sotho.865.sisstars
SE NKILWE KE DIBONTSHI
KE DILEMO di 45. Ke dilemo di 20 ke nyetswe, ke na le bana ba babedi ba dilemo di ka tlase ho tse 20. Mathata a ka ke hore ke bona eka ke senya lenyalo la ka. Ke ipona ke sa ratehe, ke se mafolofolo mme ke bile ke tsofetse. Ha ke na tjheseho hohang ya ho batla ho ba motle kapa hona ho ba moyeng wa lerato. Ha ke ithate hohang leha ke itjheba seiponeng.
Ke hloka thuso ka pele, ha ke rate ha monna a ka ntlhala leha a sa ntse a shebahala a se na pelaelo ka seo ke leng sona.
Ya sa rateheng, Pretoria
Dimilione tsa basadi lefatsheng di ikutlwa jwalo ka wena - bang ba re ba nonne tlolo, ba bang ha ba ratehe, ba kgathetse hape ekare ba tsofetse. Tse monate ke tsa hore o ka tjhentjha. Nnete ke hore dilemo tsona di ke ke tsa tjhentjha empa ha o lokisa dikarolo tse ding tsa hao tsa bophelo, o tla ikutlwa o be o shebahale o le motjha.
Qala ka ho kgatholla kelello, o ye ngakeng, o etswe ditlhahlobo feela tse tlwaelehileng. Mohlomong o se o kena dilemong tsa ho kgaoha ha dinako tsa sesadi, nako eo pelehi e kwalehang hohang. O ke ke wa hlola o eya nakong kapa o ima.
Ke mokgwa wa tlhaho ona mosading ka mong mme hape ho ka nna ha etsa hore o tetebele maikutlo, o be pelo e nyane hape o utlwele le motjheso haholo. Ngaka e ka o thusa ka meriana.
Ho fellwa ke matla ho ka nna ha bakelwa ke ho nona tlolo ya molao. Ha o ikwetlisa, mmele wa hao o ntsha khemikhale e o hlapholang e o tsose morolo hore o itshepe mme o lakatse le thobalano.
Ho se ikutlwe o le motle ha ho bolele hore o mobe. Ke kelello ya hao feela. Ha wena o ipona ekare o mobe, le ba bang ba tla o bona o le mobe.
Basadi ha ba hola ba qala ho ikamohela ba le seo ba leng sona, ho sa kgathallehe hore ba seemo se jwang.
Tjhentjha seo o ka se tjhentjhang empa o tlameha ho amohela hore mohlomong diphaka tsa hao di tenya mme o di hlahise ka motlotlo. Botle ba hao, ke pelo ya hao mme ke seo monna wa hao a se ratang.
Ena e ka nna yaeba nako bophelong ba hao ya ho qala dintho tse ding tseo o di ratang. Na o kile wa nahana ho kena stokofeleng sa basadi?
Ho bohlokwa ho ela hloko hore ho se itshepe ho thefula dikamano tsa hao tsa lerato. Kgothala, mme o tjhentjhe seo o ka kgonang ho se tjhentjha, mme o be motlotlo.
O nthatela tjhelete ya ka feela
Ke nyetswe ka 2001 mme dintho di ne di tsamaya hantle selemong sa pele. Ke dilemo di 30 jwale, ke na le ngwana eo ke mo fumaneng pele ke nyalwa ke monna enwa.
Ke phela mahlomoleng jwale. Monnaka ha a sebetse mme o rata basadi ka mokgwa o makatsang. Ha a ratane feela le bona, o bile o a ba emarisa.
Ke se ke tswile seriti motseng ona. Dinyatsi tseo tsa hae, di
ntella ha bohloko. Di a nthohala neng kapa neng ha di batla ho etsa jwalo.
Ke a sebetsa mme ke nahana hore ho fihlile nako ya hore ke kgaohane le monna enwa, eo jwale a bileng a reng motse ona oo ke ikahetseng ona ke wa hae.
Hohang ha a nthate, o batla tjhelete ya ka, ke phetho. Se ntshosang ka ho fetisisa ke hore ha a ntwantsha, o lwantsha le ngwanaka. Ke tshaba hore a ka nna a re bolaela ka tlung ka le leng. Ke kopa thuso...
Ya dihlong, Umzimkulu
Monnao ha a na hlompho, o sebete o sa ntseng o dula le yena. Erekaha o bohale, o lokela ho sebetsana le yena ka hloko e kgolo. Na o ka tshepa ditho tse ding tsa lelapa tsa batho ba baholo bakeng sa tshireletso? Kapa yena moruti?
Ke botsa jwalo hobane o hloka tshehetso ya batho ba bangata, ba tla kgona ho bua le yena ho mo thusa hore a amohele tlhalano ya lona.
Ho ka ba molemo hape ha o ka rekisa motse kapa wa o rentisa, o dule sebakeng se seng se hole - kapa lebatoweng le leng. (Mohlomong o kope mohiri wa hao ho o isa lekaleng le leng le hole le moo.)
Ho shebala ekare ha se toka - hobane ke yena ya qalang leqhoko - empa ke wena ya lokelang ho baleha. Dinyatsi tsa hae di a o rohaka. Le yena o a o hlorisa. Polokeho ya lona e bohlokwa haholo. Ka hoo potlakela dintho.
Itshepe. Ha o se o mo hlala, se mo dumelle ho o tjhentjha maikutlo.
O tla hloka keletso ya molao haholoholo mabapi le motse.
Ka mora ho dula le yena dilemo tse tsheletseng, ho bohlokwa ruri ho arohana. Ke a tshepa o tsebe hantle seo o se batlang mme o tla nka qeto e nepahetseng.
