SESOTHO.2885.ourworld
RE SHEBA MORAO
JWALE BAHLODI KE...
TSA SAMA: Mokete wa Dikgau tsa Mmino tsa Afrika Borwa tsa bo 14 o ne o le Sun City Superbowl ka la 3 Motsheanong. Bahlodi ho ne ho ena le:
Pina ya selemo (ho kgetha setjhaba): DJ Sdunkero ka Maputo.
Sebini se hlwahlwa sa monna:
Hip Hop Pantsula (Acceptance Speech)
Sehlopha se Hlwahlwa/Albamo ya Selemo:
Freshlyground (Macheri)
DI-GRAMMY: Soweto Gospel Choir e hapile Grammy ya bobedi dilemong tse pedi mohla la 10 Hlakola ha albamo ya Africa Spirit ho ne ho thwe, ke e Hlwahlwa Mminong wa Borabe Lefatsheng.
FATSHE LA RONA - E IKGETHANG
Mathata a dipolotiki, ho fela ha motlakase, ho nyoloha ha petrole, tlotlollo ya Sehlopha sa Afrika Borwa ditlhodisanong tsa Diolimpiki moo seriti sa naha se neng se lwanelwe molamu wa hlooho ke ba Holofetseng, mathata a moruo lefatsheng lohle, presidente wa pele wa motho e motsho USA, tahlehelo ya bahale ba Afrika Borwa - 2008 ebile selemo sa dinthontho
NALEDI E MATHATENG
Mohla la 1 Hlakubele, Mandoza o ne a thule VW Jetta ka Chrysler Crossfire mmileng o moholo wa Joburg. Ha shwa ba babedi. Ntle ho menyenyetsi ya hore o ne a tahilwe, diteko tsa madi ha di a ka tsa nkwa mme ha se ke haeba bonolo hore a qoswe ka botahwa. Pele re hatisa pale ena, o ne a ena le diqoso tse pedi tsa polao ntle ho maikemisetso.
Sebapadi sa mehleng sa Bafana Bafana, Doctor Khumalo le ba bang ba bane ba ne ba lemale ha BMW ya Khumalo e ne e thulane le minibus mmileng wa N1 haufi le Soweto, hoseng ha mohla la 4 Motsheanong.
Kotsi ena ya mo senya lebitso hampe, mme ha hlahella hore o ne a ena le mosadi eo e seng wa hae. Lebitso la hae e ne e le Lizzy Moloto leha a ne a ntshwe ka ditshepe ka koloing, o ne a hane hehehe ho bua le mapolesa. Phil Masinga, ya neng a letela Khumalo le Lizzy, le yena o ne a tsamaya le motswallae wa mosadi ho thwe ke yena ya neng a pate lehlatso ka ho balehisa mosadi eo le pele a hlokomelwa.
Nyewe e tswelapele Khumalo o qoswa ka ho kganna bohlaswa a bile a tahilwe.
Ka nako eo sebini sa kwaito, Brickz (Sipho Ndlo) a neng a qala ho kena ho TS Records ka Phato, beng ba khampane, DJ Sbu le TK Nciza, ba ne ba mo qale ka ho mo isa sebakeng sa ho lokiswa semelo.
"Ke ikutlwa ekare ke tswetswe botjha. Ha ke na ba phoqa hohang," o boletse jwalo Brickz ho ba ha Sowetan. "Ke batlile ke lahlehelwa ke neo ya ka le bophelo ke dithethefatsi," o boletse jwalo a bile a dumela hore o ne a sa tswafe ho ja R2 000 ka bosiu a reka cocaine.
O thusahetse tukisong eo ya semelo? Ha re tsebe hobane kgwedi tse mmalwa ka mora moo, mohla la 14 Pudungwana, o ne a se a hlekefeditse setantshi se seng sa tlelapong ka mora ho tahwa tlolo hona tlelapong moo.
BA NYALANE
Sebapadi, Salamina Mphelo le sebini sa kwaito le sebapadi, Tshepo "Howza" Mosese (ka Loetse).
Sebapadi Bridget Masinga le rakgwebo Thabiso Khati (ka Hlakubele).
