
Kopo ya ho kena ho learnership ha o sa sebetse    



Tlhaloso

Learnership ke lenaneo la thuto le lebisang tabeng ya hore motho a fumane mangolo a mosebetsi. Di-learnership di kenyelletsa thuto ya ka tlelaseng setsing sa thupelo kapa kholetjheng le ho rupellwa mosebetsing o itseng sebakeng seo ho sebetswang ho sona. Hore o be le seabo ho learnership, ramosebetsi o lokela ho ba le kgahleho mme a be le bokgoni ba ho fana ka learnership.

Ke mang ya ka etsang kopo?

Mang kapa mang ya qetang sekolo, kholetjhe kapa yunivesithi mme a sa sebetse. Batho ba sa sebetseng ba lokela ho ingodisa jwalo ka batho ba ntseng ba batla mosebetsi Lefapheng la Mesebetsi.
Ha ho na tjhelete e lefiswang motho ya batlang ho kena ho learnership. Mang kapa mang ya kgethwang ho kena lenaneong la learnership o lokela ho fumana alawense ya learnership ho tswa ho ramosebetsi.
Nako e nkuwang ke learnership e tla fapana ka ho ya ka mokga ka mong empa ka tlwaelo e ke ke ya ba ka tlase ho selemo.

Ha o batla ho tseba haholwanyane, e ya Lefapheng la Mesebetsi.

Mehato e lokelwang ho latelwa

Nahana ka mofuta wa thupelo le mosebetsi oo o o batlang. Ka mantswe a mang, ha o batla ho ba ka ntle, o se ke wa etsa kopo ya mosebetsi wa ka ofising.
Ngola CV e fanang ka dintlha tse mabapi le wena ka seqo sa hao tse jwalo ka tse latelang:
Lebitso la hao le letsatsi la tswalo
Thuto; sekolo seo o keneng ho sona mmoho le mangolo a thuto
Boiphihlelo ba mosebetsi; mabitso a boramesebetsi ba pejana le hore o ne o etsang
Bokgoni bo bong bo jwalo ka bokgoni ba dikhomputara; hore na o na le laesense ya ho kganna kapa the, jj..
Direferi 

Ingodise jwalo ka motho ya ntseng a batla mosebetsi setsing se haufi le lona sa mesebetsi. Hona ho tla thusa boramesebetsi ho o fumana ha ba batla ho qala learnership.
Iteanye le ba di-SETA ho fumana hore ke boramesebetsi bafe ba fanang ka di-learnership. Kena weposaeteng ena: http://www.labour.gov.za/contact/contact_display.jsp?deptDetail=6598&category=6780
Kopa metswalle le ba lelapa ho sheba dikgeo le dipapatso dikoranteng.
Iteanye kgafetsa le ba setsi sa lona sa mesebetsi mme o dule o ntse o lokisa dintlha tsa hao ha di fetoha.



Molao o sebediswang

Skill Development Act, 1998  
Basic Conditions of Employment Act, 1997 , Sectoral Determination No. 5 



Maemo a tshebeletso

Nako e nkuwang ke di-learnership e tla fapana empa ka tlwaelo e ke ke ya ba ka tlase ho selemo se le seng.

Ditjeo



Tshebeletso ke mahala.



Diforomo tse lokelwang ho tlatswa

Etsa kopo Lefapheng la Mesebetsi kapa setsing sa mesebetsi se haufi le wena.


