Katologo ya diranta tsa dimilione di le pedi mo khampaseng ya Mafikeng.






Katologo ya diranta tsa dimilione di le pedi mo khampaseng ya Mafikeng.

MAFIKENG  Gautshwane le kago ya Boitekanelo ba diphologolo le diruiwa go baakantswe lebala go aga kago e ntha. Mo lebaleng le go ya go agiwa Sentara ya diranta tsa dimilione di le pedi. Ke Sentara ya Disaense tsa Tiriso Phasalalo le Teknoloji ya teng. Ke tlhabololo e e tlhagafatsang le e e neng e tlhokega thata mo khampaseng ya Mafikeng. (SDTPTV /  Ka Seesemane: Centre for Applied Radiation Science ang Technology  CARST)

Porojeke  ya go aga kago e, e simolotse semmuso fa go ne go tshwerwe kopano ya go peta mmu wa motheo mo go yang go agelwa teng. Kopano e e ne e tshwerwe fa letsatsi la somamabedingwe le tlhola kgwedi ya Seetebosigo 2007. Bathapiwa ba le bantsi ba ne ba tlile  mo kopanong e, bontsi jwa bone e ne e le ba ba neng ba tswa mo Disaenseng tsa Bolemirui le Teknoloji. Go ne go tlile le ditokololo tse dikgolo, mo go bone go ne go na le Morektoro wa khampase ya Mafikeng Moprof. Dan Kgwadi, modini wa fakalti Moprof. Michael McPherson, motsamaisi wa sentara Moprof. Van der Linde le motsamaisi wa Tlhaeletsano le Kgwebo Rre Sam Motabogi.

Moprof. Van der Linde o ne a eme kopano ka mafoko. O ne a lebogela batsamaisi ka matsapa a  ba ileng ba a tsaya go tsweletsa porojeke e go aga sentara e e neng e batlega. O ne a nopola mo kuranteng mo go neng go tlhalosiwa gore Aforika Borwa mo dingwageng tse somamabeditlhano tse di tlang e ya go tsholetsa tiriso ya motlakase go nna gabedi ga o o dirisiwang jaanong. Diphesente di le 25 tsa motlakase o tla tswa mo tirisong ya motlakase wa kerene.  Go raya gore diyunibesiti di tshwanetse tsa katisa baithuti mo kitsong e gore ba kgone go tsenelela intaseteri e. Moprof. Van der Linde o tshepisitse botlhe gore o tla tsaya seabe go atolosa sentara e ya SDTPTV / CARST gore e nne e e kumang.

Mo puong ya gagwe Moprof. McPherson o rile SDTPTV / CARST e ya go nna le seabe se segolo mo fakalting ya bone. Ba ya go  boelwa ke madi go tswa mo baithuting le mo tirisong ya dilaboratorio ke diintaseteri tsa ka kwa ntle ga yunibesiti. O ne a re seabe se segolo sa senatara ke kitso e e tseneletseng e e tlisiwang ke bathapiwa ba fakalti. Go atolosa sentara go tla tshwanela go bonwe bathapiwa ba bangwe gape.

Morektoro wa khampase Moprof. Kgwadi o ne a re, go aga ga kago ya SDTPTV / CARST ke sesupo sa gore khampase e tlhabololwa ka potlako. Go aga ga sentara e tla nna porojeke e e botlhokwa ya go atolosa khampase mo dikgweding tse somerobedi tse di tlang. Diporojeke tse dingwe di akaretsa, go agiwa ga bodulo ba baithuti kgato ya bonne, go agiwa ga sentara ya baithuti, e go tlotliwang thata ka ga yone le katoloso ya mafelo a katiso le boitapoloso. 

Sentara ya SDTPTV  / CARST e tla agiwa ka ditlhakore tse nne, ya ntlha yone e ya go bitsa diranta di le dimilione tse pedi. Batsamaisi ba setse ba dumetse go reka didirisiwa tsa tlhwatlhwa ya milione le hafu ya diranta. Diintaseteri tsa sephiri le tsone  di tla abela milione le hafu ya diranta. Fa go ya ka dithulaganyo tlhakore ya ntlha e tla fetswa Ngwanatsele wa 2007. Ditlhakore tse dingwe di tla agiwa mme tsa wediwa mo dingwageng tse pedi tse di latelang.



:
Go tswa molemeng Moprof. Dan Kgwadi, Morektoro wa khampase ya Mafikeng, Moprof. Michael McPherson, modini wa fakalti, Disaense tsa Bolemirui le Teknoloji ya teng, Moprof. Hendrik van der Linde motsamaisi wa Sentara ya Disaense tsa  Tiriso ya Phasalalo le Teknoloji ya teng (SDTPTV / CARST) le mmengaka dr. Nandi Bumba wa SDTPTV / CARST  le ene.

