sotho.907.beauty
O nwa metsi a mangata
Re dutse re kgothalletswa ho nwa metsi a mangata - na a fela a le molemo- Dipersente tse 70 tsa mmele ya rona di entswe ka metsi mme ho nwa dikgalase tse tsheletseng ho ya ho tse robedi ka letsatsi ho tla re thusa ho ntsha metsi kgafetsa le ho boloka letlalo le le mongobo.
Ho ja tjhokoleiti ho baka dihloba
Barati ba tjhokoleiti hohle lefatsheng - ba a kgathatseha! Ke nnete ho e ja haholo ha ho a loka, ho ama bophelo ba hao hampe mmoho le letlalo. Ho ja dijo tse nang le phepo mmoho le tjhokoleiti e nyenyane ka beke ha ho senye letho. Sesosa sa dihloba ke diphetoho tsa di-hormone mme maemo a mpefatswe ke kgatello.
Oli ke sera sa letlao la hao
Ke dilemo jwale tshebediso ya oli letlalong e sa kgothalletswe. E na le lebitso le lebe ho tsa botle mme ka bomadimabe ho thwe tshenyo ya yona ke e sa lokiseheng ka bonolo. Kajeno ho sebediswa ditlolo tse nang le metsi ho feta oli.
Empa ho phema oli ka hohlehohle, ha ho a loka - kaha ke yona e fepang letlalo, e le hlwekise. E molemo letlalong le ommeng, le boi le le mafura le bileng le ratwang ke dihloba. Oli e qhibidihisa mekgabiso ya sefahleho, e le hlwekise, e le boloke le phetse hantle le bile le fepehile ka tshwanelo.
Dioli tsa bohlokwa ke tsona tse tshetjwang tlhwekisong ya letlalo. E tsamaya ka hara letlalo ntle le hore e le lematse, e a le sireletsa mme e le fepe, e be e le thuse hore le se lahlehelwe ke mongobo. Ha le fellwe ke mongobo, e leng mathata a letlalo la batho ba matsatsing a kajeno.
Clarins e na le lethathama la mekga e meraro ya tlhokomelo ya letlalo e ikgethang bakeng sa le ommeng kapa le mafura le Return To Roots (ba letsetse ho 011-485-5526) ke ditlolo tse ikgethang bakeng sa letlalo la Maafrika Borwa.
Ha o ena le letlalo le tlwaelehileng, leka avocado e batang, jojoba kapa almond oil. Ho molemo ho e tlotsa bosiu ntle ho haeba o sa tlo kgabisa sefahleho. Itlotse ka oli hanyenyane le molaleng, o e tlohela motsotso pele o e tlosa ka sepontjhe se mongobo kapa boyanatshwele.
Coconut oil e nolofatsa letlalo le moriri. E futhumetse pele o e tlotsa letlalong la hlooho, e tlohele metsotso e 15 pele o hlatswa ka shampoo, o be o pudutse moriri.
O tlameha ho ja divitamin
Ke dilemo jwale ho phehisanwa ka hore re lokela ho nwa dipidisi tsa divitamin kapa tjhe.
Ditsebi tsa phepo le dingaka di dumela hore dijo tse nang le phepo ke tsa bohlokwa. Ha se ba bangata ba kgonang ho ja dijo tse nang le phepo. Hantle jwalo ka ha dipidisi di ka o thusa bophelong ba hao empa tse sa lokang di ka nna tsa o sulafaletsa bophelo.
Se ithetse ka ho nahana hore divitamin ke tharollo ya mathata a bophelo bo botle. Ho hlwekisa mmele ha ho bolele hore tsohle di se di tla tsamaya hantle. Ha ho divitamin tse ka kwalang sekgeo sa ho phela bophelo bo botle.
Hara Maafrika Borwa a mararo, a le mong wa ona o nwa dipidisi tsa divitamin. Boleng ba meriana ya mofuta ona re bo fumana jwang- Mmele o monya tse kae- Kapa di re thusa ho rota moroto wa ditjeho-
Ha ho ka moo re ka tsebang bonnete ba taba ena. Ho ya ka ditlhoko tsa motho le motho - le dikhemikhale tsa mekgabiso ya sefahleho di tjhentjha letsatsi le letsatsi.
