Zamaphilo nokuphepha emabhizinisini amancani
Ingabe zamaphilo nokuphepha emsebenzini ziphathelene nani?
Ziphathelene nokukhandela abantu bonyana bangalinyazwa msebenzi nanyana bagule ngokuthatha amagadango avikelako nangokubabonelela ngebhoduluko elanelisako lokusebenza.
Ingabe zamaphilo nokuphepha kwabantu zivikelwa bunjani?
Kunemithetho edinga bonyana thina soke singazifaki nanyana sifake abanye engozini. Begodu kunomthetho okhona ovikela umphakathi eengozini ezenzeka eendaweni zemisebenzi.
Ingabe imithetho yezamaphilo nokuphepha iyasebenza emabhizinisini amancani?
Iye, imithetho yezamaphilo nokuphepha isebenza kiwo woke amabhizinisi nanyana angaba mancani kangangani. Begodu isebenza nebantwini abazisebenzako.
Ngiwuphi umthetho osebenzako?
UmThetho wezamaPhilo nokuPhepha emSebenzini, wama-85 ka-1993.
Ngubani onesibopho sokwakha nokukatelela ukusebenza kwemithetho yezamaphilo nokuphepha?
UmNyango wezabaSebenzi unesibopho sokwakha imithetho yezamaphilo nokuphepha eSewula Afrika. Abahloli baqatjhwa mNyango wezabaSebenzi bonyana bakatelele ukusebenza kwemithetho yezamaphilo nokuphepha.
Yini eyenziwa bahloli?
Bavakatjhela iindawo zemisebenzi bahlole bonyana abantu bayayihlonipha imithetho le nanyana njani. Baphenya ngezehlakalo nangeenghonghoyilo. Begodu basiza bonyana uzwisise lokho ekufuze ukwenze. Bakatelela ukusebenza komthetho nangabe kunalabo abaphula imithetho ngendlela edinga itjhejo.
Yini ekufuze yenziwe nangabe kube nokulimala okwenzeke emsebenzini?
Umqatjhi nayana umuntu ozisebenzako kufuze abike izehlakalo emNyangweni wezabaSebenzi. Izehlakalwezo kufuze zibikwe ngaphandle kokumorosa isikhathi, khulukhulu lokha nangabe zimasikizi, nanyana ngaphakathi kwamalanga alikhomba.
Ingabe zamaphilo nokuphepha ziyalawuleka endaweni yakho yomsebenzi?
Ukuze kuthathwe amagadango wokulawula iingozi endaweni yomsebenzi, kufuze kwenziwe iHlolo yeeNgozi ukwenzela bonyana kutholakale ilwazi mayelana neengozi ezihlobene neendawo zemisebenzi. Ngemva kwalokho kungathathwa amagadango azwakalako wokulawula iingozi.
Kuphathelene nani ukuhlolwa kwengozi?
Kuphathelene nokuhlola ngokucophelela izinto ezingabanga ingozi ebantwini endaweni yakho yomsebenzi.
Ngiziphi iingozi kanye nokulimala okungatholakala endaweni yomsebenzi?
Kuneengozi ezimbalwa ezingatholwa emsebenzini, begodu lokhu okulandelako ziimbonelo ezimbalwa zeengozi ezingenzeka:
Ukutjhelela nanyana ukukhutjwa emsebenzini. Lo ngunobangela ojayelekileko wokulimala okwenzeka kiyo yoke imihlobo yeendawo zemisebenzi.
Amakhemikhali
Ukuwa lokha nawuseendaweni eziphezulu isib. iinlere
idisibezo, ukutshinyeka, kanye neenhlungu, khulukhulu ezibangelwa kuthwala imithwalo ebudisi ngezandla nangokuyisekela ngesandla nanyana amandla womzimba.
Itjhada
Igezi emsebenzini
Imililo.
Umqatjhi nanyana umuntu ozisebenzako unesibopho sokuqinisekisa bonyana akubi nomuntu olimalako nanyana othinteka ngenca yemisebenzi eyenzeka endaweni yomsebenzi.
Begodu abasebenzi abasendaweni yomsebenzi kufuze baqinisekise bonyana akunamuntu olimala ngenca yokungayeleli kwabo nanyana ngenca yokungasebenzisani kwabo nomqatjhi.
