sotho.1706.sisarah
SE NKILWE KE DIBONTSHI
KE DILEMO di 30, ha tsa moratuwa wa ka di le 70. Re ne re qale ho intsha ka 2002. O ne a kope hore re dule mmoho hobane a se a hodile. O ne a ntshwere jwalo ka mofumahadi, empa o tjhentjhile jwale! Kajeno o se a bitsetsa basadi ba bang lapeng, re robetse mmoho betheng mme ha a rata, o tjhentjhana ka rona bosiu kaofela. O sa tswa mpolella hore o kopile e mong wa bona ho tla dula le rona.
Ha ke tsebe seo ke lokelang ho se etsa hobane ke a mo rata.
BA, Edenvale
Taba ya hao e a tshosa - o bolela hore monnamoholo eo ke yena ya etsang tsohle tseo o di boletseng! Ha ho pelaelo, o ipapalla ka lona feela.
Empa o na le boikgethelo.
O ka mamella hobane o a mo rata kapa o intshe sepaneng seo sa hae ka ho mo kopa ho kgetha pakeng tsa hao le basadi bao ba bang.
Ho ya ka lengolo la hao, ha o batle ho mamella seo. Bonneteng mona ha o lenyalong ka sethepu kapa ho jwalo?
Ena ke ntho esele. Le ratana le monnamoholo ya ratang basadi - mo kope ho etsa qeto?
Ipotse hore: na o fela o mo rata kapa o mo utlwela bohloko? Ke ka hona o dumetseng ho tla dula le yena. Mohlomong o tshaba ho mmotsa hobane o tshaba ho fellwa ke madulo...
Haeba ho le jwalo, o tla utlwisisa hore o keke wa etsa dintho tsena ka bobedi. Ha o tshaba ho phonyohwa ke mejo ya monnamoholo, o tla tlameha ho mamella sohle seo a se etsang.
Athe ha o mo rata e le ka nnete mme o batla ho tswelapele le dikamano tsa lona, o tla tlameha ho buisana le yena ka taba ena. O ikutlwa o sa lokoloha.
O hopole hore ho etsa thobalano le batho ba fapaneng ho kotsi matsatsing a kajeno. Mohlomong ha a kgathatsehe ka EITSI dilemong tseo a leng ho tsona, empa lona le sa le banyenyane, le sa ntse o ena le bokamoso bo botle...
Ha a tsotelle maikutlo a hao, o tla tlameha ho amohela hore ha a sa o rata. O itshenyetsa nako ka yena, o beha le bophelo ba hao kotsing! Bua le yena. Mo nehe monyetla wa ho lokisa dintho.
Na ke mo rata tlolo?
Mathata a ka ke hore ke na le bodutu. Ke na le moratuwa mme tsohle di ne di tsamaya hantle ho fihlela ke amohela Modimo. Moruti wa ka o mpolelletse hore ke phoso e kgolo ho ratana ha o pholositswe. Ke rata moratuwa eo ka pelo yohle ya ka, empa ke rata le Modimo haholo, hoo ke bileng ka tlamehang ho mo hlala.
Ka mora nakwana ke ne ke qale ho hlokomela hore kereke ena e tletse boikaketso le leshano, ke bile ke tswile ho yona. Jwale ke hlolohelwa moratuwa wa ka haholo.
Ke tshaba ho mo toba ke bue le yena. Ke tla etsa jwang ha a se a iphumanetse motho e mong? Ke tla utlwa bohloko. Na o nahana hore ke mo rata ho feta? Ha ke ipone ke tla ba le mohlankana e mong ntle ho yena, hobane ke a mo rata. Ke kopa thuso!
VB, Amsterdam
Tjhe ha se hore o mo rata tlolo! O mpile feela wa ya le kgongwana hodimo ha o kopana le batho basele, empa o ne o hopola hore o etsa tsona, wa qetella o lahlehetswe ke motho eo o neng o mo rata.
