Jane(Maize)								Sesotho sa Leboa
Moh Jane o re…
Folio strap: 
Photo: Use a photo of Jane 
Matšatšing ano thelebišeneng, seyalemoyeng le dikuranteng go begwa kudu ka bosenyi le boradia. Na batho ba rena ba hloma bjang? Ditheo le maitshwaro a rena a feletše kae? Mohlamongwe re swanetše go bolela ka maitshwaro. 
Maitshwaro mošomong (work ethics) a akaretša moya, boitshwaro, tlhompho, kgokaganyo le tsenelelano – ke go re ka moo motho a phedišanago le ba bangwe. Potšišo ye bohlokwa mabakeng afe le afe ke gore na se se lokilego le gona se amogelegago ke sefe, mme se se fošagetšego le gona se hlalefetšago ke sefe? 
Mengwageng e se mekae ye e fetilego go bile le dikhamphani le ge e le batho bao maitšhwaro a bona mošomong a bego a belaetša le gona a ilego a huetša ba bangwe gampe. Maitshwaro a mohuta wo a akaretša le a batho bao ba ikhomolelago le ge ba lemogile gore ba bangwe ba dirile seo se belaetšago. 
Maitshwaro mošomong, ao a akaretšago botshepegi, go phetha mošomo gabotse, go bona mohola wa seo o se dirago, go ba le moya wa boikemišetšo le maikutlo a gore o karolo ya leano le legolo, a bohlokwa kudu. Re se ke ra no rata fela go dira seo se lokilego, eupša re swanetše go fišega go dira bjalo. Maitshwaro mošomong a tšwa ka gare, a hlolega pelong ya motho. 
Temong go na le dibaka tše mmalwa fao motho a ka bolelago maaka le go hlalefetša batho. Gopola batho bao ba adimago tšhelete mme ba se e bušetše ge puno e rekišitšwe; goba balemi bao ba bjalago dibjalo mme ba re go rekiša puno ba dire e ke ga se ba buna selo; goba bao ba adimago tšhelete ya go bjala dihektare tše di itšego mme ba bjala go feta fao (ka go realo ga ba diriše dinyakwapšalo (inputs) tšohle mašemong ao a šupilwego). Go sa na le batho bao ba sa hlomphego dikontraka tša bona; bao ba kgopelago tshwarelo ge ba sa tšwele pele mola lebaka e le gore ba paletšwe ke go šoma ka maatla; batho bao ba rekišago dilo tšeo e sego tša bona; batho bao ba rekago dilo tšeo di utswitšwego... re ka tšwela pele. 
Ge re nyaka go tiiša temo nageng ya rena re tla swanela go boela ditheong tše botse e lego potego, boineelo, tshekego le tlhompho. Mongwe le mongwe, go akaretša le bahlankedi ba mmušo, o swanetše go šoma ka mafolofolo letšatši ka letšatši. Ke wona mokgwa o nnoši wo re ka atlegago ka wona. Ge o nyaka go fetola mokgwa woo dilo di dirwago ka wona, iphetoše pele wena ka bowena. Bea mohlala woo ba bangwe ba ka o latelago, eba motho yo a botegago. A re boeleng maemong ao go ona re ka kgonago go bolela ka potego ra re: lentšu ga le kube, go kuba monwana, ke go re “my word is my honour”. 
