sotho.2707.ethel
Ha ho letho le ka mo emang ka pele
Ditoro le tsona ha di holelwe
Ke naledi ya SA, o sa tswa hlahisa CD ya hae ya pele, dilemo tse 75 tsa boholo !
pale le ditshwantsho ka NEVILLE MAAKANA/NEWSFIRST
ETHEL Mtsetweni (75) wa Lekeisheneng la Giyani mane Limpopo le morahae le ngwetsi le ditloholo tse pedi ke mohlala. Nkgono Ethel o re ruta hore dilemo ha di bolele letho.
O hlahisitse albamo ya pele e nang le dipina tse 12 tsa Seshangane tsa mmino wa Bodumedi, A Hi Fananeni Na Tinyeleti ("A re kganyeng jwalo ka dinaledi"). E rekisa hantle haholo Limpopo, mme tse ding tsa dipina tsa yona di bapalwa ho Munghana Lonene FM.
"Ho phethahala toro ya kgale. Ho tloha bongwaneng haesale ke lakatsa ho ba sebini," ho bolela yena. Nkgono Ethel o ne a holele mishoneng mane Pfukani hona Giyani, a hlahile mohla la 4 Hlakubele 1932. (Helang, le mokaubere wa mmino Miriam Makeba o hlahile ka lona letsatsi leo).
"Ke tswaletswe lapeng la Makreste. Ntatemoholo e ne le e le moruti. Ke ne ke qale ho bina sehlopheng sa kereke ke bile ke qapa dipina tsa Bodumedi ho tloha bongwaneng."
Pele ho dilemo tse 25, o ne a se a qapile dipina tse ka hodimo ho tse 80. Empa o ne a so ka a fumana monyetla wa ho hatisa.
Ho ruta
Bakeng sa seo, e ne e be titjhere. A rupellwa kholetjheng ya Lamana mme a qala ho ruta sekolong sa poraemari sa Pfukani ka 1960.
"Ke rutile dingaka, babuelli le ditho tsa palamente, kaofela ba ntseba hantle," o boletse jwalo ka pososelo. Ba bang ba bona ba ke ba nketele."
Nkgono Ethel, ba supile lapeng labo, o nkile penshene mosebetsing ka 1999. "Ha ke tlohela ho sebetsa, ke ile ka ba le nako yohle mme ka qala ho hlokomela hore nke ke ka phela ho isa ka ho sa feleng," ho bolela yena. "Ka tshoha ha ke nahana ka ho shwa pele ke hatisa dipina tsa ka. Ke ka hona ke neng ke iphumane ke tlameha ho nka bohato.
Bana ba ka ba ne ba tshohe ha ke ba bolella hore ke batla ho hatisa mmino," ke yena eo.
Ya pele
Selemong se fetileng, nkgono Ethel a hlohlora maqhephe a hae a mmino, a leba studio ho ya hatisa.
CD ena e rekiswa ke bana ba hae le ditloholo mme e nngwe ya tsona ya romelwa ho DJ Beka Ntsanwisi wa Radio Munghana Lonene. "Ke ne ke iphomoletse ha monate ha ke qala ho e utlwa e bapalwa. Ka lla ke thabo," ho bolela nkgono Ethel.
Kaha o fihletse toro ya hae ya bongwaneng, o ka nahana hore o tla phomola jwale. Empa o tla be o etsa phoso, o batla ho hlahisa ya bobedi selemong sena. O boetse hape o na le toro e nngwe eo a batlang ho e fihlela.
"Ho binela mopresidente wa mehleng, Nelson Mandela," o boletse jwalo ka pososelo. [s]
NewsFirst
BONA SESOTHO - February 2008
Nkgono Ethel o re bontsha CD ya hae ka motlotlo.