Se molemo ke hore feela o latele pelo ya hao. Hlalosetsa moratuwa wa hao wa mehleng, ka maemo a hao a ditaba ka botshepehi. Ke na le tshepo ya hore o tla o utlwisisa mme a o tshwarele.
Haeba a se a na le moratuwa e motjha, o tla tlameha ho amohela maemo ao. Se kgathatsehe haholo. Bonyane o sebete sa ho ipona diphoso bakeng sa hore o nne o ithetse ho ya pele.
O lokela ho utlwa maikutlo a hae e le hore o tsebe hore o eme kae, o tsebe ho ipatlela monna e mong eo o tla boela o mo rata hantle jwalo ka yena.
Setho se sarolohile
Ke dilemo di 33 ke dutse ha monate lenyalong la ka ke na le bana ba babedi ba banyenyane. Ke hlokometse ka mora ho beleha wa bobedi hore setho sa ka sa bosadi se sarolohile ho feta ka moo se neng se le ka teng pele. Ke kgathatsehile hore monna wa ka a ka nna a ntjhentjhela. Na ho na le seo nka se etsang ho se honyela?
Ya thabileng, Joburg
Se etsahalang ho wena ke ntho e tlwaelehileng, ka hoo se ikgathatse ka letho! Ho beleha ka mokgwa wa tlhaho ho sarolla setho sa bosadi empa mesifa ya rona e kgona ho honyetsa setho sena hore se kgutlele madulong hantle nakong e ka etsang selemo ka mora ho beleha.
Ho na le boikwetliso bo thusang ho potlakisa mosebetsi ona. Se monate ka boikwetliso bona ke hore o ka bo etsa neng kapa neng, kae kapa kae - o le tekesing, o hlatswa dijana kapa o ikemetse moleng - ha ho le motho ya ka o hlokomelang.
Seo o ka se etsang feela ke ho tiisa mesifa ya setho sa hao - jwalo kaha ekare o leka ho tshwara moroto hore o se tswe. Tshwara moya metsotswana e ka bang mehlano pele o lokoloha hape. Leka ho phetapheta makgetlo a 10, ha hlano ka letsatsi.
Nka ema nako e kae?
Re dilemo di 26 le moratuwa wa ka mme re holetse sebakeng se le seng leha a se a le Gauteng. Ke mmona ha a etetse habo feela, empa ho na le mathata dikamanong tsa rona. O na le baratuwa ba bang ba babedi.
E mong wa bona ke wa hona sebakeng sa habo rona mme ke baahisane. Ha a kgutlile Gauteng ha a ntumelle ho mo etela pele ho eo mme ba se ba bile ba na le ngwana. Ha a sa ikgathatsa haholo ka nna leha ho le jwalo ke mo rata ka pelo yohle ya ka, leha yena a sa ntsotelle jwalo.
O se a bile a mpolelletse hore ke se hlole ke mo etela kapa hona ho mo letsetsa ke emele yena. Eitse hoba le nna ke ime, a pheha ngwanaka. (Ka bomadimabe mpa ya ka e ne e phophome.)
Ke se ke utlwile le hore o na le moratuwa e mong e motjha!
ZB, Wesley
Ha o ka mamela monna enwa, o tla senya bophelo ba hao kaofela... mme o tla phela ka meokgo letsatsi le letsatsi. O bapala ka lona le le kaofela, hohang ha a le nahanehe. Ke a tseba hore o a mo rata, empa ha a o hlonephe. Pelo ya hao e bohloko empa o tshaba ho kgaohana le yena.
Se dumelle ho theolwa seriti! Monna enwa ha a o rate mme o itshenyetsa nako ka yena. O ka nna wa fumana monna ya tla o rata, a o hlonephe!
