Kulindza lokudze kwetindlu te- RDP sekuyaphela 

Takhamuti tase- Units R na- S tasedolobhaneni le- Lebowakgomo eLimpopo, labanye labebasolo balindzele tindlu Teluhlelo Lwekutfutfukiswa Nekwakha kabusha (RDP) kusukela nga- 1996, titawubona kulindzela kwabo lokudze kuphela. 

Loku kulandzela luphenyo lolwentiwe Lihhovisi Lemvikeli Wesive (OPP) ngekwehluleka Kwelitiko Labohulumeni Basekhaya Neletindlu LaseLimpopo kufeza sibopho salo sekwakhela umphakatsi tindlu te- RDP.

Loludzaba lwacala lwaletfwa ku- OPP likhansela lendzawo, Mnu Frans Letwaba, lomele takhamuti. 

Tikhalo beticondzene netibonelelo tetindlu ngesikhatsi sa- 1996 kuya ku- 2006. Ticelo tabo tavunyelwa Litiko ngaphasi kweLuhlelo lwesibonelelo lolubitwa nge- Project Linked Subsidy. 

Lephrojekhthi yaniketwa inkapani lebitwa nge-COMDEV, leyahluleka kwakha tindlu noma kuniketa tintfo tekwakha. Kwatfolakala kutsi letinye tindlu takhiwa nganhlanye nekutsi tintfo tekwakha tayiswa kulabanye labazuzako.

Litiko kubukeka ngatsi lahluleka kwakha tindlu noma kuhambisa tintfo tekwakha kubamangali kute batakhele tindlu tabo.

Luphenyo lwe- OPP lwatfola kutsi ticelo tebamangali tetibonelelo tetindlu tavunywa kusukela nga- 1997 kuya ku- 2006.

Letinye tinkapani tancuma kwakha kokufihla inhlokpo ngetindleko tato, kube letinye tacedzisa tindlu letakhiwe tangapheli ngekusebentisa tintfo tabo tekwakha. 

Umvikeli Wemphakatsi waphakamisa kutsi Litiko kufanele lakhele bonkhe lekufanele bazuze labo ticelo tabo tavunyelwa nga- noma ngembi kwa-2006.

Litiko kufanele licedzele letindlu letashiywa libuye linikete tintfo tekwakha kubo bonkhe labazuzako labavunyelwe. 

Kwabuya kwaphakanyiswa kutsi Litiko lisita bamangali lasebacalile kutakhela tindlu tabo, kodvwa bangakhoni kuticedza libuye lincephetelise bonkhe bamangali labakhe tindlu ngaphandle kwekusitwa Litiko, ngemuva kwekutsi bavunyelwe kutsi bazuze. 



