sotho.1818.cover (KB)
O hlotse TLHALANO
LEQEPHE LA KANTLE
BONA SESOTHO July 2008
HO fela selemo jwale KB a lebetse ka lerato bophelong ba hae. Ho fela selemo a kgaohane le moratuwa wa hae wa dilemo tse tsheletseng kaofela, Terry Pinana eo ba neng ba se ba nyalane dilemo tse pedi kaofela. Ba na le ngwana a le mong wa moshemane, Phala. Pinana e ne e le motswalle e moholo wa KB, mohlahisi wa mmino wa hae... le mookamedi wa hae.
Ho kotsi ka nako e nngwe ho rata motho ka pelo ya hao kaofela, hobane moo le arohanang teng, o ka qetella o itemaditse hobane o bona e ka ho fedile ka wena. Kajeno ha a bona moo a leng teng, o ikutlwa a thaba a bile a kgotsofala jwalo ka ha a ile a atleha Dikgaung tsa Mmino wa Afrika Borwa esitana le hona paleng eo a bapalang ho yona.
"Ka nako e nngwe motho o e a ipolelle hore ntho e itseng a ke ke a e etse, empa a qetelle a bone hore o tlameha ho e etsa"
Sena ke seo KB a se etsang. Ka lebaka la ho ba maphathephathe ha hae, o ile a tlameha ho siya morahae ya dilemo di pedi le batswadi ba hae.
"Ke batla a holele mofuthung wa lerato la lapeng," ke yena eo. Batswadi ba KB ba ntse ba phela mme ba dula le setloholo seo sa bona mane Mmabatho.
"Ke rata a tsebe bophelo ba mahaeng. Ke holetse mahaeng, empa yena o hotse a sa tsebe le kgomo ena, o ne a qale ho e bona mohlang a neng e qala ho ya teng!
"Ho monate moo, ba bapala ha monate, o na le metswalle ya hae a yang le yona keretjhe!"
Phala ho bonahala a futsitse batswadi ba hae.
"Ha ke mo letseditse, o tla utlwa a mpinela e nngwe ya dipina tsa ka mohaleng, ka nako e nngwe, a bine ya Joyous Celebration. O bohlale, ntho o mo ruta yona ha nngwe feela, a e tshware," ho rialo mme enwa ya motlotlo haholo ka ngwanahae.
KB o bolela ha a ka ba motlotlo haholo ha Phala e ka ba sebini ha a se a hodile.
"Empa ka ho rialo, ha ke bolele hore ke tla mo qobella ho etsa jwalo," ke yena eo. "Le nna e bile boikgethelo ba ka ho ba sebini, ha ho mang ya ileng a nqobella ho etsa jwalo. Phala ke karolo ya bophelo ba ka."
Mona Jozi, KB o sebetsa dihora tse 12 ka letsatsi, matsatsi a mahlano bekeng ho Rhythm City.
"Ho a thusa hore ha o le mathateng, ho be le seo o itshedisang ka sona - seo e ba yona kgoro o nyolohang thaba eo ka yona," ho hlalosa yena.
"Ke ne ke le letswalo ha ke ne ke qala paleng ena e bapalang ka 6:30pm. Kajeno ke se ke itshepa haholo hobane ke se ke e tlwaetse karolo eo ke e bapalang. Ke se ke utlwisisa hore Lucilla ke mang, o tswa kae, o ya kae.
"KB jwale o iqaletse bophelo bo botjha. O itulela ntlong ya hae e kgolo, e majabajaba mane Morningside. Ha o kena ka tlung ena, o a e bona hore ke ya maemo, fenetjhara le mabota a yona, a a e paka. TV ya teng ke mofuta wa plasma-screen, mme ho di-CD tsa hae, re ka bala
Jay-Z, Lauryn Hill, 2-Pac, Ringo le Mbongeni Ngema.
"Ke rata ho ba le sebaka seo e leng sa ka mme ke haufi hantle le sebaka sa kgwebo. Ke na le merero eo ke ratang ho e fihlela." Ke itaolela kgwebo ya ka," ke yena eo. O ne a etse sena ka mora hoba yena, Terry le molekane wa bona kgwebong, King Beatmaker Mathemo, ba rere ho kwala khampane eo ya bona ya mmino. "Indasteri ena e hola hanyane, empa ke na le merero!"
O rata ho ba le diaparo tse nang le letshwao la hae mme hape a bone le dibini tsa basadi le tsona di etsa se etswang ke tsena tsa banna - ka mantswe a mang, o rata ho bona diphetoho.
Ha re tla tabeng ya boithabiso teng, KB o na le tsela e ikgethang ya ho etsa seo.
"Batswadi ba ka ba na le motse haufi le Sun City, ka hoo, ke e ke robaletse teng ha ke tlile Moketeng wa Dikgau tsa Mmino wa Afrika Borwa. Seo se mpha monyetla wa hore ke fihle moketeng ke kgatholohile, ke le mafolofolo."
Seo a se ratang haholo, ke ho ikopanya le lelapa la habo, ke ka hona a ratang ho dula a kgutlela lapeng jwalo ka mafelo a beke. O etsa matsapa ohle a ho ba lapeng bonyane habedi ka kgwedi. Ka nako e nngwe o ikela ka koloi ya hae ya BMW, e mmala o motsho kapa a nke sefofane.
"Re tsheletse lapeng mme jwale ke dumela ha e le nako ya hore le rona re ba hodise. Ha ke fihlile, ha ke dule fatshe, ke ya hodimo le tlase, ke hlwekise ke phehe, batswadi ba ka ba dule ba qhanolle.
"Haesale ke fihla mona Joburg, ke hlokometse bohlokwa ba batswadi bophelong ba ka mme ke rata ho ba leboha ka tsohle tseo ba nketseditseng tsona. Ba dutse ba nkgothatsa.
"Ba ne ba sebetse ka thata ba ikahela metse e mmedi hore ba se ke ba nna ba nkgathatsa. Ba ne ba sebetsa ka thata, ba rapela, ba re lakaletsa katleho le mahlohonolo bophelong, mme jwale ba motlotlo ka katleho eo ke e fihletseng." [s]
KB o fetotse tahlehelo ya hae katleho. Pale ka Patricia McCracken
Ditshwantsho ka Ivan Naude; moriri le mokgabiso wa sefahleho Faith Seuoe; setaele Marina Walsh; kgokahanyo Patricia McCracken; diaparo: YDE; dibutshi: Woolworths; masale: Ruby In The Dust
BONA SESOTHO July 2008
Keletso tse 5 tsa KB ka tlhalano
1. Amohela: "Amohela maemo le pele o fihlela qeto."
2. Arohanang: "Nna le yena re arohane. Re bonana feela ha ho na le tlhokeho."
3. E ba mosa: "Ke ne ke mo hlompha, haholoholo jwalo ka ntata ngwanaka."
4. Pinyane: "Ke a tseba hore dintho di sinyehile kae, empa seo ha ke rate ho se qoqa le batho."
5. Bokamoso: "E ba le merero e metle ka bokamoso ba hao mme o sebeletse ho e fihlela."
