zulu.2022.yourfood_fff
Ophayi nama-sausage rolls
CHICKEN AND MUSHROOM OPEN PIES
Isikhathi sokukulungisa: 20 imizuzu, neminye engu-20 yokuqandisa
Isikhathi sokukupheka: Cishe ihora elilodwa
Kwanela abane
* 2 izipuni (30ml) uwoyela
* 1 i-leek osikwe izingcezu
* 2-3 izigaxa zikagaligi ogayiwe
* 350g amathanga enkukhu angenamathambo ebulwe isikhumba asikwa izikwedlana ezingu-2,5cm
* 200g ama-button mushrooms asikwe izingcezu
* 3/5 inkomishi (150ml) u-cream
* 2 izinkomishi (30ml) i-thyme eqotshiwe
* usawoti nophepha omnyama omahhadla
* 500g i-puff pastry evengiwe uma ingaqandiswanga
* ufulawa wokubhuqa
* 1 iqanda elishayiwe
1. Epanini thosa i-leek emlilweni ophakathi imizuzu emihlanu. Faka ugaligi, ukupheke umzuzu owodwa. Faka inkukhu ukupheke imizuzu engu-8-10. Faka ama-mushroom ukupheke eminye imizuzu engu-5 kuze kuhwamuke bonke ojusi.
2. Faka u-cream ukubilise. Kupheke imizuzu emihlanu kushube usosi. Faka i-thyme ukunonge kahle. Kufake endishini ukuyeke kuphole.
3. Endaweni ebhuqwe kancane ngofulawa, gingqa i-pastry ibe yisikwele esingu-33cm x 33cm, usisike izikwele ezine. Gcoba amachopho ngamanzi ufake ingxube yenkukhu ngesipuni phakathi nendawo esikweleni ngasinye. Phakamisa amachopho ezikwele kuye phakathi nendawo kusongeke. Cindezela emiphethweni ukuze kuvaleke ushiye imbobo encane phakathi nendawo. Gcoba ophayi ngeqanda elishayiwe, ubabeke kwi-baking sheet, ubaqandise efrijini imizuzu engu-20.
4. Shisa uhhavini ngezinga elingu-200°C. Bhaka ophayi imizuzu engu-30-40 kuze kube nsunjwana.
Ahlale ethandwa, kungakhoke uBONA neFood For Fun And Funds bekukhombisa ukuthi ungazakhela kanjani imali ngawo
CURRIED SAUSAGE ROLLS
Isikhathi sokukulungisa: 25 imizuzu
Isikhathi sokukubhaka: 30 imizuzu
Kuphuma angu-16
* 450g i-puff pastry evengiwe
* 450g i-curried mince meat
* ufulawa wokubhuqa
* ubisi lokukubrasha
* iqanda elishayiwe lokucwebezelisa
1. Ukushisa kukahhavini - 220°C. Endaweni ebhuqwe ngofulawa ndlala inhlama ibe ngu-40cm x 20cm. Yisike ibe yimicu emibili.
2. Hlukanisa i-curried mince meat kabili ngokulinganayo.
3. Bhrasha amachopho e-pastry ngobisi oluncane, olunye uhlangothi ulugoqele kolunye kuvaleke. Ncwela emachophweni. Uzoba namasosiji amabili, angu-40cm ubude lilinye.
4. Bhrasha i-pastry ngeqanda ukuze kucwebezele. Sika i-roll ngayinye ibe ngu-5cm ubude. Yivule izinhlanga ezimbili noma ezintathu ngaphezulu.
5. Kukhiphele kwi-baking tray ukubhake imizuzu engu-15. Yehlisa izinga lokushisa libe ngu-180°C, ukubhake eminye imizuzu engu-15. Kukhiphele kwi-wire rack ukuze kuphole. Kuseve kushisa noma kubanda.[z]
IZINDABA ZEMPUMELELO
Vuka uzithathe ngoba ayikho inkomo yobuthongo - sinethulela uRachel Moloi!
NGESIKHATHI iningi lethu lisaphupha ekuseni ngovivi, uRachel Moloi waseSoweto usuke esesendleleni ebange erenki yamatekisi.
Waqala ukudayisa amaswidi erenki yamatekisi eminyakeni engu-10 eyedlule. Kodwa waphinde wabona ukuthi kuningi angakwenza. "Yini engingayifakela laba bantu esheshayo yokudla?", kucabanga yena ngabagibeli.
