IPHALAMENDE INIKETA INDLELA YEKUGCINA INDZAWO IHLANTEKILE 
Iphalamende yeRhiphabhlikhi yaseNingizimu Afrika isungule Umgomo Wekulawula Lokungasenamsebenti, njengendlela yeluhlelo lolubumbene lwekulawula kuphepha nekwenta kahle umsebenti endzaweni yekusebenta. 
Umtsetfosisekelo utsi batfu baseNingizimu Afrika banelilungelo lekuba sendzaweni lengenabungoti etimphilweni nasekuphileni kahle kwabo.  Loku kufaka ekhatsi kuvikelwa kwendzawo ngekushaywa kwemtsetfo lovakalako naletinye tindlela tekuvikela kungcoliswa nekubukelwa phansi kwendalo, kugcugcutela kuvikelwa kwendalo, nekuvikela kusimama kwentfutfuko.  Singabuyisela emuva lomunye walomonakalo lokhungetse lomhlaba wetfu uma senta taba tekwenta umehluko.  
Iphalamende itibophelele ekucinisekeni temphilo netekuphepha kwawo onkhe Emalunga netisebenti tePhalamende nabobonkhe bantfu labasebenta noma labangena ngalokusemtsetfweni ngekhatsi emabaleni ePhalamende.  LesiKhungo sitibophelele ekugcineni takhiwo tePhalamende tisesimeni lesikahle kute kube nekuphepha nesimo sekusebenta lesikahle, nekuhlala kubukwa tindzawo letingaba nebungoti emsebentini.
INDZIMA NEMISEBENTI YEPHALAMENDE EKUGCINENI INDZAWO IHLOBILE 
Umtsetfo, lofana Nemtsetfo Lobuke Temphilo Netekuphepha  ubophelela iPhalamende  kutsi yente iphindze igcine ngayo yonkhe indlela nangalokubonakalako, indzawo yekusebenta iphephile ingabi netihibe nebungoti etimphilweni tetisebenti tayo.  Kulindzeleke kutsi tisebenti tibambisane nemcashi kute kucinisekiswe kutsi tidzingo taloMtsetfo tiyalandzelwa.  Iphalamende inemsebenti wekwatisa tonkhe tisebenti tayo ngekubaluleka kwekongiwa kwendzawo  nangetindzima nemisebenti lekufanele yentiwe.  
TINDLELA NETINCHUBO
Iphalamende isungule luhlelo lolubumbene lwekulawula tekuphepha nekwenta kahle umsebenti endzaweni yekusebenta, lekufaka ekhatsi kutfutfukiswa Kwemgomo Wekulawula Lokungasenamsebenti.  
Inhloso yalomgomo kuniketa luhlaka ngalokulinganako, lolungabiti kanye nalolusimamisa kuniketwa kwetinsita etisebentini nasebantfwini bemango labangekhatsi kwemabala Ephalamende.  Lomgomo uhlose kucinisekisa kutsi tintfo letingasenamsebenti tilahlwa ngendlela lephephile kute kuncishiswe kungcolisa, kukhulisa kujikeletisa,kukhicita lokusha nekucinisekisa kutsi lokungasenamsebenti lokusuka Ephalamende kuhanjiswa ngendlela yenchubomgomo lelandzelwa lapho.
KONGA EMANDLA
Iphalamende igcugcutela kutsi kusetjentiswe emaglobhu langasebentisi gezi lomningi kute kuncishiswe kungcolisa, kongwe emandla netindleko.  Emaglobhu langasebentisi gezi lomningi asetjentiswa kuto tonkhe tindzawo temmango nasemaphasejini ePhalamende.
KULAWULWA KWALOKUNGASENAMSEBENTI 
“Lokungasenamsebenti” kushiwo kunoma ngabe yini, noma ngabe kusamoya, kulukentjeti noma kucinile noma inhlanganisela yaloku, lengaleso naleso sikhatsi kutawuchazwa Yindvuna Yetemvelo Netekuvasha ngekwenta satiso Emculwini Wahulumende.
Kulawulwa kwalokungasenamsebenti lokucinile
Lokomile Lokungasenamsebenti 
Lokungasenamsebenti Lokomile kubutfwa onkhe malanga kufakwe etikhwameni teplastiki letibonakalisa lingekhatsi nasetimumatfweni letikuto tonkhe tindzawo bese kumikiswa kuletindzawo lapho kubekwa khona lokungasenamsebenti.
Imitsi Lengasenamsebenti 
Imitsi Lengasenamsebenti ifakwa etikhwameni teplastiki (letimtfubi) bese itsatfwa ngumtfulitinsita locashelwe kwenta loko tikhatsi tonkhe,  noma uma kunesidzingo.
Tintfo Tagezi Letingasenamsebenti 
Onkhe emalambu agezi langasenamsebenti ayatsatfwa ayophahlatwa ngendlela lephephile endzaweni lebekelwe loko.
Lokumanti lokungasenamsebenti 
Lokumanti lokungasenamsebenti kubekwa etimumatfweni/emigconyeni lemakhiwe lesezingeni bese kuyasuswa ngasosonkhe sikhatsi.
Emakhemikhali langasenamsebenti
Emakhemikhali abekwa endzaweni yemakhemikhali lekhiywako kute kuvikelwe kusetjentiswa kwawo ngalokungekho emtsetfweni.  Onkhe emakhemikhali kufanele afakwe etimumatfweni letikhetsiwe, bese kutsi lawo lamancane lanebungoti lobukhulu abhalwe ngalokucacile.
Emasilinda Emoya Locindzetelekile
Loyo  mtfulitinsita loniketwe lomsebenti kufanele asuse emasilinda emoya locindzetelekile emagcekeni lesosikhatsi bese uyacinisekisa kutsi ayalahlwa ngendlela lesemtsetfweni, kute kuvikelwe kutsi aphindze asetjentiswe ngeliphutsa.  
IMITAMO YESIKHATSI LESITAKO
Kulahlwa kwemafutsa ekupheka
Iphalamende isaphishekile ngekufuna kutsenga timumatsi letingajikeletisa emafutsa ekupheka lasetjentisiwe tiwente asetjentiswe kabusha abe yidizili.  Lendlela yekucitsa emafutsa lasetjentisiwe emadreyinini emanti ayikhutsatwa. 
Kujikeletisa kwentiwe umkhicito lomusha nekulahlwa kwemaphepha langasasebenti
Iphalamende isaphishekile ngekufuna umtfulitinsita lomusha lotawutsatsa emaphepha  awajikeletise akhicite umkhicito lomusha.  Onkhe emahhovisi Ephalamende atawuniketwa emabhokisi emakhadibhodi ekulahla emaphepha kute kugcogcwe emaphepha langenamsebenti.  Lawa mabhokisi atawutfululwa njalo ngeliviki. 
Wonkhe umsebenti wekuvikela indzawo yetfu, wekonga emandla nekunciphisa kungcola ubalulekile.  Kungumsebenti wabo bonkhe bantfu baseNingizimu Afrika, lokufaka ekhatsi onkhe Emalunga kanye netisebenti tasePhalamende kutsi tivikele indzawo yetfu kute titukulwane tetfu tiyisebentise nekugcugcutela lisiko  entfutfuko lechubekela embili.
