sotho.1452.Sindi
Ke kopane le sefelekwane sena ho Zone 14...
Ke tswaletswe ho bapala karolo ena
Bophelo ba hae ba nnete bo ne bo le moferefere ho feta ba paleng...
pale ka DOUG GORDON
ditshwantsho ka PETER WHITFIELD
moriri, mekgabiso le diaparo: FAITH SEUOE
setaele: MARINA WALSH; bohokahanyi: PATRICIA McCRACKEN
O TLILE Jozi a tletse setumo le ho iteka lehlohonolo. O ne a kopane le Brenda Fasie. Setsokotsane sa lerato sa ba nka, empa ngwanana enwa wa KZN, a kgona ho phonyoha. "Ditoro tsa ka ke di fihletse ka meokgo le menyepetsi," ho rialo Sindi Khambule. "Ke a tshepa ke tefelo eo ke neng ke e nehwa ke Modimo ka ho nkarabela dithapelo tsa ka."
Dithapelo tsa hae di arabilwe jwalo ka ha dimilione tsa babohi ba pale ya TV, Zone 14 ho SABC1 di babatsa ka moo sefelekwane sena sa mosadi se bapalang ka teng. Sindi ya dilemo di 32, haesale a lakatsa ho ikahela lebitso ho TV mme o motle ho feta molekane wa hae wa "setabane."
Ke tswaletswe karolo ena," ho rialo Sindi. "Ke bapala jwalo ka yena mme ke ka hona le dingodi tsa pale di mpitsang 'Sindi.'
"Boraditaba ba dutse ba le ka mora hae mme ke a bo tseba bophelo bo jwalo, bo a tshosa.
"Nakong ela ke sa na le Brenda, o ne a tlwaetse ho nqobella hore le nna ke iketsetse mosebetsi, empa ho ne ho le boima. Dipontshong tse ding le tse ding, bahlahise ba ne ba bolela hore ke ne ke le melomong ya boraditaba ho feta dipale tsa bona."
O ne a balehele boraditaba ka hore a arohane le Brenda mme a kena ho TV a sa tsebisahale. Morero oo wa hae o ne o mo sebeletse.
Sindi o ne a ye ditekong tsa karolo ya Nobelungu ho Yizo Yizo 3, mme o ne a makatse bahlahise ba pale eo.
"Ho Yizo Yizo 3, ke ne ke rata ho ba bontsha bokgoni ba ka - hore ke mosadi ya itshepang, ya tsebang bokgoni ba hae.
"Tlelapong ya hae, o ne a na le kgwebo ya hae mme ho se motho ya ntseng a mo susumetsa ka morao. Ke ne ke hlile ke bontsha seo ke leng sona."
Ke ne ke hape kgau ya ho ba setlabotjha se pele dikgaung tsa Duku Duku mme ka ipetlela tsela paleng ena ya Zone 14.
O a tseba hore e ka kang kgatello ya ho ba naledi ya TV le hore ho boima jwang ha dikhamera di se di o shebile.
O ne a phela bophelo boo dilemo tse nne kaofela - ho tloha letsatsing leo a neng a kopane ka lona le MaBrr Tandoor club mane Yeoville. "Ha ke ne ke fihla Jozi ka 1995, ke ne ke sebetse Windybrow Theatre, ke dutse ke lebetse dibapadi mme ka nako eo, ke ne ke etsa dithuto tsa diploma ya botitjhere," ho rialo Sindi.
Ho ne ho le boima. O ne a siile morahae, Bayanda, (ya dilemo di 13 kajeno) le mmae mane Maritzburg.
O ne a dula Yeoville a renta ka ho sala le bana ba monga ntlo eo.
"Ke ne ke etse dithuto tsa JCE mane Wits ka leba lapeng ke le mong," ke yena eo. "Banna ba bangata ba ne ba ntshepisa ho ntlhokomela ha ke ne nka etsa thobalano le bona, empa ka hana.
"Ke ne ke le sebapadi, e seng sehlola - mme ha ke ne nka etsa phoso, tsohle di ne di tla senyeha.
"Bosiung bo bong ba Labone, ke ne ke tshwarwe ke bodutu bo boholo. Ka nka R20 ya ka ya ho qetela ka tsamaya le metswalle ho ya Tandoor club e neng e le haufi le moo ke neng ke dula teng.
"Ho ne ho le lerata mme ke ikutlwa ke sa tsitsa ke se ke bile ke batla le ho tsamaya.
"Hang ka bona Brenda a se a le ka pela ka, a se a ntumedisa.' Ke ne ke thabe ka tshoha ka nako e le nngwe, le batho bohle ba maketse."