BA NA LE NGWANA
Mofumahadi wa kwaito, Mshoza.
Eo e neng e le Miss SA 2003
Joan Ramagoshi.
DIFAHLEHO TSA SELEMO
Ho thwe ho kene dimilione tsa diranta akhaontong ya hae ka nako eo Terry Pheto wa Tsotsi a neng a qala ho ba sefahleho sa L'Oreal mohla la 31 Phupu.
Khampane ena ya ditlolo e ne e nyatsuwa ka ho kgantsha sefahleho sa Beyoncé mme bang ba sala ba maketse hore ebe sa Terry sefahleho sona ba tla se etsa jwang hore se be ka tsela ena eo ba batlang ka yona.
Na ke nnete hore L'Oreal e fetse ya hatella hore a arohane le DJ Sbu hobane ba re ha a mo tshwanela?
Ka la 15 Phato, Connie Ferguson e ne e be sefahleho sa ditlolo tsa kwano tsa Even And Matte ya Garnier.
A HLALWA!
Slikour (Siyabonga Metane) wa Skwatta Kamp o ne a makatse batshehetsi mohla la 3 Mphalane ha a hlala sebohodi sa TV Bonang Matheba ho Facebook.
"Ke leboha ditakaletso tsa lona tse ntle empa ka mora ho shebisisa taba ena hantle le ba lelapa, ke entse qeto ya ho kgaohana le Bonang. Se nyahame pelo leratong..." molaetsa wa hae o ne o bolela jwalo. Matheba ya neng a halefile o ne a bolelle ba Sunday World hore o ne a so hlokomele hore Slikour o se a mo hladile ho Facebook. A re ba sa ntse ba ratana, a utlwa ka motswallae molaetsa wa Facebook. Ba re o se phakise ho ahlola Slikour. O ne a iphetetsa ho Bonang ka ho mo kopanya le monna e mong, ba rialo ba di tsebang hantle.
DIPINA TSE TSWANG PELE KA 2008
2 by 2 - Rythmic Elements
Qolo - DJ Vetkoek vs Mahoota
Ndikhokhele - Jub Jub
Ubala - Big Nuz
Ngeke Ngiphinde - Jaziel Brothers
How Low Can You Go? - Bleksem
Umsindo - Slikour
Money Maker - Smallz
Uyangi Seducer - DJ Cindo
Wavele Wayidedela - L'Vovo
Tippy Toes - Da L.E.S.
DIOLIMPIKI
Di ne di tshwaretswe mane Beijing, People's Republic Of China, ho tloha mohla la Phato 8 ho ya ho mohla la Phato 24, Dipapading tsena tsa Diolimpiki, ho ne ho kgobokane boramabelo ba ballwang ho 10 500, ba qothisana lehlokwa dikarolong tse 302, mefuteng e 28 ya dipapadi. Mokete wa ho bula mokete ona, e ne e le o majabajaba, empa sehlopha sa rona sa Afrika Borwa sona, se ne se re phoqe. Se ne se kgutle le metale e le nngwe feela.
Re leboha Khotso Mokoena, ya neng a tlole sebaka sa 8,24m ho long jump, a hapa metale ya silivera.
Ho tloha mohla la Loetse 6, ho ya ho Loetse 17, ho ne ho tshwarwe tsa Dipharalimpiki ho na moo Beijing. Amakrokokroko yona e ne e sebetse, ba ne ba kgutle le dimetale tse ngata ho balellwa le tse hlano tsa kgauta tsa Natalie du Toit le tse tharo tsa Oscar Pistorius.
FATSHE LA RONA - E IKGETHANG
MTN8
Ditekete tsa papadi ena di ne di fele le pele ho fela beke feela di rekiswa, balatedi ba ne ba sa ikutlwe, ba emetse papadi ena ya makgaolakgang a MTN8 pakeng tsa Mamelodi Sundowns le Kaizer Chiefs lebaleng la Absa, Thekong mohla la Loetse 20. Pula e neng e na ditlwebelele, e ne e thibele papadi eo mme ya qetella e tjhethiseditswe ho mohla la Loetse 23 - moo Chiefs e neng e hlole bao e neng e le thatohatsi ka 4-3 dipeneneng, ya ikgapela
R8 million.
