Sibonelelo semphesheni yalabadzala ivuselelwe ngemuva kwekungenelela Kwemvikeli Wesive.

Umholi wempesheni loneminyaka lengu- 86 waseLimpopo , lona impesheni yakhe yemiswa iminyaka lemitsatfu ngoba kusolelwa kutsi unenombolo yamatisi lefanana neyalomunye umuntfu Losefreyistata , nyalo sewumamatseka yonkhe indlela leya endzaweni yekuhola, sibonga kungenelela Kwemvikeli Wesive.

Imali yempesheni yaNkt Nyasedza Sophia Mphephu wasemakhaya ase- Thononda  eVenda yemiswa I-Ejensi Yekuvikela Inhlalakahle ENingizimu Afrika  South African Social Security Agency (SASSA) ngaOkhthoba 2005 ngaphandle kwekutsi achazelwe. Bekasolo ahambela esikhungweni sekuhola cishe iminyaka lemitsatfu, abuyela ekhaya alengisa tandla ngaso sonkhe sikhatsi. 

Lesimo sagucuka saba ncono ngekulandzela kungenelela kwa- Adv. Mushwana njengoba impesheni yaNkt Mphephu yavuselelwa. Watfola imali yeminyaka lemitsatfu Umvikeli Wesive wabuye waphakamisa kutsi abhadalwe intalo yalemali. Nkt  Mphephu ubuye atfole kudla kwetinyanga letintsatfu uma  i-SASSA isabakana nalenkinga.

Sikhalo sakhe safika Ehhovisi Lemvikeli Wesive i- (OPP) ngaMeyi 2008 ngemuva kwekutsi liphephandzaba lesifundza laseLimpopo, i-Capricorn Voice, ishicilele indzaba yakhe . I- OPP yazubela khona kucala luphenyo lwayo kuloludzaba. 

Loluphenyo lwatfola kutsi lesento se- SASSA besingakalungi nekutsi besingekho sizatfu sekumisa imphesheni yalobenazuza. Kawbuye kwatfolakala kutsi atikho letinye  tindlela tekuphila letaniketwa lomzuzi nemndeni wakhe ngalesikhatsi impesheni yakhe imisiwe. 

Ngekulandzela lokutfoliwe, Adv. Mushwana wabhalela Umphatsi Lomkhulu wase- SASSA, aphakamisa kutsi impesheni yaNkt Mphephu ivuselelwe nekutsi imali yeminyaka lemitsatfu ibhadalwe nentalo. 

“Imeneja lenkhulu Yesifundza yase- SASSA  eLimpopo kufanele icoke litsimba, lelitawuphenya loludzaba lokumiswa kwetimphesheni ngenca yekutsi bantfu banetinombolo letifananako ngekuphutfuma ,” kwasho Adv. Mushwana. 

Wabuye waphakamisa kutsi i- SASSA inikete labaholako , labo impesheni yabo yemiswa, emaphasela ekudla kuso sonkhe sikhatsi seluphenyo kute baphile uma i-ejensi isasombulula lenkinga leholele ekumisweni kwempesheni.

Adv. Mushwana ubuye waphakamisa kutsi i- SASSA icubungule tindlela tekuphetsa luphenyo lwayo ngetinyanga letintsatfu ngemuva kwekimiswa kwempesheni 

   