O ne a hloka motho ya itshepang, ya tsebang ho etsa dintho di etsahale. Hopola hore Brenda ke mokaubere o seng o hlahisitse dinaledi tse neng di sa tsejwe tse kang Rebecca Malope le Lebo Mathosa.
Dikamano tseo di ne di kenye Sindi bonaleding hang hang. Brenda e ne e be yena moratuwa le motshehetsi wa hae, a mo ruta boitshepo esitana le maqheka a katleho. Sindi o ne a ithute dintho tse ngata ho naledi ena - ho tshwara dikopano, ho bina, ho shebana le boraditaba, ho ya meketeng e pele, ditlelapong le dikonsareteng.
E ne e be tsela ya ho ithuta dintho tse ngata ho tsa boithabiso ka nakwana feela. Ho ne ho sa dule ho le monate ka dinako tsohle dikamanong tsa bona, ka nako e nngwe, ba ne ba qabana ho be hobe.
Sindi mmino wa hae o ne o mo etse hore a dule a hahlaula le Brenda, ba bine dikonsareteng kontinenteng ena kaofela esitana le dibayeng. Toro ya hae e kgolo e ne e le ho sebetsa ka thata - haholoholo jwalo ka ha a ne a atamelane le naledi eo e leng molekane wa hae.
"Ha ke fihla ditekong tsa TV, ba ne ba re ke nepahetse haholo paleng ya bona," ho hlalosa yena. "Ho ne ho be hobe ha ke ne ke etela lapeng.
"E mong motswalaka wa mosetsana, o ne a re ke se ke ka mo tshwara ka letsoho ha re ne re tsamaya seterateng - 'hobane batho ba tla nahana hore le yena ke tharasi jwalo ka nna.' Ba lelapa le metswalle ba a ntsheolla. Ka 2003, ha hlaka hore ke nako ya ho tswelapele."
Kajeno batho ba nahana hore Sindi o tlameha ho phela ho latela setumo sa hae.
"Ke setlabotjha mme ke rata ho ikahela lebitso ho TV. Ha ke so be le tjhelete e lekaneng hore ngwanaka a qete materiki, a ye yunivesithi, ha ho tjhelete e kae eo re e amohelang mona ha jwale."
Empa e ka dintho di tla fetoha.[s]
BONA SESOTHO - March 2006
Moriri wa hae o a ntena...
Moloho wa hae o bohloko, empa karolo eo a e bapalang e mo kgothatsa kamehla ho ya mosebetsing. Patrick Mofokeng, o re ntho e thata haholo ka karolo ya King Sibiya, eo e leng sebapadi sa bolo ho Zone 14, ke taba ya ho lokiswa moriri dihora tse tharo kaofela beke le beke. Empa diketsahalo tseo o mo fumanang a sunana le dinaledi tse kang Sindi Khambule le Thembi Seete, di etsa a lebale ka sena.
Setshwantshong seo re mo nkileng le Sindi ho sona, o bonahala a bontse. Sindi o ka mokgwa o mong mona, o tshwaretse Patrick haufinyane, a tsamaye a mo sidila diropeng, a mo pholle le moloho a leka ho bontsha seo babadi ba BONA ba ka se lebellang paleng ya pele ya marato ya bolo.
Karolo eo a e bapalang, ya mohatsa King, e bakela Sindi mathata. "O se a kenwe ke bonaledi haholo, hang feela ha ba qala ba qabana, o hula karete ya hae ya mokitlane a ye mabenkeleng," ho rialo Patrick. "Ho ne ho le betere nakong eo King a neng a bapala Italy, jwalo ka ha a se a bapala kwano, ho Tiger Stars, ho bonahala eka talente ya hae e a fela.
"Ha le le metswalle ho ba bobebe ha le fihla dikarolong tseo le tlamehang ho sunana ho tsona," ke yena ka boswaswi. "Re a nyakalla re kgatholohe. Haufinyane ke tla suna Thembi Seete (ya bapalang karolo ya Nina Moloi). Ke monna ya lehlohonolo - ba a ntefa ho etsa sena."
Jwalo ka Mmabotle wa mehleng wa Soweto, Sindi o sebedisa lebitso la monnae bakeng sa setumo sa hae. (Sindi: diaparo: Big Blue; mabenyane: ke a Sindi; Patrick: hempe: Markhams; borikgwe: Edgars; dieta kaofela: Europa Art; dibolo: Totalsports)
BONA SESOTHO - March 2006
