zulu.1994.headaches
Uma uzwa sengathi ikhanda LIZOQHUMA
UBUHLUNGU bekhanda. Sonke siyahlangabezana nabo. Ngenhlanhla yinto eyelaphekayo nengavikeleka. Zimbili izinhlobo zobuhlungu bekhanda - elingesiyo ingozi (primary headache) neliyi-ngozi elinkenkethayo (secondary headache). Lelo elingesiyo ingozi yilona elijwayelekile kanti libandakanya...
I-MIGRAINE
Ubuhlungu bekhanda obunzima obuqhubekayo obuhambisana nezimpawu ezifana nokucanubezela kwenhliziyo nokufiphala kokubuka kwamehlo.
Ngokwabe-Headache Clinic, lobu buhlungu bekhanda budalwa imithambo ephakela ikhanda, umqala nemihlathi ngegazi. Uma izinyama lapha seziqina imithambo iyaqala ibe buhlungu.
Lolu hlobo lwekhanda lungavikeleka ngokwelapha ukubopheka kwezinyama ezidala ubuhlungu bemithambo.
Ukwelapha: Izidakamizwa eziqaqa izinhlungu kanjalo nalezo eziqeda lokho kushisa ezifana ne-Ibuprofen neVoltaren yizo ongazizama kuqala. Isinyathelo esilandelayo wuhlobo lomuthi ogunyaziwe owaziwa ngokuthi yi-triptan. Njengamanje zinhlanu izinhlobo zama-triptans ezitholakala lapha eSA. Uma ama-triptans esheshe asetshenziswa, ayakusebenzela. Xhumana nodokotela wakho.
IKHANDA LE-TENSION
Lobu buhlungu buvame ukuqala ngemumva ekhanda kube sengathi wumpintshwa okuthile okufana nesihlilingi ngenxa yokugqilazeka kwemizwa. Njengegama lalo lolu hlobo lwekhanda, bunobudlelwane ne-stress nokugqilazeka kwemizwa nomqondo.
Ushokoleti nemikhiqizo yasemadeleni nayo iyalidala leli khanda ekubeni nabantu abakhonze izinto ezine-caffeine njengekhofi, lingabavuka uma bengalitholi ikhofi labo.
Ukwelapha: Okokudambisa izinhlungu njengama-aspirin, Paracetamol noma Ibuprofen kuyakwazi ukwenza umsebenzi owanelisayo kulawo makhanda angebuhlungu kakhulu. Kodwa uma ikhanda i-tension ligadla kabili ngesonto noma ngaphezu kwezinsuku ezimbili, imithi yokuvikela engama-anti-depressant ingakusiza.
IKHANDA ELIDONSA ISIKHATHI ESIDE
Leli khanda liyahlaba kanti lingakuphatha ilanga lonke, izinyanga ngezinyanga, liphinde liphele esikhathini esingangaleso.
Alifani nama-migraines ngoba lihlasela abesilisa ngaphezu kwabesimame.
Ukwelapha: Ngokwabe-Health24.com uma imithi uyiphuza ngokushesha, liba buhlungu kancane. Ukusebenzisa i-anti-migraine drug i-ergotamine tartrate kungabunqamula ubuhlungu. Ungasebenzisa futhi imithi yokwelapha ye-triptan.
IKHANDA ELIDALWA YI-SINUS
Ngokwe-Headache Clinic, imixhantela yezinto nezifo ezinesandla kule nkinga ye-sinus ngokuvamile yiko okudala leli khanda.
Ukwelapha: Ngokwe-Headache Clinic, ukutholakala kwesimo se-sinus kungatholwa wuchwepheshe wezokwelashwa kwendlebe, umphimbo namakhala.
I-Acute sinusitis yelashwa ngekhambi elilwa namagciwane okuyiwo adala i-sinusitis.
IKHANDA ELIGQILAZA AMEHLO
Leli khanda ligqilaza izinyama nemithambo yamehlo okuyiyo ehambisa igazi emehlweni.
Ukwelapha: Ukungaboni kahle emehlweni akusona isizathu esidala lobu buhlungu bekhanda. Kufanele kwazeke kahle ukuthi yini elidalayo ukuze lelashwe kalula.
UKUVIKELA
Gcina i-diary yokuphathwa kwakho yikhanda ukuze usizakale ekwazini ukuthi lidalwa yini. Ungarekhoda izinto ezifana nosuku nesikhathi eliqale ngaso nokuthi yini oyidlile ngalelo langa, izindlela zokulala, nowawukwenzile kuze kuqale ikhanda.
Bhala nokuthi lithathe isikhathi esingakanani nokuthi yini eyakusiza ukuze kwehle izinhlungu. Lokhu kungakusiza ekutholeni ikhambi lokulivikela.
Uma ubuhlungu bekhanda buhambisana ne-stress, funda izindlela ezizokwenza ukwazi ukumelana nalesi simo noma uzivocavoce intamo.[z]
BONA ZULU June 2008
HLALE UPHILILE
Akekho ongaphathwa yikhanda, abanye libaphatha ngaphezu kwabanye. Ungabhekana kanjani nobuhlungu balo...indaba nguThandi Zulu
IKHANDA ELINGAKUBULALA
LOLU hlobo lwekhanda luyingozi kakhulu ngoba lungakubeka engozini yokungenwa yizifo ezingabeka impilo yakho engcupheni yokufa - njenge-brain aneurysms (ukuthamba kodonga lomthambo wegazi okungenzeka uqhume, igazi liconsele ebuchosheni), ukuhluma kwesigaxa ebuchosheni, ukushaywa yi-stroke nokufa kwasebuchosheni njenge-meningitis noma i-encephalitis. Leli khanda livame ukuhambisana nemfiva, amakhaza emaphashini, ukudideka emqondweni, ukuba buthaka nokuyizinto ezidinga ukwelashwa ngokushesha.
Kukhona noguquko emzimbeni oluhambisana nokukhombisa ukwethuka - njengokushwaqa komzimba ohlangothini olulodwa, ukukhubazeka kokubona nokukhuluma kungabi lula ukukhumbula izinto. Ukuqhubeka kwekhanda ezinganeni nakwabadala beminyaka engaphezu kwengu-50 nakho kudinga ukwelashwa ngokushesha.
NGEMINYE IMINININGWANE:
Headache Clinic: 011-484-0933 TNS Clinic: 031-904-1613
BONA ZULU June 2008
