sotho.2499.joe
MASAWANA
Tlohelang
O A fufulelwa mosebetsing motshwari wa hao yena o qhanolotse kae kae o a ithabisa.
O re o sa utlwile ke seo, nako ya ho tjhaisa e a fihla, o leba lapeng, o fihla teng le tsa teng di o emetse, lerata le qhoma hodimo bana ba letsa seyalemoya, monnahao yena o qhanolotse sofeng, ntho e pele ho yena feela, ke TV, biri le koranta.
O qetella o robetse, o sulafalletswe ke tsohle ka lebaka la monna eo wa hao.
Ha ho phomolo - mosebetsing ke motshwari wa hao le tjhelete ya hae e siyo, lapeng ke monnahao ya botswa. Tjhe moreso! Phahama o hopole hore o monna. Ho lekane!
Mohatsao ha se sehole, le yena o na le kelello jwalo ka wena. O se ka iphapanyetsa yena, wa mo nka jwalo ka ntho e sele hobane le yena o na le maikutlo, o a hlabeha.
Le wena ke nako ya hore o tlohele maswana, o pokole, o iponahatse ka kitjheneng.
E - tlohela ho itshwara jwalo ka ngwana. Tlohela ho nna o bolela hore: "Ha ho poho pedi mona ntle ho nna, seeta ho lla sa ka feela."
Ho ba poho hoo ha hao, ho bolela hore leha mohatsao a kula, o tla nne a tlamehe ho di raha ka matjeke, a phehe, a hlwekise, a o tsose ka dijo tse tjhesang tsa hoseng le diaparo di se di otlolotswe di emetse wena feela.
Ka nako e nngwe mosadi eo o etsa seo a pepile ngwana. Ke a pheta hape, mohla mosadi eo a kulang, kgwedi e tla apohelwa ke maru ke o bolelle, o tla tsieleha, o se ka tseba hore o nke eng o e kopanye le eng hore o fumane dijo.
Hobane o dutse o ipolella hore o monna, o ke se nahane le ho iketsetsa letho.
Tsela eo o tla beng o korotla ka yona, mosadi eo o tla be a qetelle a theohile betheng, a hahabe hobane yena ke pokola e sa nahanelweng.
O a hlabehe a tlallane, a be a nahane le ho o hata qoqothong mona!
O tlameha ho leboha ba heno hobane ke motho ya nang le boitshwaro.
Leha ho le jwalo, ha se phoso ya hao weso. Re phela nakong e boima, mme wa hao ke yena ya o hodisitseng a o tefisa hobane o le ngwana moshemane.
O ne a o bolelle hore wena ha o a tlameha ho atamela le ho atamela kitjheneng hobane o na le dikgaitsedi tse tla o phehela, di hlwekise, di hlatswe, wena ha hao e be ho diila feela le metswalle.
Ha o ne o ka bonahala o ntse o twaila ka kitjheneng, ho sa tsebisahale hore o lahlehetswe ke eng teng, o ne o le ya shweleng ho ntatao, o be tshehisa dithakeng tsa hao.
Le hona jwale ke ntse ke ipotsa hore hobaneng ha o hlolwa le ke ho hadika lehe lena le pala, empa o dutse o ithorisa ka moo o leng bohlale ka teng.
Mosebetsing o motshwari, ho na le ba o rolelang kgaebana, mosebetsi o a ema ha o le siyo, empa ha o qala o furalla, o leba lapeng, tseo tsohle di sala moo. Ha o fihla lapeng, o ba motho o sele, ya sa tsebeng letho. Ke ntho e makatsang ena.
Mehla jwale e fetohile, mohatsao o kgathetse ke ho ya hodimo le tlase le mosebetsi wa ka tlung wena o qhanolotse, o phuthile matsoho o sa mo thuse ka letho.
O tla e thabela taba ya hore a ikgannele koloi ya hae, a ye dikopanong. Ha a tswa mosebetsing, a ikele mabenkeleng ho ya fepa mahlo ka feshene e ntjha, a itjelle lekomo le metswalle ya hae.
Le yena jwale o tla tshwana le basadi bana ba itulelang dibareng ba ipolaise leting ba kgutlele lapeng ka le hlahlamang ha kgoho di theoha dikalaneng.
Ha ho ka mokgwa weso, ke nako ya hore jwale le wena o itlwaetse kitjhene, dipitsa e be motswalle wa hao.
Ha ho hlokahale hore o be o rwale tuku le mose hore o tsebe ho pheha! [s]
Ha re tloheleng ho ithetsa banna - basadi ba ke ke ba boela ba emelana le masawana ana a rona...
BONA SESOTHO November 2008
HA HO PHOMOLO
ka Joe Khumalo
" Ke nako ya hore banna le bona ba di rahe ba thusetse kitjheneng "
it's time you got off your wardrobe-size backside and got busy in the kitchen.
