Barley (Wheat)								Sesotho sa Leboa
Pšalo ya bali (garase) Sikimongnošetšo ya Taung
Folio strap: Pšalo ya bali
Byline: Johannes Kokome, Molaodi wa Tšweletšo ya Bali wa South African Breweries kua Taung
Ngwaga wa 2010 o be o na le ditlhohlo tše ntši mabapi le pšalo ya bali Sikimongnošetšo ya Taung. Gare ga tše dingwe go be go na le tsebišo ya mohuta wa “cocktail”, phefo le tšhwaane yeo e ilego ya ba gona go fihla kgwedi ya Setemere, dipula tše di nelego, sefako le mokgwa wa go lema ganyane (minimum tillage). 
Tsebišo ya bali ya “cocktail” bjalo ka mohuta wo mofsa Sikimongnošetšo ya Taung e be e le tlhohlo ye kgolo kudu. Go na le bohlatse bja gore mohuta wo wa “cocktail” o kgona go tšweletša poelo ye kgolo ya ditone tše dintši. Historing ya pšalo ya bali moo Taung, “cocktail” ke mohuta wa mathomo woo o kgonnego go boeletša poelo ya ngwaga wa go feta. Mašemong a mangwe go ile gwa tšweletšwa ditone tše 7,9 godimo ga hektare. Ge nkabe go be go se na le ditlhohlo tšeo di boletšwego, “cocktail” e ka be e tiišitše mohola wa yona. Bothata e be e le tshefo (screenings) le naetrotšene yeo e bego e se ye e nyakegago go ya ka dilekanyo tša SABM. Taba ye e bontšhitše kaonafalo poelong (tonnage) ya bali go tloga tsebišong ya yona Sikimongnošetšo ya Taung ka 1981. 
Ngwageng wa 2010 go be go tonya kudu le gona go be go na le lehlwa le lentši. Phefo le tšhwaane/šobane e ile ya ba gona go fihla kgwedi ya Oktoboro. Se se ra gore tšhwaane e ile ya huetša bali dikgatong tša go fapafapana, e lego ya go khukhuša, ya go ntšha matšoba, ya tege ye boleta (soft dough stage) le ge e ka ba mola e šetše e budule. Khuetšo ye e be e le ye mpe kudu. Maemo a klimate a bohlokwa kudu mabapi le pšalo ya bali. Go be go na le ditone tše 1 129 le naetrotšene ya fase ga 1,35 yeo e bego e le ya go amogelega go ya ka dilekanyo tša SABM. Ngwagola go rekišitšwe ditone tše 33 bjalo ka “screenings”. 
Pula ye ntši le yona e ka huetša boleng bja bali. Nako ya puno ngwageng wa 2010 e be e le gape mathomo a dipula tša selemo. Puno ya bali e ile ya thoma ka 8 Nofemere mme dipula tša selemo tša thoma go na ka 12 Nofemere. Ka nako yeo go be go bunnwe bali ye nnyane fela. Bali yeo e bego e se ya bunwa e ile ya huetšwa ke pula mme gwa diragala seo se bitšwago “pre-germination”. Le ge go le bjalo ba SABM ba ile ba tšwela pele ka dinyakišišo go bona ka moo bona le batšweletši ba ka thušanago ka gona le ka moo ba ka dirišago bali yeo ka mohola. 
Madimo a sefako a ka fokotša tšweletšo le poelo. Dihektare tše e ka bago tše 140 di ile tša senywa ke sefako. Madimo a sefako a ile a ipoeletša gararo ka go latelana. Go ya ka mekgatlo ya inšorense tshenyo e ile ya ba gare ga 5% le 47%. Se se bontšha ka moo poelo e ilego ya fokotšega le ge e ka ba bokaakang bja phokotšo yeo. Tšhemo yeo ka tlwaelo e tšweletšago ditone tša gare ga tše di selelago le tše di šupago godimo ga hektare, e ile ya kgona go tšweletša ditone tše 4,9 godimo ga hektare fela. 
Go be go le bohlokwa gape go hwetša tsela ya go fokotša ditshenyegelo mabapi le didirišwa ka baka la resešene (theogo ya ekonomi). Ka fao go be go le kaone go diriša mokgwa wa go lema ganyane fela (minimum tillage). Mokgwa wo ke wa go fokotša tirišo ya didirišwa – ke go re go phethagatša ditiro tše mmalwa ka tshepelo e tee. Ka tsela ye o ka phatša mmu (rip), wa bjala pue le gona wa tšhela monontšha ka tshepelo e tee. Ka go diriša mokgwa wo ba ile ba kgona go tšweletša ditone tše e ka bago tše 6,8 godimo ga hektare lefelong la dihektare tše 120. 
Lenyaga batšweletši ba ile ba lebanwa ke ditlhohlo tše mmalwa mme ba ithutile dilo tše ntši. Karolo ya puno ya ditone tše 3 688 e dirišitšwe bjalo ka furu. 
