sotho.1752.legaljun
Re netefaditse hore dikeletso tsohle tseo re di nehwang ke tse nepahetseng. Empa nnete ke hore nyewe ka nngwe e hloka ho fuputswa mme Scorpion Legal Protection (Pty) Ltd, ditho tsa BONA le baphatlalatsi ba makasine ena, ba ke ke a rwala boikarabello ba ha motho a hlotswe ke nyewe kapa a utlwisitswe bohloko ka mokgwa ofe kapa ofe hobane a ile a latela dikeletso tseo re faneng ka tsona.
ya hao ka molao
MATHATA: Ke ne ke nke pholisi ya inshorense ya R150 000 bakeng sa tshireletso ya fenetjhara le thepa e nngwe ya ka. Selemong se latelang seo, moeletsi wa ka wa inshorense a mpolella hore o a siya khampaneng eo mme a nkgothaletsa hore le nna ke tjhentjhe pholisi ya ka e iswe khampaneng eo ya hae e ntjha. Ka dumela mme ka kopa hore ho eketswe boleng ba pholisi ena ebe R250 000.
Ho fetile dibeke tse tharo jwalo ke sa fumane tokomane e ntjha ya pholisi eo ya ka ho tswa ho yena kapa hona khampaneng.
Ka mora matsatsinyana, ka kenelwa ke dikebekwa tsa thuba motseng wa ka. A boela a nthusa ho tlatsa diforomo tsa ho fumana matshediso a tshenyehelo eo, a romela khampaneng.
Khampane ena ya inshorense ya hana ho mpatala hobane ba re ke tlameha hore ebe ke na le alamo e hokahantsweng le ba khampane ya balebedi, eo nna ke neng ke se na yona.
Ka ba hlalosetsa hore moeletsi wa ka ha a mpolella taba eo mme hape ha ke so fumane le tokomane ya pholisi ya ka, ka hoo, ha ke tsebe hantle ka maemo a yona. Ka mora matsatsi a 45, ka fumana tokomane eo ya pholisi posong, ya ba hona ke qalang ho bala ka maemo a pholisi ya ka.
Nka etsa jwang ho buseletswa tahlehelo ya ka""
KELETSO YA SCORPION:
Ha moeletsi wa inshorense a tjhentjhela pholisi ya motho ho tloha khampaneng e nngwe ho ya ho e nngwe, e lokela ho tsamaya le maemo a yona a le jwalo ka ha a le jwalo.
Ha ho hlokahale hore ho tlatswe diforomo tse ntjha pele o ka romellwa tokomane e nngwe.
Empa ha ho ekeditswe tjhelete ya inshorense, ke hona moo ho tlamehang hore ho etswe tumellano e nngwe e ntjha. Ha ho ena le diphetoho pholising, moeletsi le khampane ba lokela ho tsebisa monga pholisi ka tsona hanghang.
Ha ba sa etsa jwalo, ke bohlaswa bo tshabehang. Ho a swabisa hore khampane ya inshorense e hanne ho lefella tahlehelo ya hao mme ho ya ka ba ha Scorpion Legal Panel, o na le nyewe e utlwahalang kgahlano le bona mmoho le moeletsi eo. Ke taba e thata mme re o eletsa hore o kope thuso ya leqwetha le tla sekaseka nyewe ena ya hao mme le o thuse ho qosa khampane eo. [s]
Mathata a inshorense
Romela mathata a hao ho BONA Legally Yours, Box 32083, Mobeni 4060 - mme o fumane monyetla wa ho buisana le leqwetha metsotso e 30 mahala, mohlomong dikantorong tsa ona hohle naheng ena kapa ka mohala.
SE NKILWE KE SEBONTSHI
O e tlisetswa ke ba ha BONA le Scorpion Legal Protection
