U-MEC utholwe emsulwa ekuziphatheni Okungekuhle 

U-MEC Wezemfundo waseLimpopo wangaphambilini, uDk Aaron Motsoaledi, utholwe emsulwa kunoma ikuphi ukungaziphathi kahle abesolwa ngakho,  nguMvikeli Womphakathi uLawrence Mushwana kulandela uphenyo ngezinsolo zokungasebenzisi kahle amandla akhe nokwephula ukuthembeka. 

Bekusolwa ukuthi, ngenkathi eseyinhloko yezombusazwe yesifundazwe kuMnyango Wezemfundo, uDk Aaron Motsoaledi wayekhonze abahlinzeki abathile befenisha yezikole namagumbi okufundela angomahambanendlwana abanikwa izivumelwa nguye ukuba abahlinzeke ngalezi zimpahla uMnyango. 

Umfakisikhalazo uphinde wasola ukuthi abahlinzeki okukhulunywa ngabo babe bengabangani baka-Dk Aaron Motsoaledi nokuthi wathola “isipho esibizayo’ esiwuhlobo lwemoto komunye wabo.

Ngokuya ngomfakisikhalazo, uMnyango, kusolwa ukuthi ngokuyalwa ngu-Dk Aaron Motsoaledi, wephula imiThethonqubo Yokuphathwa Kweketanga Lokuthenga, eyakhishwa ngokoMthetho Wokuphatha Izimali Zomphakathi (i-PFMA). 

Ngenkathi uphenyo luthole ukuthi izinsolo ezibhekiswe ku-MEC nabanye babasebenzi zabe zingenasisekelo, luphinde lwabonisa futhi ukuthi uMnyango awunayo inqubomgomo oyisebenzisayo, njengoba kudingwa yi-PFMA.  

“Ukwehluleka ukwakha nokusetshenziswa koHlelo Lokuphathwa Kweketanga Lokuthenga njengoba kudingwa yi-PFMA wudaba oludinga ukunakwa okukhulu,” ushilo uMushwana. 

Uncome ukuthi uMnyango uhambisane ne-PFMA , usungule futhi ulondoloze uhlelo olufanele lokuthenga olungenzeleli, olungenazimfihlo, oluncitinayo nolungabizi kakhulu. 

