Jane(Maize)								Sesotho sa Leboa
Mohumagadi Jane o re…
Folio strap: 
Photo: Use a photo of Jane 
E be e le lethabo le legolo go nna go ba yo mongwe wa baahlodi ba phadišano ya Molemi wa Ngwaga. Re šomile mengwaga ye mentši go tiiša lenaneo la rena la tlhabollo mme go ile gwa nthakgatša kudu go bona maemo a mabotse a bokgoni bja batšweletši ba bangwe. Go kgetha baphadišani ba bararo bao go bona go tlogo kgethwa mofenyi go be go le boima kudu ka ge bohle ba tshepiša e le ruri! 
Mola re lebogile go menagane le gona re thabile go fetiša go bona tšwelopele ya batšweletši ba bangwe, re ile ra nyama kudu ge re lemoga gore ba bangwe ba tloga ba sa kgone ruri. Maswabi ke gore go sa na le batšweletši bao ba šitwago ke go phetha dintlhatheo ka nepagalo – peakanyo ya mmu, nontšho, kgetho ye e nepagetšego ya peu le taolo ya ngwang. Ge o sa phethe dintlhatheo tše ka nepagalo o ka se ke wa ba motšweletšikgwebo. 
Gantši kudu batho ba bolela gore ga ba kgone go diriša mekgwa ye e nepagetšego ka mabaka a mmalwa – ba bangwe ba re ga ba na ditrekere, ba bangwe ba re peu le monontšha o a tura mola ba bangwe ba sola mmušo. Ge o nyaka go ba motšweletši wa nnete o swanetše go loga maano. Re ile ra makatšwa ke dibjalo tše dibotsebotse tšeo di bjetšwego ka diatla – tšhengwana ye nnyane e ka tšweletša puno ye botse ge o beakanya mmu gabotse, wa diriša peu le monontšha wa maleba le gona wa laola ngwang ka tshwanelo. Go kaone kudu go bjala tšhemo ye nnyane (yeo o ka e kgonago) wa phetha se sengwe le se sengwe ka nepagalo, bakeng sa go bjala tšhemo ye kgolo ka bošaedi ka lebaka lefe kapa lefe. Mola o kgonne go šoma lefelo le lenyane gabotse, ke gona o ka godišago lefelo leo o le šomago. 
Re swanetše go gopola gore lenaneotlhabollo le la Grain SA le lefelwa ke ditrasete tša mabele (kudu Trasete ya Lehea), mme bao ba re thušago bjalo ba nyaka go bona tšwelopele. Ge tšwelopele e sa bonale mašemong, re tla tlamega go fediša lenaneo le mafelong ao. E ka ba letšatši la manyami ruri ge re ka gapeletšwa go fediša thušo ya rena go batšweletši – le ge go le bjalo, taba ye e diatleng tša lena. Ge o bona gore thušo le thuto ya rena e go tšwela mohola, o tla swanela go fetola mekgwa ya gago ya tšweletšo ka moo go nyakegago. Go boima go fetoga motšweletši yo a atlegilego, eupša taba ye e diatleng tša gago ka botlalo – rena re ka go fa thuto le thušo yeo re ka e kgonago, eupša wena o swanetše go fetola mekgwa ya gago! 
