Jane(Maize) 								Sesotho sa Leboa
Mohumagadi Jane o re…
Folio strap: 
Photo: Use a photo of Jane 
Ditabeng tša maloba go begilwe ka botlalo ka Setlamo sa Bafsa sa ANC seo se boletšego ka naga (le dipanka le meepo), mme go kgahliša kudu go kwa ka moo batho ba ba fapanego ba gopolago ka taba ya naga. 
Nna ke bona naga e le mothopo wo re swanetšego go o diriša go tšweletša dijo le tlhale. Dilo tše ntši lefaseng di atafala ngwaga le ngwaga – batho, diruiwa, dikoloi, bjalobjalo. Eupša naga e ka se oketšege – e segetšwe mellwane. Ge re gopola nnete ya gore batho ba dula ba atafala mola naga ye e dirišwago go tšweletša dijo e dula e fokotšega (gobane batho ba hloka sebaka seo ba ka agago dintlo tša bona go sona – metsesetoropo e gola ka go katološwa nageng) re swanetše go kgonthiša gore seripana se sengwe le se sengwe sa naga se dirišwa ka botlalo go tšweletša ka moo go kgonegago. 
Lehono mono Afrika-Borwa ditaba di raragane ka ge bontši bja naga ye go tšweletšwago go yona bo lengwa ke batšweletšikgwebo ba bašweu. Bjale go bolelwa gore batšweletši ba ba swanetše go amogwa naga ye ntle le tefo mme e fiwe batho ba baso. Ka lehlakoreng le lengwe go na le mafelo (naga) a mantši ao e lego nagakopanelo (ye e laolwago ke pušosetšhaba) mme bontši bja naga ye ga bo dirišetšwe tšweletšo. Gape go na le diketekete tša dihektare tšeo di abetšwego batho ba baso go ya ka mananeo a Kgoro ya Ditaba tša Naga. Na taba ye e amana le mmala wa motho? Go ya ka nna, AOWA – go ba motšweletši yo a tšweletšago fela go iphepa (subsistence producer), motšweletšinyane (small holder) goba motšweletšikgwebo yo a atlegilego, ga go sepelelane le mmala wa gago. 
Re a tseba gore ge o nyaka go ba motšweletši yo a atlegilego o swanetše go ba le tsebo, bokgoni, metšhene, mebaraka le tšhelete ya go reka dinyakwapšalo (inputs). Go no fa motho naga go ka se mo fetole motšweletši – ge o ema ka karatšheng o ka se fetoge koloi! Ge o na le naga, ga se wena motšweletši. Ge o nyaka go bitšwa motšweletši o swanetše go diriša naga ya gago ka botlalo o tšweletše ka moo go kgonegago. 
Ke šišinya gore re leke ka maatla go thuša batho ka moo re kgonago nageng yeo ba šetšego ba na le yona gore seripana se sengwe le se sengwe se tšweleletše setšhaba sa rena dijo le tše dingwe. Ge naga ye yohle e tšweletša ka moo go kgotsofatšago, mohlamongwe e ka ba nako ya go itshwenya ka ditaba tše dingwe. Naga e bohlokwa, ge o kgona go tsenela naga o na le boikarabelo bja go e diriša ka tshwanelo. A rena re lego batšweletši re ineele go tšweletša ka mafolofolo, re hlokomologe dipolelo tša boradipolitiki bao ba ikemelago. 
