BEKE YA BOTSAYAKAROLO JWA SETŠHABA 9 - 15 NGWANATSELE
[melaetsa e megolobotlhoka]
Beke ya Botsayakarolo jwa Setšhaba ke thulaganyo ya go kgontsha mmuisano le dikamano magareng ga puso le batho. E tlamela puso ka tšhono ya go tlhaeletsa Lenaane la yone la Tiro le kgatelopele e e nnileng teng. E tsweletsa botsayakarolo le bosemphatho magareng ga setšhaba le puso. 
Beke ya Botsayakarolo jwa Setšhaba e neela puso tšhono ya go amana le baagi, go arabela ka ga go tsenya tirisong ga lenaane la tiro. 
Kamano e e tlhamaletseng magareng ga makala a mararo a puso (puso ya bosetšhaba, porofense le ya selegae) le setšhaba e tlhomamisa gore puso e ikgolaganya le batho ba yone.
Mo bekeng e baagi le puso ba tla golagana ka diforamo tse di tlhomilweng tse di jaaka dikomiti tsa dikgaolotlhopho le dikopano tsa makala go tlhagisa dikgwetlho le go abelana ka ditharabololo. 
Kgatelelo e tla nna mo go tsosoloseng go itshepa ga baagi jaaka batho ba ba ka tlang ka ditshweetso mmogo le puso e e ba tshegetsang ka go tsaya karolo ka matlhagatlhaga. 
Nomoro ya ga Moporesidente e e Kkgethegileng e tlhagisitswe jaaka mokgwa wa tlaleletso go kgontsha tlhaeletsano magareng ga puso le batho gammogo le go potlakisa thebolelo ya ditirelo. 
Re rarabolola dikgwetlho tse di setseng di supilwe mo dikamanong le dithutopatlisisong tse dingwe tse di farologaneng. 
Re nnile le kgatelopele e kgolo mo dingwageng di le 15 tsa kgololesego tse di fetileng, go sa ntse go na le dikgwetlho tse dintsi. 
Peresente ya malapa a a nang le phitlhelelo ya metsi e oketsegile go tswa go 61.7 ka 1994 go fitlhelela go 91.8% ka Mopitlwe 2009, go tlhokega go dira go le gontsi go atolosa tirelo kwa baaging ba ba setseng.
Re gaufi le go fitlhelela maikaelelo a rona a go fedisa mokgwa wa dikgamelo tsa boithusetso mo bonnong jo bo rulagantsweng sentle, letlha le le ikaeletsweng la phitlhelelo ya botlhe ke 2014. 
Re sa ntse re tshwenya ke maemo a a kwa godimo a botlhokatiro, bohuma, tlhaelo ya tlhokomelo ya boitekanelo le tlhabololo e e kwa tlase, bogolosegolo kwa metsemagageng le kwa baipeing. 
A re diriseng diforamo tseno go amana le baemedi ba batho mme re tileng go senya dithoto le didiriswa tse di ikaeletseng go ba thusa.
Re tshwenyegile ka tiegiso ya ditirelo tse di solofeditsweng baagi; re a itse gore fa re dirisana mmogo mo dikgolaganong tsa ditogamaano re ka dira go le gontsi ka bonako.
“Fa re dirisana mmogo, re ka fitlhelela go le gontsintsi”
