Tyres 1 (Maize) (600)								English



Dithaere: dintlha tše di holago mabapi le go otlela 



Instructions: 

Folio strap: Dithaere

Byline: Taodišwana ye e ngwadilwe ke ba Goodyear

Photos: Part 4 pic and 11 Optitrac DT818

Use Goodyear logo



Tsebo ya ka fao dithaere tša didirišwapolaseng di ka go šomelago bokaone e ka thuša go kaonafatša polokego le gona e ka fokotša ditshenyegelo tša tirišo le ge e ka ba tshenyo ya mmu le dibjalo. 



Kotlelo polaseng e akaretša mabaka a a fapafapanago a tirišo – go swana le go lema tšhemo goba go goga dikoloigogwa sekontiring. Le ge mabaka a a fapana kudu go na le melawana ye bohlokwa yeo e swanetšego go elwa hloko.



Mabapi le dithaere dintlha tše dingwe tše bohlokwa ke: go bapiša mohuta wa thaere le lefelo leo thaere e tlogo sepela go lona (leraga, sehlaba se boleta, bj.bj.); go latela ditšhupetšo tša modiri wa dithaere mabapi le bogolo le sebopego (specification) sa tšona; le go pompa dithaere go ya ka morwalo le lefelo leo di sepelago go lona, ntlha yeo e lego ye bohlokwa go feta tšohle. 



Ke moya wo o lego ka thaereng fela wo o e kgontšhago go rwala morwalo wo o itšego mme badiri ba dithaere ba go swana le Goodyear, ba bea melawana mabapi le morwalo wo thaere ye nngwe le ye nngwe e kgonago go o rwala, le lebelo leo e dumelelwago go sepela ka lona ge e rwele morwalo wo o itšego. 



Lekanya pudulelo (kgatelelo) ya thaere le morwalo 



Ge senamelwa se rwadišwa morwalo wo boima ntle le go beakanya kgatelelo ya moya dithaereng, di senyega le go onala go fetiša, seo se fokotšago tiro le bophelo bja tšona kudu. 



Dithaere tše di rwadišwago morwalo wo boima go feta goba tšeo di hlaelago moya (underinflated) di menega go feta tekanyo, seo se ka hlolago go palega ga karolo ya godimo ya mahlakore (sidewalls) le go onega ka pela ga merumo (outer shoulders). Dithaere tša mohuta wa pholaeputlani (crossply) goba “bias” tšeo di hlaelago moya di senyega mahlakore gabonolo ge di goga boima (high-torque driving conditions), seo se senyago mmele (carcass) wa thaere. Kgatelelo ye nnyane kudu e ka dira gore thaere e thelele riming ya kgaola belefe ya tšhupu ye e ka bago gona le gona e ka senya ka kakaretšo seo se bitšwago “beading” ya thaere. 



Ka lehlakoreng le lengwe, kgatelelo ye e fetago tekanyo e kokomoša thaere go fetiša (too rounded) mme e onega kudu bogareng. Go feta fao karolo ya thaere yeo e gatago fase e a fokotšega mme se se fokodiša tshwaro ya thaere, seo gape se godišago kgonagalo ya go thelela ga leotwana, go senyega ga makgwakgwa (tread) a thaere le go fatogwa ga mmu. 



Ge o gapeletšwa go otlela trekere go ya le tshekamo ya mmoto (ke go re go dikologa le mmoto), kgatelelo ya dithaere e swanetše go okeletšwa ka diphesente tše di ka fihlago go 30 (30%) godimo ga kgatelelo ya ka mehla (base pressure), (go ya ka mosekamo) go kgonthiša boemotia. Se se ama fela dithaere tša morago tše di gogago – thaere ya tlase (down-slope tyre) fela ge o lebile thoko e tee, goba ka pedi ge o dula o retologa. 



Ge o fokoditše goba o okeditše kgatelelo ya dithaere gore e swanele mabaka a a itšego, go bohlokwa gore o ele phetogo ya mabaka ao hloko – go swana le ge o goga koloigogwa goba sedirišwa, goba ge o sepela sekontiring ka lebelo – le go otlela go ya ka mabaka a mafsa ao go šitiša tshenyo. 



Phaphamo le kgohlagano (Flotation and compaction)



Le ge kgatelelo e le bohlokwa kudu, tirišo ya dithaere tša kgatelelo ye e fapanago (of different air volume), e ka huetša tshwaro ya tšona kudu gammogo le mmu. Fao sebopego sa mmu, dibjalo le medu se lego bohlokwa kudu, go kaone go diriša dithaere tše di fetago tša ka mehla (ka bophara le/goba ka kgaolagare) ka kgatelelo ya fase.



Se se kgontšha senamelwa sa dithaere tše kgolo tša kgatelelo ya fase go rwala morwalo woo o rwalwago ke senamelwa sa dithaere tše nnyane tša kgatelelo ya godimo, eupša kgonagalo ya go segwa ga mekero mmung goba go hlolega ga kgohlagano ya mmu e a fokotšwa.



Ka wona mokgwa wo bogolo le kgatelelo ye e boletšwego ka godimo, e kaonafatša go goga ga dithaere sehlabeng ka ge di phatlalatša morwalo lefelong le legolwana mme re ka re di “phaphama” godimo ga mmu bakeng sa go sobelela go wona. 



Go gogiša trekere ka maotwana a mane (four wheel-drive mode) (ge go kgonega) fao dithaere di sa swarego gabotse, ke mokgwa wo mokaone, eupša o swanetše go širogwa ge trekere e sepela sekontiring goba tseleng ye thata ya lekgwara. Lebaka ke gore mafelo a mohuta wo a dira gore dithaere tša ka pele di fele ka bjako le gona ka go se lekanele, gore trekere e se laolege gabotse, le gore dikarolo tša trekere di šome boima go feta ka moo go hlokegago. 

