SOTHO.2858.legalsep
Ke ya Hao ka Molao
O e tlisetswa ke BONA le Scorpion Legal Protection
BONA SESOTHO - September 2006
Nyewe e sa tlwaelehang
Solomon Barends o ne a ferehe moratuwa wa ka. O ne a qale ho mo letsetsa, ho mo romella mangolo, dipalesa esitana le dimpho. Ke ne ke mmolelle hore a arohane le yena mme seo se ne se mo hlabehise. O ne a tlalehele mapolesa hore nna ke na le sethunya se seng molaong.
Mapolesa a fihla foleteng ya ka ho tla phenyekolla. Ba se fumana ba nkwalla.
Ke ne ke dule tjhankaneng dibeke tse tharo pele ke fumana beili. Leqwetha la ka le ne le hlahise mangolo a feletseng a sethunya seo sa ka mme ka lokollwa.
Leqwetha la ka le ne etse hore Barends a dumele hore o ne a nketseletsa ka taba ena.
Ke rata ho tseba hore nka kgona ho makalla Barends-
EM, Joburg
lHa o tshwarwa ka lebaka la motho ya tlalehileng leshano mapoleseng ka wena, o ka kgona ho makalla motho eo.
Ho hlakile hore se boletsweng ke Barends ka wena e ne e le leshano mme o ne a se na mabaka a ho etsa jwalo. Ka hoo, ho tshwarwa ha hao ho ne ho se molaong mme wena o theotswe seriti.
Matshidisong ao o tlamehang ho a tseka ho yena o tla kenyeletsa le ditshenyehelo tsa leqwetha jwalo kaha o kene ho tsona ka lebaka la hae.
Hape o ile wa lahlehelwa ke moputso jwalo ka ha o ne o le tjhankaneng le nakong eo o neng o ntse o ya lekgotleng.
Ya ho qetela, hopola hore lebitso la hao le senyehile ka ho tshwarwa le ho kwallwa tjhankaneng, athe hape le ho makallwa ha hao ke mmuso e ntse e le tahlehelo.
Hopola hore tahlehelo ya ho theolwa seriti ha e balwe ka ho tshwana le ho lahlehelwa ke moputso.
Seo se etswa ka mora ho shebisisa dintlha tse ngata jwalo ka bowena ba hao, maemo o leng ho ona setjhabeng, mosebetsi esitana le setumo sa hao.
Motho ya ka tsebang ho etsa seo ka nepo ke leqwetha la hao mme ke o eletsa ho kopa thuso ya lona.
Ho ka nna ha etsahala hore Barends a se kgone ho lefa letho ditsekong tsohle tseo o tla di etsa kgahlano le yena, ka hoo, ho molemo hore le leke ho etsa diphuputso tse itseng ka yena pele.
Le tlameha ho fumana hore na e be ke motho ya sebetsang, ya dulang sebakeng se le seng se nepahetseng- Ke motho ya nang le thepa jwalo ka koloi kapa yona feneshara-
Haeba le fumane hore ke motho ya nang le bongata ba dintho tse badilweng ka hodimo, seo se bolela hore le ka tswelapele le ditseko tsa lona.
Haeba le sa fumane letho ka yena ho se boletsweng ka hodimo, ho betere le tlohele hobane ha ke bone bohlale ba letho hore o ka hlahlela motho eo tjhankaneng ka lebaka la ho lahlehelwa ke moputso kapa hona ho senyeha lebitso.[s]
Re entse matsapa ohle a ho netefatsa hore dikeletso tsa rona ke tse nepahetseng. Empa nnete ke hore nyewe ka nngwe e hloka ho fuputswa ka tshwanelo mme ba ha Scorpion Legal Protection (Pty) Ltd, ditho tsa yona esitana le ba ha BONA mmoho le baphatlalatsi ba makasine ena, ba keke ba rwaka boikarabello ba ditshenyehelo tseo motho ya latetseng dikeletso ya bona ka mokgwa ofe kapa ofe a keneng ho tsona.
Romela mathata a hao ho: BONA Legally Yours, Box 32083, Mobeni 4060. Scorpion e fa bohle ba re ngoletseng ka mathata a bona lengolo le ba dumellang ho buisana le mmuelli mahlomahlong metsotso e 30, a le kantorong e nngwe ya bona naheng ena kapa o bue le yena mohaleng.