SEBAPADI SA SELEMO SA PSL
Teko Modise (Orlando Pirates)
YA DINTLHA DI NGATA
James Chamanga (Moroka Swallows): Dintlha tse 14.
PSL
Mathwasong a selemo sa bolo sa 2007/08, batshehetsi ba SuperSport United ba ne ba bolele hore Gavin Hunt a lelekwe hang ka mora papadi ya bohlano ya sehlopha sena jwalo ka ha se ne se na le dintlha tse nne feela ka mora papadi eo ya bohlano.
Empa mokwetlisi enwa ya dilemo di 44, ya hlahetseng Kapa, o ne a ba kwale melomo ha Supersport e ne e hapa liki lekgetlo la pele dilemong tse 14 e le teng mohla la Motsheanong 18.
MAKGETLO A MANE KA TATELANO
Leha dinyefolo di ne di ntse di pakellana hodimo, empa Bafana Bafana e bonahala e tla hantle! Mohla la Pudungwana 19 e ne e hape papadi ya yona ya bone ka tatelano ha e ne e hlola Cameroon ka 3-2. Teko Modise mona o ne a hlabe dintlha tse pedi mme Bernard Parker yena o ne a hlabe sa ho qetela sepekere ka mora ho ba Cameroon e ne e lekantse dintlha, e le 2-2.
BOLO YA MATJHABA
MOHOPE WA AFRIKA: Mohla la Hlakola 10 Cameroon e ne e hlolwe ke Ekgepeta ka 1-0 ho ya makgaolakgang mane Accra, Ghana, lebaleng la Ohene Djan. Bafana Bafana yona e ne e hlolehe ho feta mokgahlelong wa pele feela jwalo ka ha e ne e bapale ka ho lekana ka 1-1 le Angola le Senegal mme ya hlolwa ka 3-1 ke Tunisia.
UEFA CHAMPIONS LEAGUE: Ya makgaolakgang e ne e le pakeng tsa Manchester United le Chelsea, mme e ne e le lekgetlo la pele paleng ya tonamente ena hore ho thulane dihlopha tsa Manyesemane ho ya makgaolakgang. Papadi e ne e le mane Moscow lebaleng la Luzhniki mohla la Motsheanong 21 moo Manchester e neng e hlole ka 6-5 dipeneneng.
Ditshwantsho: GALLO
SEBAPADI SA MATJHABA SA SELEMO
Cristiano Ronaldo dos Santos Aveiro, ya bapalang mapheong ho Manchester United le Portugal, o ne a kgethwe ho ba FIFPro World Player Of The Year ka Mantaha wa la
Mphalane 27.
FIFPro ke mokgatlo wa matjhaba o emetseng dibapadi tsa profeshenale.
"Ho a makatsa ho utlwa hore sebapadi sena se kgethwa hara dibapadi tsa profeshenale tse fetang 50 000 lefatsheng ka bophara, ho rialo sebapadi sena se dilemo di 23.
MAHLOHONOLO A TSATSI LA TSWALO, MADIBA
Ha lelapa le motse kaofela wa Qunu o ne o ituletse ka bodutu mohla la July 18 le Madiba, ho ne ho ketekwa wa setletle mokete ka Moqebelo. Hara bamemuwa ba bohlokwa ba 500 ho ne ho ena le presidente wa mehleng, Thabo Mbeki, presidente wa ANC, Jacob Zuma, presidente wa mehleng wa Zambia, Kenneth Kaunda, Morena wa Mazulu Goodwill Zwelithini, Morena wa Maphoto, Zwelonke Sigcawu le ditho tsa komiti e kgolo ya ANC.
KE MAHLOMOLA
Tlhaselo ya melata e ne e qale Alexandria ka la 11 Motsheanong pele e namela Kapa le Thekong. Ha shwa ba ka hodimo ho 50, makgolokgolo a lematswa, matlo a tjheswa mme ra bona sehloho se neng se re hopotse mehleng ya kgethollo ya mmala.
