SISWATI
i
TINHLOSO


* Kuphatsa kutfutfukiswa kweFreedom Park letawutungeletela tindzikimba letintsatfu:
* Umshikashika
* Umbuso wentsandvo yelinyenti
* Kwakha sive
* Kumela ngendlela lebonakalako, lecotfo futsi yekusebentisana, luvo lwavelonkhe lolutfutfukako kanye nebuve betfu
* Kufinyeleleka kubantfu labanyenti basekhaya nakubavakashi basemhlabeni wonkhana
* Kufaka sandla kutekuhweba
* Kutfola imali yekutfutfukiswa kweFreedom Park
* Kuhlakaniphisa umcondvo, kuhlahlamba, nekuba nelwati
* Kutfola imiphumela yemfundvo
* Kukhona kwemukela lwati lolukhulako nemifanekiso kulesikhatsi sanyalo nalesitako
* Kukhombisa sitfombe lesihle sesive lesikhulako
* Kukhombisa umbuso wentsandvo yelinyenti yeNingizimu Afrika
* Kubonisana nalabafanele labatsintsekako




Lisu lwekuChumana lweFreedom Park




1. SENDLALELO

Nga1998 iKhabhinethi yemukele kutfutfukiswa kwemKlamo weMagugu wavelonkhe, kanye nemiKlamo yeMagugu yavelonkhe lesiphohlongo, futsi kungashiywa nemKlamo weKhoi-San. Emva kwesikhashana emva kwekugcotjwa kwaMengameli Mandela mhlaka 27 Apreli 1994, liTiko letebuCiko, emaSiko, iSayensi neTheknoloji (DACST) kanye neliHhovisi laMengameli batfola ticelo letinyenti letiphuma kumitfombo leyehlukene yekwemukelwa ngalokusemtsetfweni kukhuliswa ematje etikhumbuto, imimyuziyemu, titfombe tematje, kukhunjulwa kwebaholi labakhulu netenhlakalo temlandvo.

Ticelo betisuka kumiphakatsi, kubaholi nakubantfu laba emagugu abo bekanganakwa ngalesikhatsi sepolitiki yakudzala kulelive. Ticelo letinyenti betiphuma kubantfu labasikati, etincenyeni temphakatsi webantfu labamnyama kanye netinhlangano letingabandlululi ngekwelibala eNingizimu Afrika.

Leticelo beticuketse luhlu lwetizatfu letehlukene. Letinye betinelukhono lwekuvusa tinkhulumo-mphikiswano letimatima futsi leticakile kulendzima, luhlobo, indlela nebuhle betakhiwo tenkhumbulo letiphakanyisiwe. IDACST ibonile kutsi luhlakamsebenti lwenchubomgomo levakalako buludzingekile kuphimisela wonkhe umbono nenjongo letawufaka ligalelo lolukhulu ekucolananeni nekwakha sive.

Bekunetindlela letibonakalako tekwecana, imifanekiso leyehlukene nemibono lephindzaphindzene yemafa etfu leyidzinga imigomo nendlela yekuhlanganisa lemiklamo leminyenti. Letindlela, naletinye tintfo, tifaka ekhatsi: kuciniswa kwehlukana kwemasiko, kulungiswa kwemonakalo wakudzala kulokwemukwela kweticelo, kuhlanganiswa kwemafa neRDP neGEAR, bunikati ngekubonisana, tihlangotsi tetinhlangano netetimali temKlamo weMagugu. Sidzingo sendlela lebumbene kulemiklamo leyehlukene yabekwa embili yiDACST njengenselele lephutfumako.

IFreedom Park yemukelwa njengalenye yemiKlamo yeMagugu lesiphohlongo. IFreedom Park Trust yamukelwa yiKhabhinethi ngaDisemba 1999 futsi yabamba umhlangano wayo wekucala ngaJuni 2000. IKhabhinethi yamukela indzawo yekutfutfukiswa kweFreedom Park eSalvakop ePitoli ngaJuni 2001. Nks L Gadd wakhetfwa njengeCEO lensha yeFreedom Park ngaMashi 2001.

Hulumende uncume kuchubeka ngemcondvo wekutfutfukiswa kweFreedom Park njengalenye yemiklamo yemagugu lesiphohlongo lephetfwe yiDACST. IFreedom Park Trust iphakamise letindzikimba letintsatfu letilandzelako:

* Umshikashika
* Umbuso wentsandvo yelinyenti
* Kwakha sive

Kuhlongotwe kutsi iFreedom Park itawumela ngendlela lebonakalako, lecotfo futsi kusebentisana nebantfu baseNingizimu Afrika, emagugu emlandvo, luvo lwavelonkhe kanye nebuve (kutsandza live letfu). Lendzawo futsi itawufinyeleleka kubantfu labanyenti, bavakashi basekhaya nakubavakashi basemhlabeni wonkhana. Kubalulekile kutsi iFreedom Park yakhiwe ngendlela yekutsi yibe ngumtfombe wetemfundvo lonotsile mayelana nemafa eNingizimu Afrika. Sizatfu saloku sikatsatfu.

* IFreedom Park sikhumbuto savelonkhe lehlose kuniketa umboniso lojulile, logcwele wemagugu emlandvo weNingizimu Afrika ngaphasi kwetindzikimba letiphakanyisiwe. Ngako ke yehlukene kumamyuziyemu netintfo letisikhumbuto ngemtsamo njengeNelson Mandela, Samora Machel, Ncome, njll letibuke tehlakalo temlandvo letitsite nobe imifanekiso.
* Kwesekela letindzawo temafa kusasesigabeni lesincane kubantfu labanyenti baseNingizimu Afrika ngenca yekweswela lwati ngaletindzawo lebetikhona ngaphambi kwembuso wentsandvo yelinyenti kanye nekucashatwa ngulaba bebanesibindzi sekuvashela letindzawo ngaleso sikhatsi.
* Lendzawo kumele ikhone kwemukela imifanekiso netimphawu letehlukene kulesikhatsi sanyalo nakulesitako. Kumele ikhombise sitfombe lesihle sekwakha sive. Kumele ikhombise similo sembuso wentsandvo yelinyenti futsi yibe yindzawo lehwebako.
iVt02sw01028
??

??

??

??