Pele o reka eng kapa eng e ka nnang ya senya bophelo ba hao, qala ka ho etsa dipatlitiso. Se tshepe sohle seo o se bolellwang ke bahlahise ba dietswa tseo. Hape, eba sedi ho di kgetha. Dijo tse ngata le dipidisi di bapatswa ha monate. Ha dipidisi tsena di o thusa, o lokela ho bona sephetho se setle ka mora dibeke tse nne. Hlahloba meno a hao - ho tseba hantle seo o se jang ho ka o thusa mme o tsebe le bobe ba tsona.
Foundation le phofshwana ya ho kgabisa sefahleho di kwala masobana
Ena taba e se buuwe dilemo tse ka hodimo ho tse 50 leha e le tshomo feela jwalo. Erekaha dilemong tseo phofshwana e ne e le yona feela seetswa sa ho ikgabisa. Matsatsing ao dinaledi tsa difilimi di ne di itlotsa haholo ka mekgabiso ya sefahleho, mme hape e le bopulamadiboho ho tsa botle.
Kajeno ho se ho ena le mekgabiso ya sefahleho e sa loyang haholo. Masobana a le letlalo a ka kwaleha mohlomong ha e le a maholohadi mme hona ho bolela hore ha o hloke ho iphotla ha o ne o kgabisitse sefahleho hobane o tshaba hore masobana a le letlalo a tla kwaleha.
Foundation le phofshwana ya ho kgabisa sefahleho ya matsatsing a kajeno, e se e hlophiseditswe hore e tsebe ho kwaela letlalo hantle, e le sireletse empa e se ke ya kwala masobana a lona.
Ho ikwetlisa ke hona feela ho ka o bolokang o phetse hantle
Ho a thabisa ho utlwa hore boikwetliso ba ho otlolla mesifa dihora tse pedi kapa ho feta ka letsatsi bo molemo haholo. Dilemong tsena tse ntjha ho bonahala batho ba bangata ba thabela boikwetliso.
Mona ho otlollwa mmele kaofela mme hona ho thusa hore pelo e se qetelle e otla ka matla, ho thibele le monono. Ho phomola le ho intjhafatsa ke dintho tsa bohlokwa.
Ho ikwetlisa ka matla, ho itsharolla mmele, ho qhoma-qhoma setepising le ho matha, kaofela di ama mmele haholoholo dikarolong tse boi jwalo ka mangole le manonyeletso. Bakeng sa ho tatela ho ya ithapolla sebakeng sa boikwetliso, qala ka ho otlolla mesifa ka ho tsamaya.
Ditlolo di ka fedisa menyama
Ka maswabi ha ho letho le lekaalo leo motho a ka le etsang ho fedisa menyama. Ho na le ditlolo tse tshepisang ho o thusa empa sephetho ha re se bone. Seo di se etsang feela ke ho ntlafatsa tjhebeho ya letlalo, di e fiifatse hanyenyane e seng hore e fele hohang.
Sesosa ke ho saroloha ha letlalo. E atisa ho hlaha ha motho a kena boholong le ka nako eo a immeng. Boipaballo bo molemo ho feta setlhare, ka hoo boloka letlalo la hao le le mongobo ka dioli le ditlolo tse ding tse mongobo ho lekana hore ha le saroloha le se ke la tswa menyama. Leha o ke ke wa tiisa hore e ke ke ya hlaha empa ho molemo ho etsa matsapa a ho fokotsa menyetla ya
yona. [s]
Re bua ka
ditshomo tsa botle
BONA SESOTHO - January 2006
Na ke nnete kapa tjhe- Ka nako e nngwe ha ho bonolo ho kgetha se setle le se sebe ho tsa botle
BONA SESOTHO - January 2006
ka CHRISTINE HAMMANN
ditshwantsho ka GREAT STOCK!
