zulu.2954.zonk
BONA ZULU June 2008
UMCULOWE-POP
Udumile phesheya kwezilwandle kanti iphimbo lakhe lijwayelekile ezigidini ngezigidi zabantu baseSA, kodwa siqale manje ukwazi ngoZonke Dikana onethalente elimangalisayo. Indaba nguDoug Gordon, izithombe nguPeter Whitfield
‘Ngizodlondlo-
bala eSA’
UBIZWA nge “newcomer of the year” uZonke Dikana, kodwa iphimbo lakhe balijwayele ababukela iTV nabalalela umsakazo. “Sengilungele ukuphumela obala. Sekuyisikhathi sami sokuqhakambisa ithalente lami,” kusho yena emamatheka.
Iphimbo lale ntokazi eneminyaka engu-28 liyezwakala emucwini kaThebe othi Groover’s Prayer nakwiCoca-Cola Football Stars ye-e-tv ne-African Magic yeSupersport nakwezinye izikhangiso zemisakazo.
Wavula inkundla ngenyanga edlule kwi-show yeStars Of Mzansi – eyayibizwa ngeDuku Duku Awards – uZwai Bala ehola i-orchestra ngalolo suku.
UZonke ubuye acule neBongo Maffin uma uThandiswa engekho.
Manje udume ngezingoma zakhe ezithi Life, Love And Music. Uthi wangena kule mboni yomculo engazelele.
UZonke wakhulela ePort Elizabeth kanti ubalwa emadodakazini amahlanu acula njengezingelosi. Izivivinyo zika-matric wazibhala umndeni wakubo usuhlala eBloemfontein.
Odadewabo abadala babenza izifundo zomthetho kodwa uZonke ekhombisa ukuba nothando lokulalela izingoma zezingwazi ezinjengoMarvin Gaye noNatalie Cole.
“Ngifuze ubaba ngokuthanda umculo. Wayecula i-jazz ehlale ehamba kodwa kuthe kuqambe kufika isikhathi sokuba ngihleleke kahle emculweni wabe engasekho eduze kwami ukuze angeluleke. Ngiqale ukucula engashadile nomama wami,” kusho yena.
NGALESO sikhathi, uVuyisile Dikana wayehlala eGoli eshade no-Anneline Malebo owayecula phambili kwiJoy.
UZonke wabuye wathatha ikhefu emculweni ukuze enze i-diploma yakhe kwiHuman Resources. “Kodwa ngangingathandi ukwenza iHR,” kusho kuvuma yena.
“Ngangifuna ukwenza izifundo zomculo enyuvesi yaseWits. Mina nomama sagibela ibhasi saya eGoli siyobonisana nobaba ngezindleko zokufunda.”
Iziqu ziyabiza kanti ubaba wakhe no-Anneline baqhamuka nelinye iqhinga.
Benza isiqiniseko sokuthi ikusasa likaZonke lihleleke kahle ngokumxhumanisa nophrojusa nama-agent aphethe abaculi baseJozi.
“Ngahlangana nabaculi abadumile abanjengoCaiphus Semenya noChicco,” kusho yena.
“U-Anneline wayesuka eGoli aye e-Atlanta ecula ephelezela izihlabani zabaculi uma kunamakhonsathi.
“Ngangingaziwa kodwa nganikwa ithuba lokuvala izikhala zabanye abaculi uma bengekho.”
Ubaba wakhe wabuye wamxhumanisa noLeon Erasmus eNewtown ongomunye wophrojusa abamatasa abaphrojusa izikhangiso namabika eTV.
U-Leon wabuye wasungula ibhendi uZonke ayezocula kuyona uma kunemicimbi kahulumeni neyokwethulwa kwemikhiqizo.
Wayekweminye yaleyo micimbi uZonke ngesikhathi ebonwa yiCulture Clan iqembu laseGerman elamthatha lahamba lazungeza naye i-Europe yonke.
I-albhamu yokuqala abayenza eGermany ethi Africa My Motherland yathola umklomelo weBest R&B kumaMetro FM awards ka-2004, ngo-2005 iChannel O yayivotela njengeBest R&B Video.
Ngaleso sikhathi uZonke wayeseheha iningi labathandi bomculo e-Europe naseJapan, kugcwala izinkulungwane ngezinkulungwane zabalandeli emakhonsathini akhe ebukwa yizigidi zabo kwiTV.
I-albhamu yakhe ayikhipha ngo-2006 ethi Soul-itary, yamenza isihlabani somculi phesheya wabuyela eGoli ngonyaka odlule esezothuthukisa ikhono lakhe ekhaya.
Udume kakhulu esekwiKalawa – inkampani yokurekhoda enkulu eMidrand ebophele izihlabani ezinjengeBongo Maffin, Mafikizolo, Brothers Of Peace, Thebe noDJ Oskido.
“Ngezwakala ngicula kwi-demo kadadewethu uLolo,” kuchaza yena. “Ithimba leKalawa layithanda kakhulu kanti u-Oskido wanginika umsebenzi wokucula ngiphelezele izihlabani zabaculi abasesitebeleni sabo ukuze ngijwayele isitayela somculo wabo.
“Ngicule okokuqala kwiGroover’s Prayer kaThebe – ngabuye ngacula neBongo Maffin ngesikhathi uThandiswa engekho esacula yedwa.”
UZONKE uyavuma ukuthi wayenovalo lokubambela uThandiswa waze wakhuthazwa uStoan Seate, uJah-seed noThandiswa imbala.
“Akekho umuntu owake wakhombisa ukungaphatheki kahle uma ngicula neBongo Maffin. Lokho kuluphawu lokuthi abathandi bomculo bayangamukela eSA.
“Siyezwana noThandiswa. Namadodakazi ethu ayezwana.
“Ucula nami kwi-albhamu yami kanti iphimbo lakhe liyezwakala emucwini othi Uzondilinda (“You’ll wait for me”).”
UZonke uyazibhalela izingoma zakhe kanti wabhala nalowo owawuyibika lemidlalo ye-Africa Cup Of Nations kwiTV.
Usebenza nophrojusa abangosaziwayo abaphrojusa izingoma zika-2010.
“Umculo usemqoka uma kunemicimbi yezepolitiki nezemidlalo eyenza ukuba izwe lethu libhekwe amazwe omhlaba. Kumnandi ukuba yingxenye yokuhlelwa kwaleyo micimbi.”
Umatasa kakhulu kangangoba usejoyine uStacey Gule oyimenenja yomculo kanye nabaculi abanjengeMalaika noRebecca Malope.
Ungenisile kwezamabhizinisi njengoba ebonakala emabhodini ezikhangiso zePuma neCarpe Diem mineral water kanti ubuye abhale izingoma zabaculi abanjengoLoyiso noDJ Frank Roger waseFrance. [z]
BONA ZULU June 2008
