa ba a thusiwa






POTCHEFSTROOM  Setlhopha sa basadi ba baroki ba kwa Promosa ba golela pele ka boetapele jwa setlhopha sa babatlisisi ba mo Yunibesiting ya Bokone-Bophirima(YBB) ba mo Khampaseng ya Potchefstroom le ka dikabelo tsa madi go tswa mo morafeng.

Setlhopha sa mo Promosa sa Arts and Crafts  ke karolo ya porojeke ya Holding Hands go ka thusa basadi go bona bokgoni jwa go ka simolola go itirela lotseno.

YBB ka 2001, ka boetapele jwa ga ngk Annamarie Kruger, moitse serutwa wa tlhogo ka mo Fakalthing ya Bosaense jwa Boitekanelo mo karolong ya patlisiso ya Tiro ya Go thibelela le Go ema nokeng, ba ne ba simolotse ka porojeke ya Flagh (Farm Labour and General Health) ka mo dipolaseng mo tikologong ya Ventersdorp.  Diporojeke tsa Holding Hands- le tsa Lifeplan (Life Inequalities amongst Females addressed by means of Purposeful Living And Nutrition interventions) di ile tsa tswelela mo go tsa pele.

Bernina ka mo Potchefstroom ba abetse dimathini tse tlhano tsa go roka le tse tharo tsa overlocker go setlhopha sa Promosa sa Arts and Crafts.  Setlhopha se sa basadi ba amogetse katiso dikgwedi tse thataro tse di fetileng kwa holong ya kereke ya Gereformeerde mo ba ileng ba kopana gabedi ka beke go roka. Basadi ba ba betla dilo tse di farologaneng jaaka dijase tsa kapeso tsa bana ba dikerehe le ba dikolo tse di kwa tlase, dikgetsi tsa sekolo, ditafoletuku le tse dingwe tse di ka hirisiwang kwa manyalong mme gape ba ldira ditiro tsa go loga.

Mong wa Bernina mo Potchefstroom, moh Christi Niesing, a re ke tiro ya tlotlo go ka dirisana le YBB ka mo porojekeng ya Holding Hands  le go bona gore go diragala diphetogo ka mo maphelong a basadi ba ba neng ba ntse ba se na lotseno la sepe.

Moh Liezel van Niekerk, mmatlisisi wa Fakalthi ya Bosaense jwa Boitekanelo mo karolong ya patlisiso ya Africa Unit for Trans-disciplinary Health Research (AUTHeR), a re porojeke e e tshwanang le e mo batho ba rutiwang go itirela lotseno lo tlisetsa bone tsholofelo gape mme le ba kopantsha ka mowa wa tirisanommogo.

Basadi ba dula ba katisiwa go tokofatsa bokgoni jwa bone mme motlhatlheledi wa mo YBB o dirisana gaufi le setlhopha. Le fa go le jalo re tlhoka thuso e kgolo go tswa mo merafeng mme jaanong jaana re batla phaposi mo basadi ba ka tswelelang ka tiro ya bone, ga bua moh Van Niekerk.

Mongwe le mongwe yo a ratang go itse go feta ka ga porojeke e a ka ikopantsha le moh Van Niekerk kwa (018) 299 2461.



Basadi ba Promosa Arts and Crafts ba dira ka maatla go roka dijase tsa kapeso tsa kerehe. Go tswa mo molemeng go na le bomme Tricha Locke, Joyce Matsietso (Motlhatlheledi wa YBB), Susanna van Wyk le Ria Moos.



Mong wa Bernina, moh Christi Niesing, o ne fana ka mothini wa overlocker go setlhopha sa Promosa Arts and Craft. Fa re bona bomme Susanna van Wyk, Joyce Matsietso (Motlhatlheledi wa YBB), Tricha Locke, Ria Moos, Christi Niesing le Liezel van Niekerk (mmatlisisi wa AUTHeR).


