Beke ya Porofense, 07  11 Lwetse 2009

Tlhamo ya Palamente ya rona
Palamente ya Aforika Borwa e na le Dintlo di le pedi: 
Kokoano Bosethaba (NA), e e nang le maloko a le 400, le
Khansele ya Bosethaba ya Diporofense (NCOP), e e nang le maloko a le  90

Khansele ya Bosethaba ya Diporofense le mosola wa yona

Molaotheo wa Aforika Borwa o dira gore Khansele ya Boetshaba ya Diporofense (NCOP) e netefatse gore dikgatlhego tsa diporofense di tsewa tsia mo lephateng la boetshaba la puso. Seno se fitlhelelwa ka go tsaya karolo mo tsamaisong ya peomelao ya boetshaba le ka go nna le foramo ya bosethaba e mo go yona merero ya sethaba e e amang diporofense e sekwasekwang.   
Mosolamogolo wa NCOP ke go ngangisana, go fetisa molao le go ela tlhoko (lebelela) ditiro tsa puso. 
NCOP e emela diporofense go netefatsa gore dikgatlhego tsa diporofense di tsewa tsia mo lephateng la boetshaba la puso.
Mosola wa NCOP ke go netefatsa  gore dintlha tsa bosethaba tsa puso ya porofense le tsa pusoselegae di elwa tlhoko. 


Beke ya porofense ya NCOP ke eng?

NCOP e tlhomile Beke ya Porofense go netefatsa gore diporofense di tshameka karolo e e botlhokwa mo ditirong  tsa Palamente  ya bosethaba.
Mo go yona beke e, baemedi ba diporofense mo NCOP le balekane ba bona ka kemo ba diporofense ba etela baagi gore ba  netefatse  gore ba bona tshedimosetso ka tlhamalalo ka ga ditlhoko le dikgwetlho tsa batho.
Beke ya Porofense e dira gore Molaotheo o diragatswe, ka go gapeletsa gore NCOP e netefatsa gore dikgatlhego tsa diporofense di tsewa tsia mo lephateng la bosethaba la puso.
Beke ya Porofense e netefatsa gore baemedi ba diporofense mo NCOP ba nna ba itse ka ditlhabololo, ga mmogo le dikgwetlho tse di lebaneng diporofense tsa bona. 

E neela baemedi thono ya go dira mmogo le diporofense le go bega gape ka ga ditiro tsa bona mo NCOP ka maikaelelo a go bona ditalelo tse diwa ka ga merero e e tshwanetseng go nna karolokgolo ya morero wa lenaneo la bosethaba. 
Beke ya Porofense e dira gore go nne le foramo e mo go yona go refosanwang le go abelanwa dikakanyo tsa go tlisa ditirelo le dikgwetlho tse di lebaganeng le morero wa diporofense wa go diragatsa maikarabelo a tsona.  
Gape e tswelela go tlhama thono ya Palamente le diporofense go dira mmogo mo go batleng ditharabololo le go tla ka ditsela tse di nthwa tsa go diragatsa ditlhoko tsa batho ba Aforika Borwa.

Go tla diragala eng ka nako ya Beke ya Porofense?

Mo Bekeng ya Porofense, baemedi baleruri ba porofense e nngwe le e nngwe ba tla kopana le maphata a a farologaneng a diporofense tsa bona, go tsenyeletsa:
dipuso tsa diporofense - Ditonakgolo, le Maloko a Khuduthamaga (MECs) , ga mmogo le Mafapha a bona.
Dipeomola tsa diporofense le Dibui tsa tsona, 
Dimedigolo le Modulasetilo wa Dikomiti, le 
Baamegi ba bangwe; jaaka baeteledipele ba setso, di NGO, di CBO, e Lekgotla la Dipuso Selegae la Aforika Borwa (SALGA). 

Baemedi ba diporofense mo NCOP, le balekane ba bona ka kemo ba diporofense, ba tla ela maemo tlhoko ka go etela baagi e le go netefatsa. 

Baemedi gape ba tla etela diporojeke tse di tsentsweng tirisong ke puso ya bosethaba le ya porofense ka bobedi mo diporofenseng tsa bona.




Beke ya Porofense e tla tswela molemo jang porofense ya gago?

Ka diketelo tsa netefatso ka nako ya Beke ya Porofense, baemedi ba diporofense tsa NCOP di tla bona tshedimosetso ka tlhamalalo ka ga ditlhoko tsa batho mo diporofenseng. 

Beke ya Porofense e kgontsha NCOP go nna le seabe mo tswelelopeleng ya puso ka go netefatsa gore matshwenyego a porofense le a selegae a tsewa tsia mo go direng dipholisi tsa bosethaba. 

E tswelela go kgontsha dipuso tsa porofense, selegae, le bosethaba go dira mmogo ka katlego le nonofo gore di tle di netefatse tliso ya ditirelo e e atlegileng.    

KE KHANSELE YA GAGO YA BOETSHABA!
KE PALAMENTE YA GAGO!
TSAYA KAROLO MO GO YONA!