Kulaphoke kwazalwa khona iVetkoek Paleis. Ngokushesha amagwinya akhe athandwa. Emva kwalokho waqala wadayisa ikhofi nokuyinto eyayihlangana yehle kangcono kubagibeli.
URachel uliphethe kahle ibhizinisi lakhe kangangoba ukwazile ukuyisa izingane zakhe esikoleni, wahlobisa ikhaya lakhe wathenga nesitofu esisha nama-mixers kanjalo nezinye izimpahla ezizosiza ekukhuliseni ibhizinisi lakhe.
Iseluleko sikaRachel kulabo abafuna ukuzimela ngakwezezimali?
"Kuthande okwenzayo!"
Sithumelele indaba yakho usinike nemininingwane esizokuxhuma ngayo. Bhalela kuleli kheli: Food For Fun And Funds/BONA, Box 1610, Parklands, 2121. Email: foodforfun@caxton.co.za
OKUTHATHU OKUBALULEKILE UKUZE IBHIZINISI LIPHUMELELE
Ngaphambi kokukhuluma ngezinto ezintathu ezibalulekile empumelelweni yebhizinisi, ake sibheke indlela iningi labantu elisebenza ngayo. Sikhule emhlabeni lapho sifundiswa khona izindlela zokuphumelela kwiHave-Do-Be.
Sifundiswa ukuthi kufanele sibe nezinto ezithile ngaphambi kokuba kube khona okuningi esikwenzayo ukuze siphumelele.
Ukwenza isibonelo: siye sicabange ukuthi sidinga ukuba nenhlanhla noma amathuba ayisipesheli ngaphambi kokuba nempumelelo.
Kodwa osomabhizinisi abanempumelelo bathi lokhu akusiyo indlela eyiyo. bayazi ukuthi ikhambi lempumelelo lilele kwi-Be-Do-Have! Uma singazicabanga lapho sifuna ukufinyelela khona - sizokhuthazeka ukwenza izinto ezizosilethela esikufunayo.
Ngiyanicela ukuba nikuzame lokhu ukuze nibone ushintsho olungenzeka ezimpilweni zenu.
Manje ake sibheke izinto ezintathu osomabhizinisi abazidingayo emabhizinisini abo:
1 OYI-SHAREHOLDER. Abantu abangama-shareholders bahlale bebheke uhlangothi olulodwa lwempumelelo ebhizinisini. Kokunye thina bantu bamabhizinisi siye sithathwe wuthando lwamabhizinisi ethu singabuyeli emumva ukuze siyobheka sicubungule isimo salelo bhizinisi.
"Ukube ngangingumtshali-wezimali, ngangingayifaka imali yami kuleli bhizinisi?"
Ngiqala ukuzibuza lo mbuzo, impendulo engaphuma nayo ngethi, "Cha". Kwadingeka ukuba ngenze izinguquko ezinqala ngaphambi kokuba ibhizinisi lanelise izidingo zami njengomtshali-zimali kulona.
UMQONDISI. Umqondisi ubhekele umsebenzi wokwakha 'isithombe esikhulu' enhlanganweni. Mangaki amakhasimende esingathanda ukuba nawo, imiphi imikhiqizo okufanele siyikhiqize, malini esingayenza eyiphrofithi? Ukuhlahla indlela kuyingxenye yezibopho zomqondisi. Kuvame ukuba osomabhizinisi bakugweme lokhu, babeke izizathu zokuzithethelela bamise imisebenzi ebalulekile.
Kufanele sikwazi ukuyimela imiphumela yethu ngoba singabantu abazimele, akekho umuntu esingambeka icala ngokwenza kwethu.
3 IMENENJA. Lapha kulapho sizinika isibopho sokuphathwa kwebhizinisi nsukuzonke. Lokhu kungabandakanya uku-odwa kwemikhiqizo, ukuqiniseka imikhiqizo yekhwalithi ephezulu, ukudayiswa kwemikhiqizo yethu, ukugcina amabhuku ezimali nokugcina abasebenzi bethu bethokozile.
Bheka ukuthi ibhizinisi lakho linakho kokuthathu yini lokhu ukuze ukwazi ukubona izinkinga.
Lluwellyn Diedericks
