ISONTO LOMPHAKATHI LOKUBAMBA IQHAZA  9 - 15 KULWEZI
[imiyalezo esemqoka]
Isonto Lomphakathi Lokubamba Iqhaza  liyisithangami sokuthuthukisa ingxoxo kanye nokuxhumana phakathi kukahulumeni kanye nabantu. Lihlinzeka ngethuba lokuba uhulumeni axhumanise Uhlelo lwakhe Lokusebenza kanye nenqubekela phambili eseyenziwe. Ligqugquzela ukubamba iqhaza komphakathi kanye nokusebenzisana phakathi komphakathi kanye nohulumeni. 
Isonto Lomphakathi Lokubamba Iqhaza  linikeza uhulumeni ithuba lokuthi axoxisane nemiphakathi, aphendule ngokuqaliswa kokusebenza kohlelo lokusebenza. 
Ukuxoxisana ubuso nobuso phakathi kwezinhlaka ezintathu zikahulumeni (uhulumeni kazwelonke, owezifundazwe kanye nowasemakhaya) kanye nomphakathi kuqinisekisa uhulumeni oxhumene nabantu bakhe.
Ngaleli sonto imiphakathi kanye nohulumeni bazoxoxisana kwizithangami ezisunguliwe ezinjengamakomidi ezigceme, kanye nemihlangano yezikhungo ukuphakamisa izingqinamba kanye nokwabelana ngezisombululo. 
Kuzobe kugxilwe ekunikweni kwemiphakathi amandla njengabantu abayingxenye yabasunguli bezisombululo, ngoxhaso lokuzibandakanya ngomfutho kukahulumeni. 
 Inombolo kaMongameli nayo seyithule izinyathelo ezengeziwe ukuthuthukisa ukuxhumana phakathi kukahulumeni kanye nabantu, kanye nokusheshisa ukulethwa kwezidingo kubantu. 
Sethula izinselelo ebesezivele zihlonziwe ezingxoxweni ezinhlobonhlobo kanye nakucwaningo. 
Sesihambe ibanga elide kakhulu kule minyaka eyi-15 yenkululeko, kodwa-ke ziseningi izinselelo. 
Amaphesenti emizi enamanzi ahlanzekile asekhuphukile kusukela kwangama-61.7 ngonyaka ka-1994 kuya kwangama-91.8 ngoNdasa ka-2009, kuningi okusadinga ukwenziwa ukuhambisa izidingo kulabo bantu abasasalele ngemuva.
Sesisondele ekufezeni injongo yethu yokuqeda uhlelo lokuthuthwa kwendle ngamabhakede ezindlini ezakhiwa nguhulumeni ngokusemthethweni, isikhathi esazibekela sona ukuthi lolu hlelo lube seluqedwe nya ezweni lonke ngunyaka ka-2014. 
Sisalokhu sikhathazekile ngamazinga aphezulu okungasebenzi kwabantu, ubuhlwempu, izikhungo zempilo ezinganele nokungathuthuki, ikakhulukazi ezindaweni zasemakhaya kanye nasezindaweni ezingomazakhele. 
Ake sizisebenzise lezi zithangami zokuxoxisana nabamele imiphakathi futhi sihoxe ekulimazeni impahla kanye nezikhungo ezenzelwe ukusiza yona imiphakathi.
Sikhathazekile ngokubambezeleka kwezidingo ezathenjiswa imiphakathi; siyazi ukuthi ngokusebenzisana ngendlela yokubambisana okunamacebo singenza okuningi futhi ngokushesha.
“Ngokusebenzisana singenza okuningi”
