PALOMOKA YA MATLAKALA A DIPOTŠIŠO KE 4.
DITAELO LE TSHEDIMOŠO
Lephephe le arotšwe ka dikarolo tše THARO e lego A,B le C. KAROLO YA A: Ditaodišo KAROLO YA B: Ditšweletšwa tša tirišano tše telele KAROLO YA C: Ditšweletšwa tša tirišano tše kopana
Bala dipotšišo ka tlhokomelo gore o se hlahlathe.
Araba potšišo e TEE fela karolong ye nngwe le ye nngwe.
Thoma potšišo ye nngwe le ye nngwe letlakaleng la yona.
Ngwala ka bothakga le mongwalo wa go balega.
Taodišo e rulaganywe ka lenaneo la go swana le mmepe wa monagano goba lenaneo leo le ka go thušago go rulaganya. O tla fiwa meputso ya go rulaganya le padišišo.
Hlokomela morero le sebopego sa sengwalwa se sengwe le se sengwe go ya ka go fapana ga dinyakwa tša sona.
Dingwalwa ka moka di ngwalwe ka Sepedi.
KAROLO YA A: DITAODIŠO
POTŠIŠO 1
Kgetha e TEE ya dihlogo tše di latelago gomme o ngwale taodišo ya botelele bja mantšu ao e ka bago a 400 go iša go a 450.
Tema ye e kgathwago ke basadi ka go Afrika-Borwa ye mpsha. [50] GOBA
Go bolawa ga bana ke tlhobaboroko nageng ya Afrika-Borwa. Tšweletša maikutlo a gago. [50]
GOBA
Thuto ya Kharikhulamo ya Setšhaba ke sentšwelakae. [50] GOBA
Na tshepedišo ya toka nageng ya Afrika Borwa e a kgotsofatša? Ntšha sa mafahleng a gago. [50]
GOBA
Go ima ga baithuti dikolong ke tlhobaboroko nageng ka bophara. Tia di lle. [50]
PALOMOKA KAROLO YA A: 50
KAROLO YA B: DITŠWELETŠWA TŠA TIRIŠANO TŠE TELELE
POTŠIŠO 2
Araba potšišo e TEE go tše nne tše di latelago. Botelele bja karabo ya gago e be mantšu a 180 go iša go a 200 (diteng fela).
Bjalo ka Modulasetulo wa mokgatlo wa batlanyi femeng ya go tšweletša dikoloi, ngwalela mookamedi wa feme pego mabapi le batlanyi ba bane bao ba tlogetšego mošomo. [30]
GOBA
Go na le dipolelo tša go nyefola ditlwaelo le ditumelo tšeo di phethwago ke Maafrika. Bao ba di nyefolago ba fela ba tsenya setlwaedi sa go bolaya diphoofolo tše bjalo ka dipudi, dinku le dikgomo bjalo ka ditiragalo tša sehlogo tšeo di sa nyakegego. Ngwalela Morulaganyi wa kgatišobaka ya Seipone athikele yeo go yona o tšweletšago maikutlo a gago mabapi le se. [30]
GOBA
GOBA
Baithuti ba bantši ga ba kgone go rutha sekolong sa geno, ka fao le be le kwane go kgoboketša tšhelete ya go aga letangwana la boruthelo, leo ka lona ba bantši ba tlilego go ithuta go rutha go lona. Ka morago ga maitapišo a go ya godimo le fase le kgonne go kgoboketša dikete tše masome a mane tša diranta. Seo se le tlabago ke gore hlogo ya sekolo le Lekgotlataolo la sekolo ba šomile kgahlanong le seo le kwanego ka sona. Bona ba dirišitše tšhelete yeo go aga bophako bja difatanaga tša bona. Baithuti ba ngongoregela se. Ngwala memorantamo wo go wona le ipelaetšago kgahlanong le se. [30]
PALOMOKA KAROLO YA B: 30
KAROLO YA C: DITŠWELETŠWA TŠA TIRIŠANO TŠE KOPANA
POTŠIŠO 3
Araba potšišo e TEE go tše tharo tše di latelago. Botelele bja karabo ya gago e be mantšu a 100 go iša go a 120.
O etetše ngaka yeo o dirilego diteko tša madi tša twatši ya HIV/Aids go yena. Ngwala ditiragalo tša letšatši leo ka gare ga pukutšatši o tšweletše kgato ka kgato go ba go fihla ge ngaka e go botša gore o na le twatši yeo. [20]
GOBA
Motse wa geno o tla etelwa ke batho ba go tšwa go lekala la tša boeti profenseng ya geno go tla go fa setšhaba tshedimošo mabapi le ketelo ya batšwantle ka mo nageng ka ngwaga wa 2010.
Ngwala maphephetsebiši ao o tsebišago setšhaba ka ga ketelo ya batho bao. [20]
GOBA
Thala phoustara/papetla yeo ka yona o kwalakwatšago phadišano ya mmino wa sedumedi tikologong ya geno. [20]
PALOMOKA KAROLO YA C: 20
PALOMOKA YA TLHAHLOBO: 100