FATSHE LA RONA - E IKGETHANG
BOMABOTLE BA A SASANKA
Miss World 2008, tlhodisano ya bo 58 ya makgaolakgang a Miss World, e ne e tshwaretswe Sandton Convention Centre, Joburg mohla la 13 Tshitwe. Afrika Borwa e ne e emetswe ke Tansey Coetzee.
TEKO YA DEMOKRASI
Presidente Thabo Mbeki o ne a itokolle mosebetsing mohla la 21 Loetse, ka mora hore Komiti e kgolo ya ANC e re ha e sa tla mo tshehetsa hohang ka palamenteng. Tsena tsohle di etsahetse matsatsing a mmalwa lekgotla le qhadile nyewe ya bobodu e kgahlano le Presidente wa ANC, Jacob Zuma, moo lekgotla le neng le nyatse ho itshunyatshunya ha boradipolotiki ka letsoho la Mong Mbeki.
Mohla la 25 Loetse, Kgalema Motlanthe a behwa ho ba mopresidente wa mokobobo. Afrika Borwa ya tlotlwa ka mokgwa o e amohetseng diphetoho tsena ka ona. Empa yaeba qaleho ya mathata a ANC, "Lekota le mokgupi" ba monyola mokgeng, ba phatlalatsa hore ba ithehela mokga wa bona wa dipolotiki, mohla la 1 Pudungwana.
DIPHETOHO?
Ya etswa pale ho behwa Barack Obama (47), mohla la 5 Pudungwane, setulong, yaeba presidente wa pele wa motho e motsho wa USA. "Lona ba batlang ho senya lefatshe, re tla le hlola. Ba batlang kgotso le tshireletso, re tla le tshehetsa," o ne a bolele jwalo puong ya hae.
Empa jwalo ka presidente wa USA wa bo 44 o setse le lefa la mathata a so kang a bonwa ho tloha ka 1930, dintwa tsa Afghanistan le Iraq le diqhomane tsa Iran di pokile.
ROBALA KA KGOTSO
MAMA AFRICA
Miriam Makeba (76) o hlokahetse mohla la 10 Pudungwana, ka mora ho emelwa ke pelo moketeng wa mmino o neng o le Italy.
Ka mora ho rehwa "Mama Africa" o ne a re: "ke rehilwe lebitso lena ke batho, ke ipotsa hore: 'Hobaneng ba batla ho nneha boikarabelo bo bokaalo, ba ho ba mme wa kontinente kaofela?' ka boela ka hlokomela hore ba entswe ke lerato. Ka le amohela. Ke Mama Africa jwale."
Ditshwantsho: GALLO
ROBALANG KA KGOTSO...
Vuyo Mokoena: Naledi ya mmino wa bodumedi e neng e hape dikgau, e ne e hlokahale mohla la 23 Motsheanong. O ne a kene sepetlele ka mora ho opelwa ke hlooho ha bohloko mme ditlhahlobo tsa hlahisa hore o na le kankere bokong.
Jabulani Ndaba:
Jabu wa Malaika o ne a bolawe ke mathata a tsamaisanang le Lefuba mohla ka 14 Phupu. "O ne a nthute bohlokwa ba bophelo ba lelapa," se ne se bolele jwalo setho se seng sa sehlopha sa hae sa mmino, Bongani Nchang tshebeletsong ya sehopotso sa mofu, moo ho neng ho ena le batho ba ka hodimo ho ba 400. "E ne e le motho ya mosa haholo. Ho na le sekgeo se seholo pelong ya ka se ka kwalwang ke yena feela."
Feziwe Radebe: Feziwe Radebe (34), Mohatsa Lucas Radebe, mokaubere wa bolo le mokapotene wa mehleng wa Bafana Bafana le Leeds United o ne a bolawe ke lefu la kankere mohla la 18 Mphalane, ka mora ho lwantshana le lefu lena dilemo tse ka hodimo ho tse nne kaofela.
Bahale ba bang ba rona ba re siilleng selemong se fetileng ba kenyeletsa le: Sebapadi/seswaswi, Bernie Mac (Phato 9); sebini Isaac Hayes (Phato 10);
Levy Mwanawasa, presidente wa Zambia (Phato 19)
