Sprayers										Sepedi



Tlhokomelo, tlhwekišo le pabalelo ya digašetši tša “boom sprayers”



Instructions: 

Folio strap: Tlhokomelo

Byline: Jane McPherson, molaodi wa Lenaneotlhabollo la Grain SA, go akaretša le thušo ya mohola go tšwa go badirišani ba go fapafapana



Taodišwaneng ya rena mo go Pula-Imvula ya Feperware 2007 ka ga taolongwang ya go fokola, re boletše gore lebaka le lengwe e ka ba boemo bja segašetši sa “boom”. Re lemogile gore bjo ke bothatakakaretšo – ka fao re ngwadile taodišwana ye. 



Tlhokomelo le pabalelo ye e nepagetšego ya segašetši ga e nolofatše fela dipeakanyo tše di etago sehla se se tlago pele, eupša e kaonafatša go šoma ga sona le go oketša mengwaga ya bophelo bja sona. Dibolayasenyi tše mmalwa tše di gašwago lebakeng le letelele di ka hlola ruse le go senyega ga dikarolwana, pente le dikopantšhi tša mohlagase tša segašetši. Mašaledi a dikhemikhale tše e ka ba kotsi go motho yo mongwe le yo mongwe yo a šomago ka goba kgauswi le segašetši. Go feta fao mašaledi a dibolayasenyi (trace amounts) ao a dulago dikarolwaneng tša segašetši a ka senya dibjalo ge a fetišetšwa sehleng se se latelago. 



Polokego ya gago le ya ba lapa la gago le badiredi ba gago, gammogo le ya dibjalo tša gago e bohlokwa kudu, ka fao o gapeletšegile go hlwekiša le go upa (decontaminate) segašetši sa gago sehleng, gare ga dipuno le gona pele ga ge o se boloka marega. Elelwa gore bontši bja dikhemikhale tše di dirišwago temong bo kotsi go dibjalo le/goba diruiwa (diphoofolo), ka fao molemi o swanetše go leka ka maatla go kwešiša kotsi ye e sepelelanago le tšona le go laola mabaka gabotse ka moo go kgonegago. 



Go hlwekiša ditlabele tša segašetši

Tshepetšo ye e feletšego ya tlhokomelo le pabalelo e akaretša dikgato tše tlhano: 



Kgato ya 1: Bala 

Pele ga ge o thoma go hlwekiša segašetši sa gago, se lebale go bala setlankana sa dibolayasenyi tše o di dirišitšego. Setlankana se, se 

go botša ka moo o swanetšego go fediša mašaledi a sebolayasenyi seo ka tshwanelo. 

hlaloša ditšhupetšo tše di itšego tše di ka hlokegago mabapi le tlhwekišo ya segašetši. 

tsebiša ditšweletšwa tše di ka dirišwago go upa segašetši. 

šupetša Ditlhamo tša Boitšhireletšo “Personal Protective Equipment (PPE)” tše o di hlokago go hlwekiša segašetši sa gago ntle le kotsi. 



Kgato ya 2: Hlatswa

Nepo ya go hlatswa segašetši ke go tloša mašaledi a sebolayasenyi ao a ka bego a šetše ka gare goba godimo ga sona. Go hlwekiša ditlabele tša go gašetša go ra tiro ya go sepediša meetse dikarolong tšohle tša segašetši le go a gašetša lefelong leo le šupetšwago setlankaneng sa sebolayasenyi seo o se dirišitšego (ka mantšu a mangwe, go ra go gašetša meetse ao a hlakanego le mašaledi a dikhemikhale, motswako wo o bitšwago “rinsate”, lefelong le le itšego ntle le kotsi). 



Go kgonthiša gore o hlwekiša tanka ya segašetši gammogo le diphaephe le melongwana (nozzles) o swanetše go tšhela meetse a a hlwekilego tankeng go fihla seripenggare, mme wa sepediša trekere tseleng ye nngwe ya moo polaseng – go tlolatlola ga trekere tseleng ya makgwara go kgonthiša gore meetse a gaša le go hlatswa bokagare bja tanka ka botlalo. Go hlatswa tanka gantši ka meetse a manyane (tekanyo ye e ka bago 10% ya boteng bja tanka) go phala go no e tlatša gatee ka meetse a a hlwekilego. Keletšo ye botse ke go hlatswa segašetši gararo le go feta. 



