zulu.1927.legalfeb08
uthini umthetho
I-maternity leave
INKINGA: Ngisebenzela inkampani eyenza ojusi. Sekuphele iminyaka eyisithupha ngisebenza. Inkinga wukuthi abafuni ngiye kwi-maternity leave - bathi angithathe ilivu engakhokhelwa, ngale kwalokho umsebenzi uzongiphelela! Ngabe athini amalungelo ami-
ISELULEKO SOFEZELA:
Amalungelo akho njengomsebenzi alawulwa yiBasic Conditions Of Employment Act (BCEA). Ngokwalo mthetho, unelungelo lokuthatha ilivu yokuyobeletha yezinyanga ezine. Awuholi ngokuthatha le livu kanti ayishayisani nelivu yonyaka.
Uma umqashi wakho ezama ukwehlisa izinsuku zelivu yakho ngenxa yelivu yokubeletha, kuyobe wephula imithetho yeBCEA kanti ukufaka isikhalo kwiCCMA kungayixazulula leyo nkinga.
Phezu kwalokho, umqashi wakho akakwazi ukushintsha imithetho yesivumelwano sokuqashwa kwakho ningavumelene.
I-maternity leave yakho iqala kusasele amasonto amane kufike usuku lokubeletha. Kodwa uma udokotela wakho noma umbelethisi ethi kumele isheshe iqale ilivu yakho, umqashi wakho akufanele aphikisane nalokho.
Okunye okumqoka wukuthi akufanele uphindele emsebenzini engakapheli amasonto ayisithupha ingane izelwe.
Uma ungabelethanga kahle, noma ingane igula, udokotela angathi akwengezwe esinye isikhathi phezu kwezinyanga eziyisithupha.
Ungafaka isicelo sokukhokhelwa i-UIF ukuze uthole imali. Isicelo ungasifaka kusasele izinyanga ezimbili kuqale i-maternity leave.
Uma uphuze ukufaka isicelo sakho, ungacela ukuxolelwa (condonation) ufake isicelo sakho kabusha. Okumqoka kakhulu wukuthi ngeke uxoshelwe ukukhulelwa kwakho.
Uma umqashi wakho ekuxosha useyobhekana neCCMA ngoba lokho kungukwephula umthetho.
Ungakwazi futhi ukuthatha ilivu yakho yonyaka uyihlanganise ne-maternity leave ukhokhelwe ngalokho.
Kodwa kufanele uqaphele ukuthi ngokwenzenjalo, uma inkampani yenu ivalela amaholidi okuphela konyaka ngoDecember wena uthathe leyo livu, kungenzeka ungaholi noma uhole imali engaphelele. [z]
ESITHOMBENI KULINGISIWE
Nethulelwa wuBONA naboPhiko loFezela
Senze yonke imizamo yokuqiniseka ukuthi isiyalo enisitholayo siyiso. Kodwa konke okuthinta lolo hlobo lwecala kudinga ukucubungulisiswa, ngakhoke aboPhiko loFezela iScorpion Legal Protection (Pty) Ltd, abethimba elimele ukucubungula amacala nabakwaBONA nabashicileli bephephabhuku labo, ngeke babekwe icala ngokulahlekelwa kwaloyo oyosebenzisa lesi siyalo ngenye indlela.
Sibhalele ikheli lithi: BONA Legally Yours, Box 32083, Mobeni 4060 - ukuze uthole ukubonana nabammeli bethu mahhala imizuzu engu-30 kwelinye lamahhovisi abo ezweni lonkana noma nixoxisane ngocingo.