Inahanele mme o lebale ka monna enwa. [s]
matla a bophelo
Ho tsofala ya ratang
O dilemo di 30, ha tsa monna di le 70, mme o na le baratuwa ba bang
KAOFELA HO ROBALWA MMOHO
Sis Sarah
o tla araba dipotso
tsa hao mme a o thuse ho thoba pelo e bohloko
Ngolla ho:
Botsa Sis Sarah,
Box 32083, Mobeni
4060.
Ela hloko:
Sis Sarah
ha a na bokgoni
ba ho rarolla
mathata a tsa bophelo bo botle.
Naledi ya kgweding ena
Naledi ya bolo
25.10.80
Sebapadi sa morao sa Joburg, "Mbazo" o kene ho Blackburn Rovers ka Pherekgong 2005. O se a bapaletse naha makgetlo a fetang a Shaun Bartlett.
DINALEDI
(Mar 21 - Apr 20) Dintho di a tshepisa mme ke nako ya hore o sebedise menyetla ya ho phethisa toro ya hao ya dilemo. O tla atleha ha o le senono kapa o le radipapadi - bokgoni ba hao bo tla hlahella.
(Apr 21 - May 20) Ela bophelo ba hao hloko, o ithate, o lokela ho kwena mmeleng mme o be motle haeba o batla katleho kgwebong. Rera dintho hantle mme o tsitse mererong ya hao.
(May 21 - Jun 21) Ke nako e ntle ya ho e tsa ditshepiso tsa nako e telele le ho ntlafatsa dikamano tse teng. Menyetla ya mosebetsi e metle mme o ka nna wa rateha metswalleng.
(Jun 22 - Jul 22) Tjhentjha lehlakore mme o ka nna wa iphunyetsa tsela e lebisang katlehong ha o ka sebedisa menyetla ya thuto ya hao. O tla fumana phaello ha o ka sebedisa mehopolo ya hao hantle.
(Jul 23 - Aug 23) O rata dintho tse ntjha mme ke nako ya ho eta, o ithute dintho tse ntjha o ena le bao o ba ratang kapa le ba lelapa. O ka nna wa ba le mehopolo e metjha e bitsang hobane ke kgwedi ya hao ena.
(Aug 24 - Sep 22) Tsetsisa maikutlo kgwebong le mosebetsing ha o batla monyetla wa ho ntlafatsa maemo le moputso. Ke nako ya lehlohonolo ha o sa sebetse kapa o nahana ho tjhentjha mosebetsi.
(Sep 23 - Oct 22) Ke nako e ntle ya ho theha setswalle ka hoo, boloka metswalle eo o nang le yona hantle mme o eketse e meng e metjha. Dikeletso tsa ba bang ba seng ba atlehile di tla o thusa hore o atlehe hape o itshepe.
(Oct 23 - Nov 22) Thapelo le tshepo di ka o thusa hore o boele o itshepe le hara mathata. Mamela letswalo la hao le tla o thusa ho ntlafatsa dikamano tsa hao le ba bang le maemo a lona kaofela.
(Nov 23 - Dec 21) Ke selemo sa hao sa katleho ho tsa profeshenale le boithabisong. Itshepe ha o batla ho fihlela seo o se labalabelang mme o tla atleha ha o hlophisa dintho hantle ka tshwanelo.
(Dec 22 - Jan 20) Ithute ho laola tjhelete ya hao hantle, o be sedi. Phema ho e sebedisa bohlaswa. Ha o le sedi o ka nna wa fumana mekgwa e meng e metjha ya ho iketsetsa tjhelete lehlakoreng.
(Jan 21 - Feb 19) Sheba menyetla e metjha mosebetsing. O na le bokgoni ba ho kgahla dipuisanong, ka hoo se lebale bao o kileng wa buisana le bona ba ka nna ba o thusa mosebetsing wa hao.
(Feb 20 - Mar 20) Shebana le lelapa la hao ha o batla ho ntlafatsa dikamano le moratuwa wa hao.Sebedisa bokgoni ba hao ho etsa ho be monate lapeng mme le hlophise boithabiso le ho intsha mmoho.[s]
DINALEDI TSA HAO