Go fediša meetse ao segašetši se hlatswitšwego ka ona (rinsate), kgetha lefelo moo a ka se tšhilafatšego meetse a a nwewago, meela, dibjalo goba dimela tše dingwe, le gona moo meetse a ka se bopego madibana ao e ka bago kotsi go batho, diruiwa le tikologo. Lefelo le lebotse moo o ka gašetšago meetse a “rinsate” e ka ba morumo wa tšhemo goba tsela ya moo polaseng.



Kgonthiša gore o gamola meetse a tanka ya segašetši go ya ka ditšhupetšo tša setlankana sa sebolayasenyi. O se ke wa no bula dibelefe gore a tšhologele fase. Tsenya melongwana ye megolwana go ntšha meetse ao a hlatswitšego tanka ka pela le gona go ya ka molao. Hlatswa le bokantle bja segašetši. Ge o hlatswa segašetši se lebale go hlokomela gore meetse a se ke a bopa madibana ao e ka bago kotsi go bana, diruiwa, diruiwaseratwa le diphoofolo. 



Kgato ya 3: Gamola 

Go fediša meetse ao a hlwekišitšego segašetši (pesticide rinsate) go ya ka ditšhupetšo tša setlankana, a swanetše go gašetšwa lefelong leo sebolayasenyi seo se dirišitšwego go lona goba fao se tlogo dirišwa gona (bjalo ka ge re boletše, gantši morumo wa tšhemo yeo e gašeditšwego ka sebolayasenyi seo ke lefelo la maleba). Boeletša kgamolo morago ga ge segašetši se upilwe le gona se hlatswitšwe leboelela. Kgonthiša gape gore o gamola le ditanka tše di swarago meetse a a hlwekilego a go hlatswa pele ga ge o di boloka, go thiba gore di senyege ka baka la meetse a a ka kgahlago ka gare marega. 



Kgato ya 4: Hlahloba 

Ge o hlatswitše segašetši sa gago la mafelelo o ka se hlahloba wa lokiša le go beakanya fao go nyakegago. Le ge o hlwekišitše segašetši o swanetše go itšhireletša ka go apara/rwala ditlhamo tša boitšhireletšo ka mehla ka ge mašaledi a mangwe a sebolayasenyi a ka ganelela go sona. 



Tše di swanetšego go elwa hloko ge o hlwekiša segašetši le morago ga fao: 

Melongwana ye e sa swanelego le yeo e senyegilego; 

Diširamelongwana (nozzle screens) tše di senyegilego; 

Diširamehlotlo (strainer screens) tše di senyegilego; 

Menga, go dutla le go šoma ka kakaretšo ga pompo; 

Boemo bja mathopo, kudu menga le go thubega (brittleness); 

Boemo bja dibelefe, fao di ka bego di dutla goba fao ditiišo (seals) di ka bego di bofologile; le 

Sebopego sa “boom”: lekola menga yeo e swanetšego go lokišwa. 



Kgato ya 5: Babalela 

Bjale o hlwekišitše segašetši gabotse mme o ka nyaka go tloša dikarolo tšeo di ka senyegago ge se babalelwa. 

Tloša mehlotlo o e hlatswe ka diatla meetseng a sesepe (elelwa go rwala ditlelafo tše di sa senywego ke dikhemikhale), e tšokotše mme o e boloke goba o e bušetše madulong a yona segašetšing. 

Lekodišiša melongwana, dipopegomelongwana (nozzle bodies) le dibelefe (check valves) gabotse. Mašaledi a dikhemikhale a ka kgobela mafelong a, moo a ka thatafalago marega; se se ka huetša go šoma ga dikarolo tše gampe sehleng se se tlago. 

Tloša dintlhamelongwana (nozzle tips), diširo, dibelefe (check valves), dikhurumelo (caps) le dipopegomelongwana (nozzle bodies) fao dipopegomelongwana di dulago gona (nozzle body assemblies). Khupetša madulo (assemblies) a dipopegomelongwana ka moo go nepagetšego. 