Moratuwa e monyenyane
Ke dilemo di 14 mme ke batla ho tseba hore na ke toka ho ratana le moshanyana ya ka tlase ho nna ka dilemo. Na ke toka hore ngwanana a ferehe moshanyana?
Hona o tseba jwang ha motho eo a o rata e le ka nnete?
Ya ferekaneng, Botswana
Ha ho letho le phoso ha ngwanana a ratana le moshemane ya monyenyane ho yena. Ha lona le se na bothata ka seo, ha ho hlokahale hore le ikgathatse ka seo batho ba bang ba tla se nahana? Leha ho le jwalo, setjhaba se tla o ahlola mme o tla utlwa bohloko ha ho buuwa ka wena.
O tla nkwa o le ngwana ya boitshwaro bo bobe kapa ya phaphileng haholo. Na o tla kgona ho mamella kgatello eo? O sa le monyenyane haholo hore o ka kgona ho mamella kgatello ya dikamano tsa marato, se ka tata.
Bakeng sa lerato la nnete, bongata ba batjha ba dilemong tseo, ba ikutlwa ekare ba fumana lerato la nnete ho fihlela motho a tshwara moratuwa wa hae le motho e mong. E be hona a qalang ho utlwa bohloko mme a hlokomela hore o ne a ithetsa.
Ke ka mora ho ba le dikamano tse mmalwa moo o ka kgonang ho bona phapang.
Ebe ke motjhini wa tjhelete?
Moratuwa wa ka o dula Tshwane, o na le bana ba babedi bao e seng ba ka. Re dutse re qabana mme jwale re kgaohane. Ka mafelo a kgwedi, o a tla ho nna ho tla batla tjhelete ka kgang.
Re na le dilemo tse ka hodimo ho tse nne re ratana. Ha ke sa tseba jwale hore ho etsahalang. Ebe o na le monna e mong, eo a ratanang le yena nna ke nkwa feela jwalo ka motjhini wa tjhelete? Ke tla intsha jwang?
Themba, Alexandra
Ha le kgaohane, ha ho letho leo o mo kolotang lona? Leha o ne o ka lakatsa ho tswelapele le yena empa ho totobetse hore yena ha a na lerato ho wena, o batla tjhelete qha.
Ithute hore: "Ke a hana!" mme o mo bolelle a kgaohane le wena. [s]
matla a bophelo
NTHUSE!
ha ke ratehe
Sis Sarah
o tla araba dipotso
tsa hao mme a o thuse ho thoba pelo e bohloko
Ngolla ho:
Botsa Sis Sarah,
Box 32083, Mobeni
4060.
Ela hloko:
Sis Sarah
ha a na bokgoni
ba ho rarolla
mathata a tsa bophelo bo botle.
Naledi ya kgweding ena
Sebapadi sa bolo
22 Tshitwe, 1982
Ho ya ka sengodi sa tsa bolo, sebapadi sena sa mpeng sa Soweto "se na le boiphihlelo ba ho fetisa bolo ka bokgabane esitana le ho phelephanyetsa dibapadi tsa morao" Ba ha McDonald ba mo kgethetse dipapatso tsa bona ka nako ya Mohope wa 2010.
DINALEDI
Haeba o na le molekane, ena ke nako e nepahetseng ya ho tiisa dikamano tsa lona. Haeba o se na molekane, bula mahlo, o ka nna wa mo fumana.
Dikamano tsa lona di tla hantle, ka hoo, qala o etse merero ya bokamoso le moratuwa wa hao. Haeba o se na molekane, o ka nna wa mo fumana.
Ntlafatsa dikamano tsa hao ka ho ba le tlhokomelo. Ho ithabisa mmoho ho bohlokwa, ka hoo, iphe nako ya ho thabisa molekane wa hao.
Ho na le ditshepiso tseo o tlamehang ho di phethisa, ke nako ya ho rala dikamano tse tiileng. Haeba o se na molekane, tshepa, o tseleng.
Ena ke nako ya thabo. Wena le molekane wa hao le ka rata ho nka qeto tsa bohlokwa. Haeba o se na molekane, etsa dintho tsa hao ka potlako empa o ntse o bontsha lerato.
Le tla ba le lerato le kutlwano dikamanong tsa lona haeba o bua ka mathata a hao. Dula o thabisa molekane wa hao. Haeba o se na molekane, mamela maikutlo a hao, a ke ke a o swetsa.
Ke nako ya lerato. Lerato la hao le tla bonahala hantle haeba o etsa dintho ka nepo. Tiisa dikamano ka ho bontsha boinehelo molekaneng wa hao.
O a kgona ho bontsha lerato mothong, mme ho be thata ho iphapanyetsa lona. Haeba o se na molekane, o tla makala, o tla fumana motho o tla mo rata haholo.
Lerato ke lehlohonolo, lebella nako e monate ho tsa lerato. Ho bontsha lerato le tlhokomelo ho molekane wa hao, ho tla tiisa dikamano tsa hao.
Dikamano tsa lona di a tia mme sena se tla ntjhafatsa lerato la lona. Haeba o se na molekane, lebella ho fumana lehakwe la pelo ya hao.
O tla kgona ho bontsha boinehelo dikamanong tsa lona haeba o na le molekane. Haeba o se na yena teng, lebella ho fumana moratuwa wa pelo ya hao.
O bontsha mosa le kutlwisiso. Lerato leo o nang le lona esitana le ho fana ha hao, ke ona motheo o tiileng bakeng sa dikamano tsa moshwelella.
DINALEDI TSA HAO
