sotho.1676.S'Thandiwe
pale ka DOUG GORDON
Isidingo e nyollela Siyanda maemong
STHANDIWE Kgoroge ke naledi eo jwale e seng e kene ka sekgahla kgwebong. O bapala karolo ya Siyanda, ho Isidingo mme ke mofumahadi dikopanong tse kgolo tsa kgwebo, o tena lethathama la diaparo tsa feshene ya hae - le ho belehwa ha ngwana wa hae wa boraro ho bonahala eka ho tla tjhentjha pale ena haholo.
S'Thandiwe o dilemong tse ka hodimo hanyenyane ho tse 30 mme o se a behilwe profeshene ya hae maemong a matle, ho TV le kantle ho yona.
O nyetswe ke Tony Kgoroge, molaodi ya pele wa difilimi, mme ka mora ho sebetsa dilemo tse supileng kaofela ho Generations, e le sebapadi le molaodi, ya ileng a ithuta ho mamella empa a batla ho fumana karolo e nngwe ya sebapadi se pele - a bile a batla ho ba le karolo e kgolo ho tsa kgwebo.
"Pelo ya ka e ne e le bohloko ha ke lokela ho tlohela Generations hobane ke ne ke qale ho bapala ho TV ka karolo eo mme ke ne ke se ke rata bophelo ba Zoleka le Zinzi," ho boletse yena.
"Tjhe ke nnete, dilemo tse supileng ha se papadi o bapala karolo e le nngwe. Ke ne ke se ke batla ho qala lelapa la ka, ke dule le monna wa ka eo ke mo ratang athe le kgwebo ya ka ya feshene e ne e se e hola, e ntlhoka.
"Isidingo, ya hlaha le karolo eo ho neng ho sa dumelehe hore ke e hane ya Siyanda - setsebi sa ditjhelete, se sebedisang tjhelete le dipolotiki ho ipeha maemong a hodimo. Bahlahise ba yona le bona ba thabetse ho kenyelletsa boimana ba ka karolong eo ke e bapalang mme maikemisetso a Siyanda a batla a tshwana le a bophelong ba ka ba nnete: ke mosadi ya batlang sohle hore se tle ho yena."
Ka 6.30 mantsiboya hara beke, S'Thandiwe o bontsha ka bonono bo makatsang ka moo Siyanda a tsebang ho etsa mesebetsi e ditshila ka teng a kopane le senokwane sane se lekorwana, sa Isidingo mme a tswe moo a iketseditse phaello
e ntle.
Le yena Barker Haines (Robert Whitehead) ka sebele o a mo kgaruma ha a utlwisitswe bohloko ke ho hlanohelwa ke moradi wa hae eo e sa leng a mo qhoqhobetse, eo jwale a seng a ngongorehiswa ke mosadi eo a neng a mo nyetse.
Siyanda le yena o bohale hoo a kwalang Barker ya tsebisahalang ka ho tella filiming ena.
"Barker ke rakgwebo ya bohlale empa Siyanda yena o batla ho ba le matla a kang a hae," ho hlalosa S'Thandiwe. "Ho na le ntho e nnwge eo ba tshwanang ke yona - lerato le leholo la tjhelete!"
Setaele le tjheseho ya Siyanda e tshwana hantle le ya batho ba bangata ba atlehileng matsatsing ana ba tenang lethathama le ikgethang la hae la diaparo, Poetry Museum.
S'Thandiwe o ne a qale ho rentela sebaka se senyenyane sa ho rekisa diaparo tsa kakanyo ya hae mane Doornfontein, ka mora nako a eletswa ke motswalle e mong wa hae wa lethathama la diaparo la Loxion Kulcha, Sechaba Mogale a re a bule lebenkele la hae mane Melville.
A qala ho rekisa lethathama la diaparo tsa hae feela le dintho tsa ho ikgabisa mme a hira ditsebi tse ikgethang tsa ho loha difaha le ho lokisa diaparo.
Ho tloha ka Tshitwe 2004 dinaledi tse ngata di ne di qale ho bonahala di tenne diaparo tsa hae. "Re ntlheng ya leano lena mme maikemisetso ke hore diaparo tsena di qetelle di se di rekiswa le dinaheng tsa mose," ho bolela S'Thandiwe.
O ikemiseditse ho ya fihlella le Hollywood. Pele a kena ho Isidingo, o ne a hlolwe ke ho fumana karolo eo ya bohlokwa filiming ya Tsotsi, moo e neng e tla ba mosadi wa morui eo lesea la hae le neng le kwetelwe ke moshanyana wa seno-kwane.
"Ke utlwisisa hantle bohloko boo mosadi eo a neng a bo utlwe. Le nna ha motho a ka utswang ngwanaka, nka batla ho iphetetsa ha bohloko ho yena.
"Karolo eo e ne e hatjwe ke motswallaka Nambitha Mpumlwana, a e bapala ka bokgabane bo boholo. Le nna ke tla e fumana karolo e jwalo ka le leng."
Ha jwale yena le Siyanda ba lebelletse lesea - ka mahlakoreng a mabedi a khamera.
"Seo nka o bolellang sona feela ke hore, eo ngwana ha se wa Barker!"
Ntata S'Thandiwe ke setsebi sa dithuto tsa bodumedi mme yena o ne a hlahele Ohio, mane USA, ka nako eo ba ntseng ba ntshetsa pele dithuto tsa bona moo. A ya kena sekolo se phahameng mane Canada ka nako eo ba neng ba dula teng.
Ka mora moo lelapa la habo la kgutlela KwaZulu-Natal moo a fihlileng a etsa dithuto tsa drama, University Of Natal mane Maritzburg.
"Haesale ke rata ho ba sebapadi," ho bolela S'Thandiwe. "Sekolong sa Sontaha ke ne ke kgetha ho bapala karolo ya Maria nako le nako. Ntle ho moo ke ne ke batla ho ba mosebeletsi wa tsa kahisano.
"Empa mme a ntlhokomedisa hore ho ba mosebetsi wa tsa kahisano ho tla ba boima haholo ho nna moyeng hobane ke na le kutlwelo bohloko haholo baneng. "Jwale ke hlahisa maikutlo a ka dikarolong tseo ke di bapallang difiliming!" [s]
1 BONA SESOTHO - August 2007
SE SEHOLO: Setaele le botle - ke tsa S'Thandiwe Kgoroge!
S'Thandiwe o ka hare jwalo ka phio fesheneng le mesebetsing e ditshila ya Barker Haines mme o a atleha bophelong bo kang ba Hollywood...
Bonaledi
LE LETSHEHADI le KA TLASE: S'Thandiwe le lethathama le leng la diaparo tsa hae. O batla diaparo tsa hae di se tshwane le tsa ba bang.
BONA SESOTHO - August 2007 2