Hlwekiša o be o tšokotše dintlhamelongwana, dipopegomelongwana le dibelefe. Di boloke ka seswarong se se swailwego. Boloka dibelefe (check valves) themperetšheng ya phapoši (room temperature) marega go šitiša tshenyo ka baka la themperetšha ya go tonya kudu. 

Tloša dikelokgatelelo (pressure gauges) tšohle mme o khupetše mašobana segašetšing. Boloka dikelo fao di ka se huetšwego ke kgatselo goba fao di ka se senyegego. 

Mafelelong, dikološa sešitišakgatselo (antifreeze) segašetšing gammogo le diphaepheng tšohle, go akaretša le dikarolo tše: dibelefe, “booms”, “manifolds”, “flow meters” le “agitation/return lines”. Dumelela sešitišakgatselo go dikologa mathopong a “boom”. Ka tsela ye bokagare bja mathopo bo tlotšwa sešitišakgatselo, seo se thibago gore mathopo a omelele le go palega menga. Ka go khurumela melongwana yohle ya “boom”, sešitišakgatselo se kgona go dula segašetšing, eupša go ka nyakega gore o bule molongwana o tee goba ye mebedi go dumelela sešitišakgatselo go dikologa le “boom”. Khurumela melongwana yeo o e butšego ge dikarolo tšohle tša segašetši di tletše sešitišakgatselo. 

Nepo ya kgato ya poloko ke go diriša sešitišakgatselo go ntšha meetse ao a ka bego a šaletše dikarolong tša segašetši le go tlotša dikarolo tšohle ka sona. Dumelela sešitišakgatselo go dula pompong le dibelefeng go thiba ruse le tshenyo ye e ka hlolwago ke moya wa monola woo o swaregago dikarolong tša segašetši. Ka ge digašetšing tše dingwe pompo e tlošwa pele ga ge segašetši se bolokwa, tlhomo ya dibelefe tše di tswalelago (shut-off valves) mahlakoreng a pompo e ka nolofatša mošomo wo. 

Sešitišakgatselo seo se tšhelwago dikoloing tša maitišo “recreational vehicles (RV's)” ke sona se dirišwago gantši digašetšing ge di bolokwa. Se fapana le sešitišakgatselo seo se dirišwago dikoloing tša ka mehla ka ge se se kotsi kudu go diphoofolo/diruiwa ge se bapišwa le sa dikoloi tša ka mehla. Sešitišakgatselo se se dirišwago dikoloing tša RV se a kotofala (gel) ge go tonya go fetiša, eupša ga se a swanela go kgahla. Le ge go le bjalo, bala setlankana sa sešitišakgatselo ka mehla go kgonthiša gore se tla šoma ka tshwanelo tikologong ya gago marega. 

Bjale segašetši se hlwekišitšwe, se upilwe, le gona se lokišeditšwe marega, ka fao se ka babalelwa. Go molaleng gore pabalelo ya ka ntlong, moo segašetši se sa fihlelwego ke letšatši, phefo goba pula, e phala pabalelo ya ka ntle. Eupša, lefelo la ka gare leo o le kgethago le swanetše go ba kgole le menontšha ya go oma le ya seela. Lerole le mašaledi a menontšha ye a ka hlola ruse yeo e ka senyago pente le ge e ka ba dikarolo tše dingwe tša segašetši. 

Ge o sa nyake go babalela segašetši sa gago ka go diriša sešitišakgatselo, mokgwa wo mobotse ke go tloša pompo ya sona le go e babalela polokelong go fihla sehleng se se tlago. Gantši meetse a šalela pompong mme marega ge go tonya kudu meetse ao a a kgahla mme a matlola pompo – ya šala e se na mohola. 



Go hlokomela ditlhamo tša segašetši

Tlhokomelo ya ditlhamo tša segašetši sa dibolayasenyi e akaretša tlhahlobo ya ka mehla ya tanka, pompo, mathopo, “line strainers”, dikelokgatelelo, “fittings”, dintlhamelongwana le mehlotlo. Hlahloba segašetši pele le morago ga lebaka le letelele la pabalelo le ge e ka ba nako ye nngwe le ye nngwe pele ga ge se dirišwa. Se lebale le gatee go apara/rwala ditlhamo tša boitšhireletšo neng le neng ge o swara/diriša segašetši goba dikarolo tša sona. 



