Mali ya mpfuneto ya Muphenxinara yi tlheriseriwa endzhaku, endzhaku ka ku nghenelela ka Musirhelela Vaakatiko

Muphenxinara wa le Limpopo wa vukhale bya 86 wa malembe,loyi mali ya yena ya mpfuneto yi nga yimisiwa malembe manharhu laya nga hundza hi ku ehleketeleriwa ku va a  tirhisa  nomboro ya pasi leyi fanaka naya  munhu wa le  Free State, sweswi u hlekelela aya eka xiyenge xa tihakelo, a karhi a khensa ku nghenelela ka Musirhelela Vaakatiko.  

Mali ya mfuneto ya n’hweti yin’wana na yin’wana ya Man.  Nyasedza Sophia Mphephu wa le ximutanini xa  Thononda eVenda yi yimisiwile hi va Ejensi ya Vuhlayiseki ya Afrika Dzonga  (SASSA) hi Nhlangula  2005 ku ri hava nhlamuselo leyi a nga nyikiwa. U tshamile a karhi a endzela xiyenge xa tihakelo ku ringana malembe manharhu, a karhi a tlhelela ekaya a nga rina nchumu emavokweni ya yena nkarhi hinkwawo.  

Xiyimo, hambiswiritano, xi ve xi  ncinca  hi ku nghenelela ka gqweta. Mushwana tanihi leswi mali ya mpfuneto ya Man. Mphephu yi nga tlheriseriwa endzhaku. U kumile mali ya ntsengo wa  malembe manharhu na masalela na MusirhelelaVaakatiko u yile emahlweni a bumabumela leswaku a hakeriwa ntswalo hi nhlengo wa masalela. Man. Mphephu u tlhele a amukela maphasele ya swakudya ku ringana tinh’weti tinharhu loko SASSA yi ri karhi yi langutisana na xiphiqo xa yena.

Xirilo  xa yena  xi yile   eHofisini  ya Musirhelela Vaakatiko  (OPP) hi Mudyaxihi  2008 endzhaku ka loko phephahungu ra xifundzha ra le Limpopo, leri vuriwaka , Capricorn Voice, ri hangalasile xitori xa yena.  OPP hi xihatla yi tlulela eka ntirho wa yona yo lonca migingiriko ya yona yo lavisisa mhaka leyi. 

Vukamberi byi kumile leswaku mahanyelo hi SASSA aya nga ri ya kahle  tanihi leswi aku nga rina xivangelo xa nkoka xa ku yimisiwa ka mali ya mpfuneto ya mupfuniwa. Swi tlhele swi tumbuluxiwa leswaku aku nga rina  tindlela tin’wana ta  ku pfuna hi swakudya  leti a tiri kona ku hlayisa mupfuniwa na ndyangu wa yena hi nkarhi lowu mali ya mpfuneto ayi yimisiwile.

Hi ku landza leswi nga kumiwa, Gqweta. Mushwana u tsalerile Muofisirinkulu wa Huvo ya SASSA, a bumabumela leswaku mali ya mpfuneto ya phenxeni ya  Man. Mphephu yi tlheriseriwa endzhaku na leswaku mali ya nhlengo wa nsalo ya malembe manharhu yi hakeriwa eka yena, yi ri na ntswalo. 

“Mufambisi wa Huvo wa Xifundzha wa SASSA eLimpopo u fanele a thola ntlawa wo tirha, tanihi leswi swi nga sunguriwa, ku lavisisa timhaka ta timali ta mpfuneto leti nga yimisiwa hi xihatla  hikwalaho ka ku tirhisa  tinomboro ta mapasi to fana,  ku vula Gqweta. Mushwana. 

U tlhele a bumabumela leswaku SASSA yi nyika vanhu lava mali ya vona ya mpfuneto yi nga yimisiwa,  maphasele ya swakudya  nkarhi hinkwawo wa vulavisisi ku endlela ku va hlayisa loko ejensi yaha lulamisa xiphiqo lexi nga yisa eka ku yimisiwa ka mali ya mpfuneto.

Ggweta. Mushwana u tlhele a bumabumela leswaku SASSA yi endla tindlela tin’wana to hetisisa ndzavisiso wa yona ku nga se hela tin’hweti tinharhu endzhaku ka ku yimisiwa ka timali ta mpfuneto.  

   

