Cultivation (Maize) (410 words)						Sesotho sa Leboa
Ke nako ya go lekola kgohlagano ya mmu
Instructions:
Folio strap: Koketšamohola
Byline: Taodišwana ye e ngwadilwe ke motšweletši yo a rotšego modiro
Pula ya dimilimetara tša gare ga 600 mm le 2 000 mm e nele dileteng tšeo lehea le tšweletšwago go tšona selemo mme ka nako ya matlakadibe e ile ya na dimilimetara tša gare ga 50 mm le 75 mm ka letšatši. Boima bja meetse a makaaka godimo ga hektare ka nako ye kopana bo ka dira gore mmu o kgohlagane le gona o khore meetse. 
Godimo ga fao dintlha tša go swana le boima bja metšhene ya go fola, ditrekere, dikoloi tše kgolo le ge e ka ba kgogo ya dithaere ka nako ya puno mmung wo o khošego meetse, di tla be di kgohlagantše mabu go feta ka mehla. 
Dikgomo tšeo di fudišwago mašaledi a puno mašemong le tšona di kgohlaganya mmu wo o kolobilego wo o khošego meetse. Ge mašemo a khoše meetse go fetiša selo se tee seo se ka go kgontšhago go bjala ka nako e ka ba go diriša sephatšammu (ripper) pele ga goba ka nako ya pšalo.  
Go feta fao mafelong a mangwe marega a go tonya kudu le pula e šitišitše go oma ka pela ga mmu wo o khošego meetse. E ka ba maano a mabotse go lekola mmu mašemong ao a tlogo bjalwa lehea le go diriša didirišwa tša maleba tša meno (tyne implements) go phušula dillaga tše di kgohlaganego ge go hlokega. Sephetho se bohlokwa sa tiro ye ke gore mmu o tsenywa moya. Dipakteria le dimaekropo (microbes) di kgona go phela gabotse fela mmung wa godimo wo o tsenwago ke moya (aerobic), go ya botebong bjo e ka bago 150 mm go ya go 180 mm.  
Lereo le “aerobic” le šupa go ba gona ga moya wo o akaretšago oksitšene, naetrotšene le digase tša khapontaoksaete fao mmu wo o lemilwego gabotse (loosened) o kopanago le meetse. Tiro ya sedirišwa sa meno e bohlokwa ka ge e hlohleletša dipakteria go hlahlamolla mašaledi a puno ya sehla se se fetilego pele ga ge dibjalo tša sehla se sefsa di bjalwa. Tshepelo ya tiro ya dipakteria e thoma ge themperetšha ya mmu e thoma go hlatloga ka baka la thuthufalo go tloga bekeng ya mafelelo ya Agostose go fihla Oktoboro. 
Re eletša batšweletši ka kgatelelo gore tirišo ya sedirišwa sa meno goba ya sephatšammu e phethwe ka pela ka moo go kgonegago morago ga ge maemo a monola mmung e le ao a nyakegago. Ge mošomo wo o ka phethwa mola monola o feta woo o nyakegago, kgohlagano e ka oketšega bakeng sa go fokotšega. Motšweletši o tla swanela go beakanya didirišwa tša gagwe gore di sepelelane le mešomo ya gagwe ge a latela mekgwa ya go laola tshepelo ya didirišwa (traffic control) mašemong goba ya go lema ganyane fela (minimum tillage cultivation). 
Tlhokomelo ya diplantere le peakanyo ye e nyakegago ya metšhene yeo e sego ya ba ya phethwa, e swanetše go feleletšwa mathomong a Oktoboro. 
