SOTHO.54.yourstories_crime
LENYALO la Lynn le Jay Lopez la dilemo tse 16 le ne le le monate. "Ke ne ke tsebile Jay ho tloha ke sa le dilemo tse ka tlase ho 20," ho bolela Lynn. "O ne a tshwana le kgaitsedi ya ka, e le motswallaka wa sebele. Bosiung boo bo tshabehang, re ne re kene diphateng jwalo ka tlwaelo, ka meso Jay a tsoswa ke lerata mme a ya fuputsa.
O ne a kopane le monna ya tshwereng thipa monyako. Jay o ne a leke ho mo lwantsha ka molamu wa baseball empa a hloleha. O ne a hlajwe ka thipa ho fihlela a ewa. Ke ne ke bokolle, ha tjha lentswe, ha fela ha jwalo." Lynn o re senokwane seo ne se re: 'Ke a tseba ke tla ahlolelwa lefu ka ketso eo, ho betere ke hle ke ithabise ka wena'. Se ne se mo hlasele, sa mo tsodisa pele se mo beta makgetlo a mahlano kaofela.
"Jay o ne a re ke leke ho mo shebisisa e le hore ke tsebe ho mo supa mapoleseng, empa o ne a ikwetse mahlo. Ha monyetla o hlaha, re kopanya mahlo, a hae a ne a le matsho, a tshosa. A tahilwe ke jwala le dithethefatsi, a nkga phu!"
Ka mora moo, o ne a hlape mme a ba a kopa ho itlhakola ka thaule ya Lynn. Pele a tsamaya a re: 'Ke saletswe ke dintho tse pedi feela jwale. Ho le bolaya le ho tjhesa motsenyana ona'. "A tsheha haholo mme a re: 'Tjhe, tjhe, ha ho hlokahale hore ke o bolaye'. Ka mora ho tjhesa phaposi ya ho phomola, a tswa a tsamaya.
Lynn o ne a tshohile haholo mme a balehela ha moahisane. Ka mora moo ha a sa hopola letho le lekalo ntle le hore o ne a potlakisetswe sepetlele. A sa le moo, o ne a utlwe seyalemoyeng ho tlalehwa hore ho na le setopo se fumanweng. "Ke ka ona motsotso oo moo ke neng ke shwe teng. Monna wa ka, moratuwa wa ka, motswalle wa ka, o ne a shwele, le hona ka sehloho." Lynn a araba dipotso tsohle tsa mapolesa, tse ding leha di ne di mo utlwisa bohloko, o ne a ena le tshepo ya hore ba tla fumana mmolayi.
Ka mora matsatsi mapolesa a kopanya dintlha kaofela mme senono sa rala setshwantsho sa mmolayi, empa eitse hoba ba se fumane letho, mahlo kaofela a sheba ho Lynn. O ne a sa hlokomele hobane o ne a dutse a nwele dipidisi. A hlajwa dipotso mme a kenngwa motjhining o bontshang ha motho a bua leshano, e leng seo a neng a se thabetse hobane a nahana hore se tla mo thusa.
Mohla diteko, Lynn o ne a ferekane hlooho, e se yena hohang. Eitse ha a feila diteko tsa leshano, mapolesa a re ke yena ya neng a bitsitse monna eo, ba re dintho di ile tsa senyeha thobalanong. Lynn a tshoha haholo mme mapolesa a re hobaneng mmolayi a bolaile monna wa hae feela. Ba dumela ka hohlehohle hore ba ne ba tsebana. "Bophelo ba ka ya eba dihele. Ka qala ho hlaselwa ke dipono tse mpe. Ke ne ke iswe ngakeng ya kelello ke se ke bile ke itematsa, empa ke lakatsa ha mmolayi a ka fumanwa. Ho belaellwa hoo ya ka leru le letsho hodimaka. Nyewe ya Jay ya hloka tharollo. Mmolayi o ne a nyalasa, a ikotla sefuba." Ka le leng ngaka ya kelello ya Lynn ya mo eletsa ho bitsetsa mapolesa kantorong ya hae hobane o ne a se a tshaba ho ya ho ona. Ke mona moo a neng a kopane le Lefokise Harry Hoover le neng le utlwisise hantle taba ya hae mme a bula nyewe botjha.
