Price (Maize) (350 words)							Sesotho sa Leboa
Boemo bja gonabjale bja thekišo peakanyong ya tšweletšo ya lehea 
Instructions:
Folio strap: Koketšamohola
Byline: Taodišwana ye e ngwadilwe ke motšweletši yo a rotšego modiro
Ditaodišwana tše di fetilego tša mo go Pula/Imvula di tšweleditše dikgato tše di nyakegago tša go kgetha tswakano ya dibjalo tša selemo tšeo di swanelago polasa ya gago. Dikgato tše di akaretša dintlha tša go swana le peakanyo ya methopo, maamušo a mmu, peakanyo ya phetošopšalo le dithekišo tša ka moso mmarakeng. Pula/Imvula ya kgwedi ye e akaretša mohlwaela wa ditaodišwana tše di lebantšhitšwego go batšweletši bao ba phethilego go bjala lehea sehleng se se tlago sa tšweletšo ya dibjalo tša selemo. 
Dithekišo tša ka moso (future prices) tša lehea le lesehla le le lešweu di thatafetše ganyane kgweding ya Agostose 2011 mme di eme go R1 840 malebana le lehea le lesehla le R1 815 malebana le lehea le lešweu leo le tlišwago ka Julae 2012. Ka fao re ka letela thekišo ya diranta tše e ka bago R1 615 tone e tee ya lehea, e lego tšhelete ye e tsenago ka potleng ya motšweletši mola go gogilwe ditshenyegelo mabapi le thoto (transport differential) tše di lego gare ga R215 le R225 tone e tee. 
Moholafela (net value) wa lehea leo le ka išwago ntle ke diranta tše e ka bago R1 717 tone e tee. Thekišo ye e bitšwa “indicative export parity price”. Moholafela wa lehea leo le rekwago ntle ke diranta tše e ka bago R2 894 tone e tee ge le tlišwa Randfontein. Theko ye e bitšwa “indicative import parity price”. Ka fao re ka re theko ya lehea ya gonabjale le ya ka moso ya mono Afrika-Borwa e theilwe godimo ga moholatekano wa kišontle (export parity value). 
Se se šupa gore go sa na le mašalela (pheteledi) a lehea mmarakeng wa mono gae le gore go na le maikutlo a mabotse mabapi le go hwetšagala ga lehea sehleng se se tlago. Phetho ya theko/thekišo e akaretša dintlha tšohle tša tšweletšo tša go swana le maemo a klimate le mabu, nyako ya bareki, lehea leo le lego gona le leo sa tlogo tlišwa, phetošetšo ya ranta/dolara, mabaka a tšweletšo dinageng tša mošola le tswalo ya mono gae ya tšhelete ye e adimilwego, gare ga tše dingwe. 
Boleng bja lehea la mafelelo leo batšweletši ba le išitšego mabolokelong (disilong) bo ka ba bo fokotšegile ka baka la dipula tša go fetiša tšeo di nelego sehleng sa puno. Go feta fao boleng bjo bo ilego fase bo ka dira gore theko/thekišo ya “spot price” ya lehea la boleng bjo bobotse e namelele. Gopola gore dintlha tše tšohle di ka fetoga ka nako yeo lehea le bunwago išago, e lego Julae 2012. 