Ditanka tša segašetši: Ditanka tše di bopša ka setala se se sa rusego (stainless/galvenized steel), galasetlhale goba plastiki, go akaretša le “polyethylene” goba “polypropylene”. Dimateriale tše ga di mone seela gabonolo, ka fao mašaledi a dibolayasenyi ga a swanela go šala go ona ge ditanka di hlwekišitšwe. Le ge go le bjalo, tanka ya galasetlhale ge e ka gohlega ka gare e tlo mona sebolayasenyi. Menga goba tshenyego efe kapa efe llageng ya “epoxy coating” ka gare ga tanka ya setala e swanetše go lokišwa ka materiale ya “epoxy”; go sego bjalo setala se tlo rusa fao “epoxy coating” e khumogilego. O swanetše go hlahloba ditanka ka mabaka go bona ge eba ga go na menga goba ruse yeo e ka fokodišago tanka mme mafelelong ya thoma go dutla. Kgonthiša gore tanka e bofeletšwe gabotse segašetšing. 

Pompo le ditiišo: Pompo le dikarolo tšohle tša yona di swanetše go šoma gabotse. Ditiišo tša pompo, didiko tša ‘O’ (’O’ rings) goba diwašere tša mohuta wa “cup washers” tšeo di dirilwego ka letlalo goba materiale ya senthetiki, di ka omelela goba tša hunyela ge segašetši se sa dirišwe lebaka le letelele goba ge se sa babalelwe ka tshwanelo. Ditološi (solvents) tše di lego dibolayasenying tše dingwe di ka senya ditiišo tša pompo, seo se ka dirago gore pompo e dutle goba e se šome ka tshwanelo. 

Mathopo: Ntšha mathopo a a palegilego goba a dutlago o tsenye a mafsa. Elelwa gore mathopo ao a dirišwago go gašetša dibolayasenyi ga a kgone go upša le go hlwekišwa ka botlalo. Mašaledi a dibolayasenyi ao a monnwego ge go gašetšwa, a tla dula a ganelela mathopong. Mathopo ao a ntšhwago ga a swanela go dirišetšwa eng goba eng, eupša a swanetše go fedišwa ka mokgwa wo o nepagetšego. 

Mehlotlo ya “line strainers” le diširo: Diriša mehlotlo le diširo ka mehla ge segašetši se šoma. Tšona di hlaola ditšhila le dilwana di šele tšeo di ka thibago melongwana ya segašetši le go se šitiša go šoma ka tshwanelo. 

Dikelokgatelelo: Kgatelelo ya seela ka gare ga segašetši e elwa ka kelokgatelelo. Kelokgatelelo e ela kgatelelo yeo kgašetšo e gapelwago ntle ka yona ka melongwanagašetši. Kgatelelo e elwa magareng a selaolakgatelelo (pressure regulator) le melongwanagašetši. Ka lebaka le segašetši se ka se šome ka tshwanelo ge kgatelelo e fetoga. Kgonthiša gore dikelokgatelelo di šoma ka tshwanelo le gore di beakantšwe gabotse (properly calibrated). 

Ditlhomeletšo le dipatiši: Gantši ditlhomeletšo tše di palegilego goba di bofologilego e ba methopo ya go dutla. Kgonthiša gore ditlhomeletšo le dipatiši di tiile pele ga ge o tsoša kgatelelo segašetšing ka go pompa seela. Mola kgatelelo e tsošitšwe, lekola ge eba ga go na fao go dutlago.

Dintlhamelongwana le mehlotlo: Lekola melongwanagašetši ka mehla go kgonthiša gore ga e a thibana. Melongwana ye e senyegilego e gašetša khemikhale ya go feta tekanyo mme gantši se se hlola kgašetšo ye e sa lekalekanego (irregular spray pattern) le diphetho tše di fapanago. Mašobana a melongwanagašetši le ona a ka fetoga, kudu ge go dirišwa dikhemikhale tše di gohlago ka mehla, bjalo ka dipuere tše di itšego (wet able powders). Ge khemikhale ye e tšwelelago melongwaneng e le ye nnyane go yeo e nyakegago, o swanetše go hlwekiša melongwana yeo wa e leka gape. Mohlamongwe e ka ba e thibane fela. 





