KUMENYETELWA KWEMALUNGELO EBANTFU LABADZALA

INKHULULEKO

* Bantfu labadzala kumele batfole kudla lokwanele, emanti, indzawo yekuhlala, timphahla kanye nelunakekelo lwetemphilo ngekuniketwa kwemholo, kwesekelwa ngumndeni nangumphakatsi kanye nekutisita
* Bantfu labadzala kumele babe nelitfuba lekusebenta nobe babe nalamanye ematfuba ekwenta imali
* Bantfu labadzala kumele bakhone kuhlanganyela ekuncumeni kutsi kuyekela kusebenta kungenteka nini futsi ngasiphi sikhatsi
* Bantfu labadzala kumele bafinyeleleke kutinhlelo letifanele tetemfundvo nekuceceshwa
* Bantfu labadzala kumele bakhone kuphila kutimondzawo letiphephile futsi letifanele letifunwa ngumuntfu nekuntjintja tikhundla
* Bantfu labadzala kumele bakhone kuhlala ekhaya sikhatsi lesanele

KUTENETISA

* Bantfu labadzala kumele bakhone kulandzelela ematfuba ekutfutfukisa ngalokugcwele kwemakhono abo.
* Bantfu labadzala kumele bafinyelele kumitfombolusito yetemfundvo, yemasiko, yetenkholo neyekukhibika yesive.

KUHLANGANYELA

* Bantfu labadzala kumele bahlale bahlanganiswe nesive, bahlanganyela ngalokuphelele ekwakhiweni kanye nekusetjentisweni kwetinchubomgomo letitsintsa ngco timphilo tabo futsi babelane ngelwati nangemakhono abo nesitukulwane lesincane
* Bantfu labadzala kumele bakhone bafune futsi batfutfukise ematfuba etinsita tasemphakatsini nekutsi basebente njengemavolontiya etikhundleni letifanele timfuno nemakhono abo

SITFUNTI

* Bantfu labadzala kumele bakhone ngekuhlonishwa futsi baphephe futsi bakhululeke ekusetjentisweni kanye nasekuhlunyetweni ngekwemtimba nangengcondvo.
* Bantfu labadzala kumele baphatfwe kahle ngaphandle kwebudzala babo, bulili, buve nobe imvelaphi, kukhubateka nobe lesinye simo, futsi bahlonishwe ngalokukhululekile ngemagalelo abo kutemnotfo

KUNAKEKELWA

* Bantfu labadzala kumele bazuzi ekunakekelweni ngumndeni nangumphakatsi kanye nekuvikelwa ngekulandzela luhlelo ngalunye lwesive lwemagugu emasiko
* Bantfu labadzala kumele bafinyeleleke elunakekelweni lwetemphilo kute lubasite kutsi bagcine lizinga labo lelifanele lemtimba, lengcondvo nemivo kanye nekuvimbela nobe kuphutisa kucala kwetifo
* Bantfu labadzala kumele bafinyeleleke kutinsita tetenhlalakahle netetemtsetfo kute kwesekelwe kutimela kwabo, kuphepha nekunakekelwa
* Bantfu labadzala kumele bakhone kusebentisa emazinga lafanele etikhungo tekunakekela letiniketa kuvikeleka, kulungisa similo kuvuselelwa kwetenhlalo kanye nengcondvo esimeni lesinebuntfu nalesiphephile
* Bantfu labadzala kumele bajabulele emalungelo eluntfu kanye nenkhululeko lesisekelo uma bahlala kunobe nguyiphi indzawo yekufihla inhloko, yekunakekelwa nobe yekwelashwa, kufaka ekhatsi kuhlonishwa lokuphelele kwelilungelo lekutsatsa tincumo ngekunakekelwa kwabo nangelizinga letimphilo tabo
