sotho.297.phemelo
O ikahela
kgwebo
Sebapadi sa mehleng sa Generations, Phemelo Ngcobo o kene kgwebong ya thekiso ya matlo
OBAPALA karolo ya Dr Lerato Thibela paleng ya Hillside ho SABC 2. Hape o hlahella dipapatsong tsa Sof 'n' Free. O ne a tume ka karolo ya Khensani ho Generations. Ha a se ho TV, mosadi enwa ke makgwebo ya maphathephathe.
Ho tswa ha hae ho Generations ka 2002, ho ne ho llise balatedi ba bangata ba pale ena. "Ha ke bo rate bonaledi ba TV. Ho bapala paleng e ratwang jwalo ka Generations, e ne e le mathata a maholo ho nna."
"Ke a rata ho ba sebapadi, e seng ho ba naledi ya TV. E phatsamisa bophelo ba ka." O ne a itshireletse ka ho kena kgwebong ka 2003. Ka mora moo, a nyalwa ke moratuwa wa hae Mthandeni Ngcobo eo e leng accountant ho IT le ho tsa kgokahanyo.
Phemelo o ne a etse dithuto tsa dipapatso mme a hirwa ke khampane e nngwe ya dipapatso - empa Phemelo a kgetha ho iketsetsa kgwebo eo e leng ya hae.
Ngwanana enwa wa Soweto o ne a kene kgwebong ya matlo. "Ke ne ke bolokile moputso wa ka oo ke neng ke o fumana ho Generations, ke ne ke sa rate ho phela jwalo ka naledi," ho hlalosa yena. "Ke ne ke tele ho reka dikoloi tse ntle le diaparo, ka boloka tjhelete."
O ne a kgethe kgwebo ya ho rekisa matlo - ke kgwebo e nang le phaello, empa e hlokang mamello, le tsebo ya dipalo jwalo ka Trevor Manuel. Phemelo o ne a reke folethe e kamore e nngwe ya Sandton. Ha a ka a dula ho yona, o ne a hirisi ka yona hore a tle a kgone ho e lefella.
Ka dikgwedi tse mmalwa feela, o ne a kene kgwebong ya ditoro tsa hae. Ka mora ho tswa ho Generations, Phemelo o ne a etse ntho e le nngwe - o ne a kene kgwebong ka mora ho hlophisa dintho hantle.
"Ka dikgwedi tse tsheletseng feela, boleng ba folethe ya ka bo ne bo se bo eme ho R200 000," ho bolela yena a tsheha. Se neng se mo makaditseng ke hore folethe ya baahisane ba hae e dikamore di pedi tsa ho robala yona e ne e bitsa habedi ho feta eo ya hae.
O dilemo di 24 mme jwale o ne a hlokomele hore o tlameha ho boloka tjhelete ka hohlehohle. O ne a ithute le ka ho fumana thuso ya ditjhelete dibankeng le maqwetheng. "Tjhelete yohle ya ka ke ne ke e tsetele thekisong ya matlo."
O ne a ithute tse ngata ka potlako, ho kenyeletsa le ho etsa matsete a nako e telele, e seng ho tatela ho fumana phaello. Ho ne ho mo nke dilemo tse tsheletseng hore a kgone ho reka matlo ao a matle bakeng sa ho a rentisa.
O a kentse fenetjhara ya maemo - mme o a rentisetsa dikgorane tsa Afrika Borwa. "Ana ke matlo a majabajaba ao le nna nke keng ka dula ho ona, a loketse le baeti ba tswang mose ho mawatle," o boletse jwalo. "Ha ke motho ya ratang dintho tse ntle haholo, empa ke rata ho kgotsofatsa ditlhoko tsa bareki ba ka - ke rata ba fumane maemo a kang a ditoropong tse pele tse kang London, Paris kapa New York.
"Tumellanong ya rona, ke hore ya rentang a lefe rente ya dikgwedi tse tsheletseng pele a kena. Ha ho kena motho e motjha, ke mo kenyetsa bethe e ntjha. Matlo a na a na le khaphethe e ntle, fenetjhara ya maemo, satellite TV, Internet, le batho ba a hlwekisang, athe le tshireletso ke ya boemo bo hodimo. Bareki ba ka ba dutse ba lebeletse tshebeletso ya boemo bo hodimo kamehla - ha ho nako ya masawana."
Phemelo le Mthandeni bona ha ba phele bophelo ba maemo ao. Bonneteng, tsela eo sekgahla sa tswala ya tjhelete se leng ka teng, ho molemo ho renta ho ena le ho reka matlo. "Ha o rata sebaka se majabajaba, ho rentela ntlo ya diranta tse dimilione di hlano, ho tshwana le ho lefella theko ya ntlo ya dimilione di pedi."
O sebedisana haholo le maqwetha le di-accountant. O sebedisa tjhelete hantle. "Ha ke reke le pakana ya dipompong ke sa ka ka nahana ka tsona," ke yena a ntse a tsheha.
Ntho ya maemo eo a nang le yona, ke koloi eo a sebetsang ka yona. "Tshehetso ya ditjhelete e fumaneha lefatsheng ka bophara," Ha kgwebo e ka tla hantle, ke a kena ho yona. Ho na le dinaha tse neng di le maemong a tlase tseo jwale di seng di rata ho ipeha maemong a matjhaba.
"Ha jwale, ha ke so rate ho ba le bana hobane mosebetsi ona o nkisa hodimo le tlase - ke tla ba bona ha nako e se e ntumella. Ke nako ya hore ke etse MBA (Master of Business Administration)," ho bolela yena. "Ke rata ho beha kgwebo ya ka maemong a pele, pele nka theha lelapa la ka e le hore ke tle ke kgone ho tobana le diphephetso."[s]
Pale: Doug Gordon
Ditshwantsho: Roelene Prinsloo
Setshwantsho se nketswe: Hoy P'loy, Hyde Park Corner
DINALEDI
Ha ke reke le pakana ya dipom-pong ke sa nahana ka yona
