sotho.1994.headaches
BONA SESOTHO June 2008
Ha hlooho ya hao e MAMOHA
HLOOHO. E hlola e re hlasetse nako le nako mme ka nako e nngwe, e opa hona hoo e kang e tla mamoha ka lehare, empa hangata ha re kgone ho e laola kapa hona ho e thibela ka ho hlophisa dintho hantle. Ho na le mefuta e mmedi ya hlooho, e tlwaelehileng le e nngwe e sa tlwaelehang hohang ho ya ka bohloko ba yona...
E BITSWANG MIGRAINE
E opa ha bohloko hape e otla e boella e bile e tsamaisana le mathata a kang ho nyekelwa ke pelo le ho foufala mahlo.
Ho ya ka Tliliniki ya Hlooho, bohloko bona bo tswa methapong ya pelo e lebisang madi hloohong, letlalwaneng la yona, molaleng le mehlareng. Ha methapo e saroloha, e utlwa bohloko hobane mesifa le yona e a tia.
E bakelwa ke ho ruruha ha letlalwana la boko mme ho ka phekolwa ka ho fedisa ho tia hoo ha mesifa, e leng sona sesosa sa mahloko.
Kalafo: Dipidisi tsa Analgesic (tsa mahloko) le tsa anti-inflammatory tse kang Ibuprofen le Voltaren ke tsona tsa bohlokwa. Ngaka e ka boela ya o neha tse ding tsa tse bitswang triptan. Ha jwale di fumaneha ka mefuta e mehlano naheng ena. Triptans di a thusa. Buisana le ngaka ka tsona.
HLOOHO YA KGATELLO
Hangata e opa ka morao, e be bothithi empa eke methapo ya hlooho e a pepetwa. E bakelwa ke kgatello, ho tetebela maikutlo kapa ho kgathatseha.
Tjhokoleiti le dietswa tsa lebese le tsona di ka nna tsa eba sesosa sa yona. Dipatlisiso di bontshitse hore batho ba nwang dino tse nang le caffeine, e ka nna ya ba hlasela ha ba sa itekanyetse dikopi ka letsatsi.
Kalafo: Dipidisi tsa aspirin, Paracetamol kapa Ibuprofen di ka thusa ha e se e haketse. Leha ho le jwalo, ha e hlasela makgetlo a ka hodimo ho a mabedi ka beke kapa ho feta, kalafo e kang ya anti-depressant e ka thusa ha nakwana.
HLOOHO E TETEANENG
Ke mofuta wa hlooho e hlabang ha bohloko, e atisang ho hlasela hangata ka makgetlo a itseng ka letsatsi dikgwedinyana pele e nyamela nakwana. E tlwaelehile ho feta mefuta e meng hobane hangata e tsoswa ke mefuta e itseng ya dijo. Ha e tshwane le ha ho ruruhile letlalwana la boko, yona ebile e hlasela banna ho feta basadi.
Kalafo: Ho ya ka ba ha Health24.com ha o enwa dipidisi e ba betere. Ha o newa dipidisi tse theolang ho ruruha ha letlwalana la boko tsa ergotamine tartrate, ho ba betere ntle ho moo o ka nwa triptan.
HO THIBANA MAHANANA
Ho ya ka ba Tliliniking ya Hlooho, ha motho a hlolwa ke dintho tse itseng, tse etsang hore a thibane mahanana, ha se hangata a opelwang ke hlooho. Ke ka hona meriana ya hlooho feela e tlwaelehileng e sa atiseng ho mo thusa.
Kalafo: Ho ya ka ba Tliliniki ya Hlooho, ho bohlokwa ho qala ka ho shebisisa sesosa sa mahloko pele o ka qala kalafo. Ho thibana ho ka nna ha tsamaisana le ho kwalana ditsebe le ho tshwarwa ke mmetso mme ngaka e ikgethang ya ho thibolla dinko e ka o alafa ka mora ho fuputsa sesosa mme e o thuse ho fokotsa mahloko a tsamaisang le hona.
Ho thibana dinko tlolo hangata ho alafshwa ke antibiotic therapy e thusang ho lwantsha bakteria e tsebisahalang ka ho baka sinusitis.
HLOOHO E BAKELWANG KE MAHLO
E bakelwa ke bohloko ba methapo e laolang tshebetso ya mahlo le methapong ya madi.
Kalafo: Ho se bone hantle e ka nna ya eba sesosa se seholo. Sesosa se seholo sa hlooho ya mofuta ona se lokela ho fuputswa pele ho ka qadiswa kalafo.
BOIPABALLO
Boloka lenaneo le hlakileng la dinako le matsatsi ao hlooho e o hlaselang ka ona. O ka nna wa ngola fatshe hore e qadile neng, le hore e fedile neng, seo o se jeleng le ka moo o robalang ka teng, le dintho tseo o di entseng le seo o neng o se nahana ka nako eo e qadileng ka yona.
O ngole le hore e nkile nako e kae pele e fela le hona o e alafile kang. Hona ho ka o thusa hore o kgone e bona hantle hore e bakelwa keng.
Ho phela bophelo bo hlwekileng ho ka o tswela molemo.
Ha e bakelwa ke kgatello, ithute mekgwa ya ho ikalafa jwalo ka ho imamela le ho kwetlisa molala.[s]
TSA BOPHELO
Bohle re tshwarwa ke hlooho nako le nako, ho ba bang e ba matla ho feta. O kgona jwang ho mamella mahloko... Pale ke Thandi Zulu
MOFUTA O MONG WA HLOOHO
O mong o kotsi haholo hape e ba sesupo sa mafu a mang a kotsi jwalo ka brain aneurysms (ho fokola ha letlalwana le methapo ya madi, e ka nnang ya qhoma mme madi a qhalanela ka bokong), ho ba le tlhala bokong, ho shwa lehlakore le tshwaetso e bakelang ho ruruha ha letlalwana la boko kapa encephalitis.
Hangata, bohloko bo matla ba hlooho bo tsamaisana le feberu, ho akgeha, ho lahlehelwa ke kelello mme ho hloka kalafo ya ka pele.
O mong o hlokang ho elwa hloko, ke o tsamaisanang le diphetoho boitshwarong ba motho, jwalo ka ho kgathala karolo e nngwe ya mmele, ho lahlehelwa ke pono le puo ka lehlakoreng le leng la mmele kapa ho lebala. Bana ba dutseng ba lla ke hlooho kapa batho ba dilemo di ka hodimo ho tse 50 ba hloka ho iswa ngakeng hanghang.
BAKENG SA DITLHALOSETSO TSE DING:
Headache Clinic: 011-484-0933 TNS Clinic: 031-904-1613
BONA SESOTHO June 2008