Dikobo le mealo di ne di hlahlojwe hore ho etswe diteko tsa DNA. Ha di tshwana le tse teng moo ho bolokilweng DNA ya dinokwane tsa US tse ka hodimo ho milione le mabitso a tsona ho tla hlaha taba. Qetellong lefokisi la fumana mmolayi wa Jay: Chatsiam Adam Lioy.
Hoover o ne a kope Lynn ho kgetha setshwantsho sa Lioy hara tsa banna ba tsheletseng. Ba ne ba batla ho etsa bonnete ba hore Lioy o ne a sa mo tsebe, mme ba rala setshwantsho sa hae se tshwanang le ka nako ya bonokwane mme ba re o lahlehile. Ba tswa ba kena ho botswa batho ka yena. Lioy o ne a re hohang o qala le ho mmona, yaba ho lekane hore mapolesa a ka mo kenya mahlaahlela.
O ne a qale a ingamangama a bolela ha a sa etsa letho le phoso empa pele ho nako e kae a kopa hore ba mo dumelle ho bua nnete. O ne a bolelle Hoover hore ka mora ho bolaya Jay ha a soka a fumana phomolo, Jay o mo bolella hore a ka fumana tshwarelo ha feela a ka bua nnete.
Ka mora dilemo tse supileng Lynn a ngongorehile, mmolayi wa Jay o ne a tshwarwe, a re o ne a sa ikemisetsa ho etsa tseo tsohle.
Lynn o re: "O ne a bolelle mapolesa hore ha ho letsatsi le dikelang a sa bona diketsahalo tse sehloho tsa tsatsi leo. Ke ne ke eya kgotla letsatsi le letsatsi nyeweng mme ke mo shebisise. O ne a ahlolelwe bophelo tjhankaneng ka ho bolaya Jay le ho beta. O ne a sa kgone ho kopanya mahlo le nna. E, o ahlotswe empa le nna ke ikutlwa eka ke ahloletswe lefu.
"Bophelo ba ka ha bo na moelelo ntle ho Jay. Ke dihele feela. Ha ke bone sena se tla feta. Le nako ha e nkalafe ka letho. Ke setopo se mahlo. Ke thabile leha ho le jwalo hore ke kgonne ho bula nyewe botjha. Ntle ho moo, Lioy a ka be a ntse a matha kantle."
Lefokise Jorge Fernandez, ya neng a itlame ho e fuputsa botjha o re: "Re ne re sa mo tshepe, re sa tsebe hore ebe o feila diteko tsa leshano hobane maikutlo a amehile ha bohloko kapa tjhe. Re ne re fumane DNA polokelong ya tsona, ra fumana le madi betheng mme hohang a sa tshwane le a senokwane leha se le seng ka nako eo. Re ne re batla ho tseba hore ebe ke tsa motho eo Mong le Mof Lopez ba neng ba mo memme lapeng la bona kapa tjhe."
Empa Hoover o ile a tlotla sebete sa Lynn. "Lynn o ne a se a loketse ho bona ho etsahala ho hong. O nkile dilemo tse supileng a lebelletse hore re tshware mmolayi wa monnahae. [s]
Pale le ditshwantsho: Sue Thompson/Splash News
BONOKWANE
O belaelwa lefung la monnae
Senokwane se ne se bolaye monnae, sa mo beta ka makgetlokgetlo empa mapolesa a ne a belaella mosadi eo hobane o ne a feile diteko tsa motjhini o utlwang ha motho a bua leshano
1. Lynn Lopez le setshwantsho seo a se ratang sa lenyalo la hae le mofu.
2. Lynn le moratuwa wa hae, mofu Jay.
3. Molamu wa baseball o Jay a neng a leke ho itshireletsa ka ona.
4. Phaposi e tjhesitsweng.
5. Chatsiam Adam Lioy ka nako eo a neng a tshwarwa.
