Lokwalokhutshwe la Bakhuduthamaga











Setlhopha sa Baokamedi sa SATI se ne sa tshwara kokoano ya sone ya bošeng jaana ka 14 Tlhakole 2009. Tshobokanyo ke eno fa tlase ya dilo tsa konokono tse go neng ga tlotlwa ka tsone.



Kafa SATI e rulagantsweng ka gone le ditlhopho tsa 2009



Mo kokoanong eno, go ne ga tlotlwa thata ka Molaotheo le kafa Setheo se rulagantsweng ka gone, mo nakong eno le mo isagweng. Fa nako e ntse e tsamaya, maloko a tla itsisiwa ka diphetogo tse go tshitshintsweng gore di dirwe mo Molaotheong, le taletso ya gore go tlhagisiwe maina a mo go one go tla tlhophiwang ba ba ka nnang maloko a Setlhopha sa Baokamedi mme mo bogautshwaneng, go tla ntshiwa kitsiso ka dikomiti tse di tlileng go dira mo dingwageng tse pedi tse di tlang.



Moputso o o Abiwang ke SATI wa Thanolo e e di Gaisitseng Tsotlhe



Go ne ga felelediwa dintlha malebana le ditlhopha le melao ya Moputso o o tlileng go abiwa mme ka Mopitlwe, go tla romelwa ditaletso tsa gore go tlhagisiwe maina a mo go one go tla tlhophiwang batho ba ba ka abelwang moputso ono. Gakologelwang gore ga go tlhole go na le moputso wa kakaretso mme meputso e e abelwang batho ka bongwe e tla bo e le ya ditlhopha tse di latelang: padi, ditlhamane, dibuka tsa bana, tirelo ya boranodi le dibukantswe. Maloko a rotloediwa go anamisa kitsiso ka Moputso ono mmogo le go dira taletso ya gore go tlhagisiwe maina a baamogela-ditirelo ba rona le makoko a mangwe a a kgatlhegelang go ka tlhophelwa moputso ono.



Diawate di tlile go tshwarwa ka Lwetse 2009 (mo e ka nnang ka Letsatsi la Boditšhabatšhaba la Thanolo).



Dibasari



SATI e abetse baithuti ba le batlhano dibasari tse di jeleng bokana ka R25 000 tsa ngwaga wa dithuto wa 2009. Madi ao maloko a a ntshetsang Letlole la go Tsweletsa SATI Pele a dirisediwa go thusa baithuti ba go ka bong go ile ga direga gore ba se ka ba kgona go tsenela dithuto tsa boranodi. Go ne ga dirwa tumalano ya gore go simolola mo ngwageng o o tlang, go tla amogelwa dikopo tsa baithuti ba ngwaga wa ntlha.



Maloko a gakololwa gore dikopo tsa go newa dibasari tsa dikhoso tse di khutshwane le tsone di ka nna tsa akanyediwa.



Dikomiti



Komiti ya bokatisi e tshwaragane le go rulaganyetsa go dira patlisiso ya go bona gore maloko a rona a tlhoka katiso ya mofuta ofe, segolobogolo malebana le dikhoso tse di khutshwane tsa boranodi. Dipholo tsa yone di tla romelelwa maloko mo bogautshwaneng.



Komiti   ya   Setsha   sa   Inthanete   e   begile   gore   go










lebeletswe gore Setsha sa Inthanete sa SATI se se weditsweng ka puo ya Se-Aforikanse se bo se tsentswe mo tirisong mo magareng a Moranang. Thanolo ya sone e tsweletse pele ka Setswana le ka Sexhosa, mme e bonya tota. Maloko a a dirang ka dipuo tse dingwe tsa semmuso a rotloediwa gore a ithaopele go thusa go tlhomamisa gore Setsha sa Inthanete se kwalwa ka dipuo tseno tsotlhe.



Tetlelelosemmuso



Ka maswabi, tumalano e SATI e neng e e dirile le NAATI (the Australian National Accreditation Authority for Translators and Interpreters), ya go naya baranodi ba ba dirang ka dipuo tse di sa buiweng ke bontsi tsa dinaga di sele tetlelelosemmuso e khutlisitswe ka ntlha ya setlhopha se seša sa botsamaisi sa NAATI mmogo le ditlhwatlhwa tsa ditlhatlhobo tse di itsang setlhopha seno go tswelela ka tumalano eno.



Kgaisano ya 2010 ya Sejana sa Lefatshe sa Kgwele ya Dinao



Maloko a gakololwa gore go tlile go nna le tsebe e e kgethegileng mo Setsheng sa Inthanete sa SATI e e nag le lenaane la dinomore tsa go ikgolaganya le batoloki ba ba tlileng go ithaopela go dira tiro eno ka nako ya Sejana sa Lefatshe. Fa e le gore ga o ise o ntshe dintlha tsa gago tsa go ikgolaganya le wena mme o batla gore leina la gago le nne teng mo tsebeng eno, tsweetswee ikgolaganye le ofisi ya SATI ka bonako joo o ka kgonang ka jone.



Kokoano e e latelang ya Setlhopha sa Baokamedi e tlile go tshwarwa ka Seetebosigo 2009.





Pegelo ya kopano ya bofelo ya Bakhuduthamaga
 
Bol. 4 Nom. 1
 

 

 

 
Tlhakole 2009
 

 

 

 

 

 

 


