Ku rindzela tindlu ta RDP nkarhi wo leha swi fika emakumu

Vatshami va Swiyenge swa  R na S va doroba ra  Lebowakgomo  eLimpopo, lava van’wana va vona ava rindzerile tindlu ta Nongonoko wo Aka hi Vuntshwa na Nhluvukiso (RDP) , ku sukela 1996, ku nga ri khale vata vona ku rindzela ka vona ka nkarhi wo leha ka vusirhelelo ku fika emakumu. 

Leswi swi landzela ndzavisiso hi Hofisi ya Musirhelela Vaakatiko (OPP) eka ku tsandzeka hi Ndzawulo ya Tindlu na Mimfumo ya Miganga ya le Limpopo ku hetisisa xikongomelo xa yona xo aka tindlu ta RDP eka muganga lowu.

Mhaka leyi yi tisiwile ro sungula eka OPP hi mukhanselara wa le mugangeni Nkul. Frans Letwaba, loyi a tirhaka ematshan’weni ya vatshami., 

Vamangali va endlile swikombelo swa swipfuno swa tindlu hi nkarhi wa 1996 ku fika 2006. Swikombelo swa vona swi pfumeleriwile hi Ndzawulo ehansi ka nongonoko wa swipfuno lowu vuriwaka Swipfuno leswi Hlanganaka na Tiphurojeke. 

Phurojeke yi nyikiwile khamphani leyi vuriwaka COMDEV, leyi nga tsandzeka ku aka tindlu kumbe ku nyika switirhisiwa swo aka. Swi kumekile leswaku tindlu tin’wana ti akiwile ti nga heli naswona ku yisiwile ntsena hafu ya switirhisiwa eka vapfuniwa van’wana.

Ndzawulo yi tsandzekile ku aka tindlu kumbe ku phakela switirhisiwa swo aka eka vamangali leswaku vata ti akela tindlu vona vinyi.

Ndzavisiso wa OPP wu kumile leswaku  swikombelo swa vamangali swa swipfuno swa tindlu swi pfumeleriwile ku suka 1997 ku fika 2006.  

Vamangali van’wana va tekile xiboho xo aka vusirhelelo hi timali ta vona, loko van’wana va hetisile tindlu leti nga akiwile ti nga heli va karhi va tirhisa switirhisiwa swa vona.

Musirhelela Vaakatiko u bumabumerile leswaku Ndzawulo yi fanele yi aka tindlu eka vapfuniwa  hinkwavo lava swikombelo swa vona swi nga pfumeleriwa hi kumbe ku nga se fika 2006.

Ndzawulo yi fanele yi hetisa tindlu leti nga tshikiwa na ku phakela switirhisiwa swo aka eka vapfuniwa  hinkwavo lava nga nyikiwa mpfumelelo. 

Ku yile emahlweni ku bumabumeriwa leswaku Ndzawulo yi pfuna vamangali lava nga sungula ku aka tindlu ta vona vinyi, kambe vanga koti ku tihetisa na ku ririsa vamangali hinkwavo lava nga tiakela tindlu hi voxe ku ri hava ku pfuniwa hi Ndzawulo, endzhaku ka loko va nyikiwile  mpfumelelo wo va vapfuniwa.



