IsiNdebele 

Khuluma ilimi lakho. Kulilungelo lakho.

Yini i-TISSA? 
UmSebenzi wokuRhumutjha ngomTato weSewula Afrika (i-TISSA) lihlelo elisungulwe mNyango wezobuKghwari namaSiko, lokuphuhlisa ukusetjenziswa kwamalimi wangokomthetho (isiZulu, isiXhosa, isiNdebele, isiSwati, iSesotho, iSetswana, iXitsonga, iTshivenda, isiNgisi nesiBhuru). 

Mhlobobani womsebenzi owenziwako?  
I-TISSA inikela ngehlelo lokurhumutjha ngomtato elizakukghonakalisa ukuthintana phakathi komphakathi nombuso, ngokusebenzisa amalimi wendabuko khona kuzakufikelelwa imisebenzi yombuso. 

Kungani kunikelwa ngalomsebenzi?
Ngokusebenzisa i-TISSA, umbuso uzalisa igunya lomThethosisekelo ngokuthatha amagadango amahle nabonakalako wokuthuthukisa nokuphuhlisa amalimi wendabuko. 

Ingabe kghani umphakathi ungabawa imisebenzi yombuso ngelimi lawo? 
Iye, ikani ilimi elikhulunywa mumuntu kungelisemthethweni.   

Ingabe ilimi lamatshwayo nalo liyabalwa? 
Iye, abantu abangezwako eendlebeni bafakiwe emsebenzini we-TISSA. Bazakukghona ukufikelela imisebenzi yombuso, njengabantu abezwako, eendaweni eziseDorobheni leKapa, eJohannesburg, eDurban nePolokwane. 

Lisebenza njani ihlelo le-TISSA? 
	Nayikuthi ilunga lomphakathi nesisebenzi sombuso abazwani ngamalimi wabo, isisebenzi sombuso singadosela umtato isentha yerhelebho lemitato yakwa-TISSA.
	Esentheni, umsebenzi uzakuhlanganisa isisebenzi sombuso nomphakathi ngokusebenzisa umrhumutjhi okhuluma womabili amalimi. 
	Isisebenzi sombuso sizakuba nomtato onezandlana ezimbili zokulalela nokukhuluma, khona sona nelunga lomphakathi bazakulalela umrhumutjhi.
	Umrhumutjhi uzakurhumutjhela bobabili abantu. Lokhu kuzakuthatha imizuzwana. 

Ngizakwazi njani bona umnyango wombuso unikela ngehlelo le-TISSA?
Amatshwayo asema-ofisini azakutjengisa ukufumaneka kwehlelo le-TISSA.

Nayikuthi i-ofisi lombuso alitjengisi itshwayo le-TISSA, ngingawubawa na umsebenzi wokurhumutjha ngomtato?  
Awa, umsebenzi lo utholakala kuphela eendaweni ezitjengisa itshwayo le-TISSA. Kodwana, iindawo ezihlukeneko zizakufakwa ehlelweni ngomuso. 

Ngingazuza njani nge-TISSA? 
	Izakudlala indima eqakathekileko ekuthuthukisweni kwamalungelo wakho welimi, begodu ngalokho namalungelo wobuntu eSewula Afrika. 
	Godu izakudlala indima eqakathekileko ekuphuhlisweni nekusetjenzisweni kwamalimi wendabuko wangokomthetho kanye nelimi lamatshwayo.
	Uzakukghona ukufikelela imisebenzi yombuso ngelimi lakho.

    Nawufuna ilwazi elinabileko thintana neGolola Consultancy
Umtato: 012 460-6090              Iposo ye-elektroniki: golola@mweb.co.za


