sotho.2907.yourstories_truelife
O ne a le dilemo di 24 ha a fihlelwa ke mohopolo wa Vodacom wa kgwebo. Nkosana (33), o bua le Kamogelo Sebola wa BONA ka ka moo a ne a fihlelwe ka teng ke mohopolo wa kgwebo wa call-back le lebaka le etsang hore a batle ho putswa.
HA KE qeta degree, ke ne ke sebetse ha Vodacom ka 1995 ke le accountant e rupellwang. Ka hirwa ka ho feletseng ka 1996. Ka 2000 ke ne ke dutse ke bua le kgarebe ya ka mohaleng, eo kajeno e seng e le mohatsaka.
E ne e le morutwana ka nako eo, a se na tjhelete ya airtime, hape a sa kgone le ho ntlhokomedisa hore ke mo letsetse ha a ena le nako. Ke ka moo mohopolo wa tshebeletso ya mahala ya Please Call o neng o mphihlele ka teng. Ka bolella bahiri ba ka ka ona, ke hlokomela hore e tla thusa Vodacom ho hohela batshehetsi ba bangata.
E ne e amohelwe ka matsoho a mabedi, ya kenngwa tshebetsong hanghang. Re ne re be le tumellano ya molomo le bona empa ho ne ho ena le dintlha tse ding tseo re neng re sa ntse re tla di thatolla pele. Ka totobatsa di tloha feela hore ke tla lebella tefo. Empa baokamedi ba tjhentjha ha dintho di qala ho ba tsamaela hantle, ba etsa eka ke mohopolo wa bona. Ba ne ba etse tumellano le ba ha Cell C le MTN ka yona. Ho nkutlwisa bohloko ho bona mohopolo wa ka o sebetsa ka katleho empa ho sa thwe letho ka nna hape ke sa lefshwa hohang. Ke ne ke leke ho hlophisa kopano le mookamedi wa Vodacom empa a hana hehehe. CEO e neng e tshwere ka nako eo, e ne e mpolelle mahlong hore ha ke na fumana le sente e ntsho ka mohopolo oo. A boela a tswelapele ka hore le lebitso la ka le ke ke la kenngwa hara ba tla kgethelwa dikgau hobane ke boikgohomoso.
Ke ne ke sa ntse ke inehetse ka hohlehohle ho sebeletsa Vodacom empa ha totobala ka nako eo hore ke lokela ho siya. Ka 2003 ka ya sebetsa bankeng. Qeto ya ho batla ho itseka kgotla ka leeme leo ke le etseditsweng ke Vodacom, ke le leng la mabaka a neng a etse hore ke tlohele ho sebeletsa moo.
Ka mora ho tswa khampaneng ena, ke ne ke qale ho batla dikeletso tsa molao. Leha ho le jwalo, ka kgathala, mme ka boela ka tsoselletseha hape ka Motsheanong 2007. Ke ne ke ba ngolle mangolo ke batla re be le dipuisano.
Ba ne ba iphapanyetse nna. Leha ho le jwalo, ha ba hane hore mohopolo ona wa Please Call Me o ne o tswa ho nna, empa ba lla ka hore o ne o phatlalatswe ke bona setjhabeng hobane ke ne ke ba file ona jwalo ka mosebeletsi wa bona. Ba ipatile tlasa molawana wa tumellano ya mosebetsi e reng: 'Kaofela ha mahlale ao basebetsi ba hlahang le ona ho matlafatsa kgwebo ka nako eo ba e sebeletsang, e tla ba ya khampane'.
Ke ona molawana ona oo re phehisanang ka ona mme ke na le tshepo ya hore lekgotla le tla dumellana le nna. Ke ne ke hiretswe ho bala ditjhelete mme mehopolo ya ho hodisa kgwebo, ke mosebetsi o ka thoko ho oo ke neng ke o hiretswe. Ha se toka hohang. Ha re etsa mohlala, ha ke hiretse motho ho fiela mme a hlaha le mohopolo o motle wa seetswa sa ho hlwekisa, ha ke na tokelo ya ho re mohopolo oo ke wa ka. Ke bona ho tla be ho le phoso ho rekisa mehopolo ya batho ba fielang, ho iketsetsa tjhelete mme bona ba se ke ba nehwa leha e le tlotla e ba loketseng.
Ke seo re se tsekang le Vodacom. Ke hodile jwale, moyeng le kelellong mme ke a ikutlwa hore ke tla kgona ho emelana le nyewe ena. Ke tla itseka lekgotleng la dinyewe. Ke ikutlwa hantle hore nyewe ya ka e a utlwahala e hloka feela kananelo ya lekgotla. Ke batla ho tsejwe semolao hore mohopolo oo ke wa ka mme ke fumane molemo wa ona ho tloha ka nako eo o neng o kenngwa tshebetsong ka yona.
BONA e buisane le ba ha Vodacom ka taba ena mme sebui sa teng sa re: Mosebetsi o mong le o mong o entsweng ke mosebeletsi wa khampane nakong eo a hirilweng ke yona, o nkwa e le wa khampane eo ho kenyeletswa le tshebeletso ya Please Call Me. [s]
Nkosana o re o hodile moyeng jwale mme o ikutlwa a le matla a ho phehisana le Vodacom kgotla.
BOPHELO BA NNETE
Please Call Me
KE MOHOPOLO WA KA
Nkosana Makate o qosa dihanyata tsena tsa selefounu tsa Vodacom ka hore ba utswitse mohopolo wa hae mme jwale ba etsa dimilione ka ona
